47.9 สยมฺปฏิภานิยตฺเถรอปทาน
“กกุธํ วิลสนฺตํว,
เทวเทวํ นราสภํ;
รถิยํ ปฏิปชฺชนฺตํ,
โก ทิสฺวา น ปสีทติ.
ตมนฺธการํ นาเสตฺวา,
สนฺตาเรตฺวา พหุํ ชนํ;
ญาณาโลเกน โชตนฺตํ,
โก ทิสฺวา น ปสีทติ.
วสีสตสหเสฺสหิ,
นียนฺตํ โลกนายกํ;
อุทฺธรนฺตํ พหู สตฺเต,_
โก ทิสฺวา น ปสีทติ.
อาหนนฺตํ ธมฺมเภริํ,
มทฺทนฺตํ ติตฺถิเย คเณ;
สีหนาทํ วินทนฺตํ,
โก ทิสฺวา น ปสีทติ.
ยาวตา พฺรหฺมโลกโต,
อาคนฺตฺวาน สพฺรหฺมกา;
ปุจฺฉนฺติ นิปุเณ ปเญฺห,
โก ทิสฺวา น ปสีทติ.
ยสฺสญฺชลิํ กริตฺวาน,
อายาจนฺติ สเทวกา;
เตน ปุญฺญํ อนุโภนฺติ,
โก ทิสฺวา น ปสีทติ.
สพฺเพ ชนา สมาคนฺตฺวา,
สมฺปวาเรนฺติ จกฺขุมํ;
น วิกมฺปติ อชฺฌิฏฺโฐ,
โก ทิสฺวา น ปสีทติ.
นครํ ปวิสโต ยสฺส,
รวนฺติ เภริโย พหู;
วินทนฺติ คชา มตฺตา,
โก ทิสฺวา น ปสีทติ.
วีถิยา คจฺฉโต ยสฺส,
สพฺพาภา โชตเต สทา;
อพฺภุนฺนตา สมา โหนฺติ,
โก ทิสฺวา น ปสีทติ.
พฺยาหรนฺตสฺส พุทฺธสฺส,
จกฺกวาฬมฺปิ สุยฺยติ;
สพฺเพ สตฺเต วิญฺญาเปติ,
โก ทิสฺวา น ปสีทติ.
สตสหสฺสิโต กปฺเป,
ยํ พุทฺธมภิกิตฺตยิํ;
ทุคฺคติํ นาภิชานามิ,
กิตฺตนาย อิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา สยมฺปฏิภานิโย เถโร อิมา คาถาโย อภาสิตฺถาติ.
สยมฺปฏิภานิยตฺเถรสฺสาปทานํ นวมํ.