43.8 สุจินฺติตตฺเถรอปทาน
“นคเร หํสวติยา,
อโหสิํ กสฺสโก ตทา;
กสิกมฺเมน ชีวามิ,
เตน โปเสมิ ทารเก.
สุสมฺปนฺนํ ตทา เขตฺตํ,
ธญฺญํ เม ผลินํ อหุ;
ปากกาเล จ สมฺปตฺเต,
เอวํ จินฺเตสหํ ตทา.
นจฺฉนฺนํ นปฺปติรูปํ,
ชานนฺตสฺส คุณาคุณํ;
โยหํ สํเฆ อทตฺวาน,
อคฺคํ ภุญฺเชยฺย เจ ตทา.
อยํ พุทฺโธ อสมสโม,
ทฺวตฺติํสวรลกฺขโณ;
ตโต ปภาวิโต สํโฆ,
ปุญฺญกฺเขตฺโต อนุตฺตโร.
ตตฺถ ทสฺสามหํ ทานํ,
นวสสฺสํ ปุเร ปุเร;
เอวาหํ จินฺตยิตฺวาน,
หฏฺโฐ ปีณิตมานโส.
เขตฺตโต ธญฺญมาหตฺวา,
สมฺพุทฺธํ อุปสงฺกมิํ;
อุปสงฺกมฺม สมฺพุทฺธํ,_
โลกเชฏฺฐํ นราสภํ;
วนฺทิตฺวา สตฺถุโน ปาเท,
อิทํ วจนมพฺรวิํ._
‘นวสสฺสญฺจ สมฺปนฺนํ,
อายาโคสิ จ ตฺวํ มุเน;
อนุกมฺปมุปาทาย,
อธิวาเสหิ จกฺขุม’.
ปทุมุตฺตโร โลกวิทู,
อาหุตีนํ ปฏิคฺคโห;
มม สงฺกปฺปมญฺญาย,
อิทํ วจนมพฺรวิ._
‘จตฺตาโร จ ปฏิปนฺนา,
จตฺตาโร จ ผเล ฐิตา;
เอส สํโฆ อุชุภูโต,
ปญฺญาสีลสมาหิโต;
ยชนฺตานํ มนุสฺสานํ,
ปุญฺญเปกฺขาน ปาณินํ.
กโรโตปธิกํ ปุญฺญํ,
สํเฆ ทินฺนํ มหปฺผลํ;
ตสฺมิํ สํเฆว ทาตพฺพํ,
ตว สสฺสํ ตเถตรํ.
สํฆโต อุทฺทิสิตฺวาน,
ภิกฺขู เนตฺวาน สํฆรํ;
ปฏิยตฺตํ ฆเร สนฺตํ,
ภิกฺขุสํฆสฺส เทหิ ตฺวํ’.
สํฆโต อุทฺทิสิตฺวาน,
ภิกฺขู เนตฺวาน สํฆรํ;
ยํ ฆเร ปฏิยตฺตํ เม,
ภิกฺขุสํฆสฺสทาสหํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
โสวณฺณํ สปฺปภสฺสรํ;
สฏฺฐิโยชนมุพฺเพธํ,
ติํสโยชนวิตฺถตํ.
เอกูนวีสติมํ ภาณวารํ.
อากิณฺณํ ภวนํ มยฺหํ,
นารีคณสมากุลํ;
ตตฺถ ภุตฺวา ปิวิตฺวา จ,
วสามิ ติทเส อหํ.
สตานํ ตีณิกฺขตฺตุญฺจ,
เทวรชฺชมการยิํ;
สตานํ ปญฺจกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
ภวาภเว สํสรนฺโต,
ลภามิ อมิตํ ธนํ;
โภเค เม อูนตา นตฺถิ,
นวสสฺสสฺสิทํ ผลํ.
หตฺถิยานํ อสฺสยานํ,
สิวิกํ สนฺทมานิกํ;
ลภามิ สพฺพเมเวตํ,
นวสสฺสสฺสิทํ ผลํ.
นววตฺถํ นวผลํ,
นวคฺครสโภชนํ;
ลภามิ สพฺพเมเวตํ,
นวสสฺสสฺสิทํ ผลํ.
โกเสยฺยกมฺพลิยานิ,
โขมกปฺปาสิกานิ จ;
ลภามิ สพฺพเมเวตํ,
นวสสฺสสฺสิทํ ผลํ.
ทาสีคณํ ทาสคณํ,
นาริโย จ อลงฺกตา;
ลภามิ สพฺพเมเวตํ,
นวสสฺสสฺสิทํ ผลํ.
น มํ สีตํ วา อุณฺหํ วา,
ปริฬาโห น วิชฺชติ;
อโถ เจตสิกํ ทุกฺขํ,
หทเย เม น วิชฺชติ.
อิทํ ขาท อิทํ ภุญฺช,_
อิมมฺหิ สยเน สย;_
ลภามิ สพฺพเมเวตํ,
นวสสฺสสฺสิทํ ผลํ.
อยํ ปจฺฉิมโก ทานิ,
จริโม วตฺตเต ภโว;
อชฺชาปิ เทยฺยธมฺโม เม,
ผลํ โตเสสิ สพฺพทา.
นวสสฺสํ ททิตฺวาน,
สํเฆ คณวรุตฺตเม;
อฏฺฐานิสํเส อนุโภมิ,
กมฺมานุจฺฉวิเก มม.
วณฺณวา ยสวา โหมิ,
มหาโภโค อนีติโก;
มหาปกฺโข สทา โหมิ,
อเภชฺชปริโส สทา.
สพฺเพ มํ อปจายนฺติ,
เย เกจิ ปถวิสฺสิตา;
เทยฺยธมฺมา จ เย เกจิ,
ปุเร ปุเร ลภามหํ.
ภิกฺขุสํฆสฺส วา มชฺเฌ,
พุทฺธเสฏฺฐสฺส สมฺมุขา;
สพฺเพปิ สมติกฺกมฺม,
เทนฺติ มเมว ทายกา.
ปฐมํ นวสสฺสญฺหิ,
ทตฺวา สํเฆ คณุตฺตเม;
อิมานิสํเส อนุโภมิ,_
นวสสฺสสฺสิทํ ผลํ.
สตสหสฺสิโต กปฺเป,
ยํ ทานมททิํ ตทา;
ทุคฺคติํ นาภิชานามิ,
นวสสฺสสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา สุจินฺติโต เถโร อิมา คาถาโย อภาสิตฺถาติ.
สุจินฺติตตฺเถรสฺสาปทานํ อฏฺฐมํ.