43.2 เอกทุสฺสทายกตฺเถรอปทาน
“นคเร หํสวติยา,
อโหสิํ ติณหารโก;
ติณหาเรน ชีวามิ,
เตน โปเสมิ ทารเก.
ปทุมุตฺตโร นาม ชิโน,
สพฺพธมฺมาน ปารคู;
ตมนฺธการํ นาเสตฺวา,
อุปฺปชฺชิ โลกนายโก._
สเก ฆเร นิสีทิตฺวา,
เอวํ จินฺเตสิ ตาวเท;
‘พุทฺโธ โลเก สมุปฺปนฺโน,
เทยฺยธมฺโม น วิชฺชติ.
อิทํ เม สาฏกํ เอกํ,_
นตฺถิ เม โกจิ ทายโก;
ทุกฺโข นิรยสมฺผโสฺส,
โรปยิสฺสามิ ทกฺขิณํ’.
เอวาหํ จินฺตยิตฺวาน,
สกํ จิตฺตํ ปสาทยิํ;
เอกํ ทุสฺสํ คเหตฺวาน,
พุทฺธเสฏฺฐสฺสทาสหํ.
เอกํ ทุสฺสํ ททิตฺวาน,
อุกฺกุฏฺฐิํ สมฺปวตฺตยิํ;_
‘ยทิ พุทฺโธ ตุวํ วีร,
ตาเรหิ มํ มหามุนิ’.
ปทุมุตฺตโร โลกวิทู,
อาหุตีนํ ปฏิคฺคโห;
มม ทานํ ปกิตฺเตนฺโต,
อกา เม อนุโมทนํ.
‘อิมินา เอกทุเสฺสน,
เจตนาปณิธีหิ จ;
กปฺปสตสหสฺสานิ,
วินิปาตํ น คจฺฉสิ.
ฉตฺติํสกฺขตฺตุํ เทวินฺโท,
เทวรชฺชํ กริสฺสสิ;
เตตฺติํสกฺขตฺตุํ ราชา จ,
จกฺกวตฺตี ภวิสฺสสิ.
ปเทสรชฺชํ วิปุลํ,
คณนาโต อสงฺขิยํ;
เทวโลเก มนุเสฺส วา,
สํสรนฺโต ตุวํ ภเว.
รูปวา คุณสมฺปนฺโน,
อนวกฺกนฺตเทหวา;
อกฺโขภํ อมิตํ ทุสฺสํ,
ลภิสฺสสิ ยทิจฺฉกํ’.
อิทํ วตฺวาน สมฺพุทฺโธ,_
ชลชุตฺตมนามโก;
นภํ อพฺภุคฺคมี วีโร,
หํสราชาว อมฺพเร.
ยํ ยํ โยนุปปชฺชามิ,
เทวตฺตํ อถ มานุสํ;
โภเค เม อูนตา นตฺถิ,
เอกทุสฺสสฺสิทํ ผลํ.
ปทุทฺธาเร ปทุทฺธาเร,
ทุสฺสํ นิพฺพตฺตเต มมํ;
เหฏฺฐา ทุสฺสมฺหิ ติฏฺฐามิ,
อุปริจฺฉทนํ มม._
จกฺกวาฬํ อุปาทาย,
สกานนํ สปพฺพตํ;
อิจฺฉมาโน จหํ อชฺช,_
ทุเสฺสหจฺฉาทเยยฺย ตํ.
เตเนว เอกทุเสฺสน,
สํสรนฺโต ภวาภเว;
สุวณฺณวณฺโณ หุตฺวาน,
สํสรามิ ภวาภเว.
วิปากํ เอกทุสฺสสฺส,
นาชฺฌคํ กตฺถจิกฺขยํ;
อยํ เม อนฺติมา ชาติ,
วิปจฺจติ อิธาปิ เม.
สตสหสฺสิโต กปฺเป,
ยํ ทุสฺสมททิํ ตทา;
ทุคฺคติํ นาภิชานามิ,
เอกทุสฺสสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา เอกทุสฺสทายโก เถโร อิมา คาถาโย อภาสิตฺถาติ.
เอกทุสฺสทายกตฺเถรสฺสาปทานํ ทุติยํ.