43.5 โกรณฺฑปุปฺผิยตฺเถรอปทาน
“วนกมฺมิโก ปุเร อาสิํ,
ปิตุมาตุมเตนหํ;
ปสุมาเรน ชีวามิ,
กุสลํ เม น วิชฺชติ.
มม อาสยสามนฺตา,
ติโสฺส โลกคฺคนายโก;
ปทานิ ตีณิ ทเสฺสสิ,
อนุกมฺปาย จกฺขุมา.
อกฺกนฺเต จ ปเท ทิสฺวา,
ติสฺสนามสฺส สตฺถุโน;
หฏฺโฐ หฏฺเฐน จิตฺเตน,
ปเท จิตฺตํ ปสาทยิํ.
โกรณฺฑํ ปุปฺผิตํ ทิสฺวา,
ปาทปํ ธรณีรุหํ;
สโกสกํ คเหตฺวาน,
ปทเสฏฺฐมปูชยิํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ยํ ยํ โยนุปปชฺชามิ,
เทวตฺตํ อถ มานุสํ;
โกรณฺฑวณฺณโกเยว,
สุปฺปภาโส ภวามหํ.
ทฺเวนวุเต อิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
ปทปูชายิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติ.
โกรณฺฑปุปฺผิยตฺเถรสฺสาปทานํ ปญฺจมํ.