48.1 นฬมาลิยตฺเถรอปทาน
1.
6066
“สุวณฺณวณฺณํ สมฺพุทฺธํ,
อาหุตีนํ ปฏิคฺคหํ;
วิปินคฺเคน คจฺฉนฺตํ,
อทฺทสํ โลกนายกํ.
2.
6067
นฬมาลํ คเหตฺวาน,
นิกฺขมนฺโต จ ตาวเท;
ตตฺถทฺทสาสิํ สมฺพุทฺธํ,
โอฆติณฺณมนาสวํ.
3.
6068
ปสนฺนจิตฺโต สุมโน,
นฬมาลมปูชยิํ;
ทกฺขิเณยฺยํ มหาวีรํ,
สพฺพโลกานุกมฺปกํ.
4.
6069
เอกติํเส อิโต กปฺเป,
ยํ มาลมภิโรปยิํ;
ทุคฺคติํ นาภิชานามิ,
พุทฺธปูชายิทํ ผลํ.
5.
6070
กิเลสา ฌาปิตา มยฺหํ,
ภวา สพฺเพ สมูหตา;
นาโคว พนฺธนํ เฉตฺวา,
วิหรามิ อนาสโว.
6.
6071
สฺวาคตํ วต เม อาสิ,
มม พุทฺธสฺส สนฺติเก;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
7.
6072
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
6073
อิตฺถํ สุทํ อายสฺมา นฬมาลิโย เถโร อิมา คาถาโย อภาสิตฺถาติ.
6074
นฬมาลิยตฺเถรสฺสาปทานํ ปฐมํ.