48.3 อุกฺกาสติกตฺเถรอปทาน
“โกสิโย นาม ภควา,
จิตฺตกูเฏ วสี ตทา;
ฌายี ฌานรโต พุทฺโธ,
วิเวกาภิรโต มุนิ.
อชฺโฌคาเหตฺวา หิมวนฺตํ,
นารีคณปุรกฺขโต;
อทฺทสํ โกสิยํ พุทฺธํ,
ปุณฺณมาเยว จนฺทิมํ.
อุกฺกาสเต คเหตฺวาน,_
ปริวาเรสหํ ตทา;
สตฺตรตฺตินฺทิวํ ฐตฺวา,
อฏฺฐเมน อคจฺฉหํ.
วุฏฺฐิตํ โกสิยํ พุทฺธํ,
สยมฺภุํ อปราชิตํ;
ปสนฺนจิตฺโต วนฺทิตฺวา,
เอกํ ภิกฺขํ อทาสหํ.
เตน กมฺเมน ทฺวิปทินฺท,
โลกเชฏฺฐ นราสภ;
อุปฺปชฺชิํ ตุสิเต กาเย,_
เอกภิกฺขายิทํ ผลํ.
ทิวสญฺเจว รตฺติญฺจ,
อาโลโก โหติ เม สทา;
สมนฺตา โยชนสตํ,
โอภาเสน ผรามหํ.
ปญฺจปญฺญาสกปฺปมฺหิ,
จกฺกวตฺตี อโหสหํ;
จาตุรนฺโต วิชิตาวี,
ชมฺพุมณฺฑสฺส อิสฺสโร.
ตทา เม นครํ อาสิ,
อิทฺธํ ผีตํ สุนิมฺมิตํ;_
ติํสโยชนมายามํ,
วิตฺถาเรน จ วีสติ.
โสภนํ นาม นครํ,
วิสฺสกมฺเมน มาปิตํ;
ทสสทฺทาวิวิตฺตํ ตํ,
สมฺมตาฬสมาหิตํ.
น ตมฺหิ นคเร อตฺถิ,
วลฺลิกฏฺฐญฺจ มตฺติกา;
สพฺพโสณฺณมยํเยว,
โชตเต นิจฺจกาลิกํ.
จตุปาการปริกฺขิตฺตํ,
ตโย อาสุํ มณิมยา;
เวมชฺเฌ ตาลปนฺตี จ,
วิสฺสกมฺเมน มาปิตา.
ทสสหสฺสโปกฺขรญฺโญ,
ปทุมุปฺปลฉาทิตา;
ปุณฺฑรีเกหิ สญฺฉนฺนา,
นานาคนฺธสมีริตา.
จตุนฺนวุติโต กปฺเป,
ยํ อุกฺกํ ธารยิํ อหํ;
ทุคฺคติํ นาภิชานามิ,
อุกฺกาธารสฺสิทํ ผลํ._
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา อุกฺกาสติโก เถโร อิมา คาถาโย อภาสิตฺถาติ.
อุกฺกาสติกตฺเถรสฺสาปทานํ ตติยํ.