44.8 หรีตกทายกตฺเถรอปทาน
“หรีตกํ อามลกํ,
อมฺพชมฺพุวิภีตกํ;
โกลํ ภลฺลาตกํ พิลฺลํ,
สยเมว หรามหํ.
ทิสฺวาน ปพฺภารคตํ,
ฌายิํ ฌานรตํ มุนิํ;
อาพาเธน อาปีเฬนฺตํ,
อทุตียํ มหามุนิํ.
หรีตกํ คเหตฺวาน,
สยมฺภุสฺส อทาสหํ;
ขาทมตฺตมฺหิ เภสชฺเช,
พฺยาธิ ปสฺสมฺภิ ตาวเท.
ปหีนทรโถ พุทฺโธ,
อนุโมทมกาสิ เม;
‘เภสชฺชทาเนนิมินา,
พฺยาธิวูปสเมน จ.
เทวภูโต มนุโสฺส วา,
ชาโต วา อญฺญชาติยา;
สพฺพตฺถ สุขิโต โหตุ,
มา จ เต พฺยาธิมาคมา’.
อิทํ วตฺวาน สมฺพุทฺโธ,_
สยมฺภู อปราชิโต;
นภํ อพฺภุคฺคมี ธีโร,
หํสราชาว อมฺพเร.
ยโต หรีตกํ ทินฺนํ,
สยมฺภุสฺส มเหสิโน;
อิมํ ชาติํ อุปาทาย,_
พฺยาธิ เม นุปปชฺชถ.
อยํ ปจฺฉิมโก มยฺหํ,
จริโม วตฺตเต ภโว;
ติโสฺส วิชฺชา สจฺฉิกตา,
กตํ พุทฺธสฺส สาสนํ.
จตุนฺนวุติโต กปฺเป,
เภสชฺชมททิํ ตทา;
ทุคฺคติํ นาภิชานามิ,
เภสชฺชสฺส อิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา หรีตกทายโก เถโร อิมา คาถาโย อภาสิตฺถาติ.
หรีตกทายกตฺเถรสฺสาปทานํ อฏฺฐมํ.