48.9 ปานธิทายกตฺเถรอปทาน
“อโนมทสฺสี ภควา,
โลกเชฏฺโฐ นราสโภ;
ทิวาวิหารา นิกฺขมฺม,
ปถมารุหิ จกฺขุมา.
ปานธิํ สุกตํ คยฺห,
อทฺธานํ ปฏิปชฺชหํ;
ตตฺถทฺทสาสิํ สมฺพุทฺธํ,
ปตฺติกํ จารุทสฺสนํ.
สกํ จิตฺตํ ปสาเทตฺวา,
นีหริตฺวาน ปานธิํ;
ปาทมูเล ฐเปตฺวาน,
อิทํ วจนมพฺรวิํ._
‘อภิรูห มหาวีร,
สุคตินฺท วินายก;
อิโต ผลํ ลภิสฺสามิ,_
โส เม อตฺโถ สมิชฺฌตุ’.
อโนมทสฺสี ภควา,
โลกเชฏฺโฐ นราสโภ;
ปานธิํ อภิรูหิตฺวา,
อิทํ วจนมพฺรวิ._
‘โย ปานธิํ เม อทาสิ,
ปสนฺโน เสหิ ปาณิภิ;
ตมหํ กิตฺตยิสฺสามิ,
สุณาถ มม ภาสโต’.
พุทฺธสฺส คิรมญฺญาย,
สพฺเพ เทวา สมาคตา;
อุทคฺคจิตฺตา สุมนา,_
เวทชาตา กตญฺชลี.
‘ปานธีนํ ปทาเนน,
สุขิโตยํ ภวิสฺสติ;
ปญฺจปญฺญาสกฺขตฺตุญฺจ,
เทวรชฺชํ กริสฺสติ.
สหสฺสกฺขตฺตุํ ราชา จ,
จกฺกวตฺตี ภวิสฺสติ;
ปเทสรชฺชํ วิปุลํ,
คณนาโต อสงฺขิยํ.
อปริเมเยฺย อิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว.
เทวโลเก มนุเสฺส วา,
นิพฺพตฺติสฺสติ ปุญฺญวา;
เทวยานปฏิภาคํ,
ยานํ ปฏิลภิสฺสติ’.
ปาสาทา สิวิกา วยฺหํ,
หตฺถิโน สมลงฺกตา;
รถา วาชญฺญสํยุตฺตา,
สทา ปาตุภวนฺติ เม.
อคารา นิกฺขมนฺโตปิ,
รเถน นิกฺขมิํ อหํ;
เกเสสุ ฉิชฺชมาเนสุ,
อรหตฺตมปาปุณิํ.
ลาภา มยฺหํ สุลทฺธํ เม,
วาณิชฺชํ สุปฺปโยชิตํ;
ทตฺวาน ปานธิํ เอกํ,
ปตฺโตมฺหิ อจลํ ปทํ.
อปริเมเยฺย อิโต กปฺเป,
ยํ ปานธิมทาสหํ;
ทุคฺคติํ นาภิชานามิ,
ปานธิสฺส อิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ปานธิทายโก เถโร อิมา คาถาโย อภาสิตฺถาติ.
ปานธิทายกตฺเถรสฺสาปทานํ นวมํ.