49.2 พุทฺธสญฺญกตฺเถรอปทาน
“อชฺฌายโก มนฺตธโร,
ติณฺณํ เวทาน ปารคู;
ลกฺขเณ อิติหาเส จ,
สนิฆณฺฑุสเกฏุเภ.
นทีโสตปฏิภาคา,
สิสฺสา อายนฺติ เม ตทา;
เตสาหํ มนฺเต วาเจมิ,
รตฺตินฺทิวมตนฺทิโต.
สิทฺธตฺโถ นาม สมฺพุทฺโธ,
โลเก อุปฺปชฺชิ ตาวเท;
ตมนฺธการํ นาเสตฺวา,
ญาณาโลกํ ปวตฺตยิ.
มม อญฺญตโร สิโสฺส,
สิสฺสานํ โส กเถสิ เม;
สุตฺวาน เต เอตมตฺถํ,
อาโรเจสุํ มมํ ตทา.
‘พุทฺโธ โลเก สมุปฺปนฺโน,
สพฺพญฺญู โลกนายโก;
ตสฺสานุวตฺตติ ชโน,
ลาโภ อมฺหํ น วิชฺชติ.
อธิจฺจุปฺปตฺติกา พุทฺธา,
จกฺขุมนฺโต มหายสา;
ยนฺนูนาหํ พุทฺธเสฏฺฐํ,
ปเสฺสยฺยํ โลกนายกํ’.
อชินํ เม คเหตฺวาน,
วากจีรํ กมณฺฑลุํ;
อสฺสมา อภินิกฺขมฺม,
สิเสฺส อามนฺตยิํ อหํ.
โอทุมฺพริกปุปฺผํว,
จนฺทมฺหิ สสกํ ยถา;
วายสานํ ยถา ขีรํ,
ทุลฺลโภ โลกนายโก.
พุทฺโธ โลกมฺหิ อุปฺปนฺโน,
มนุสฺสตฺตมฺปิ ทุลฺลภํ;
อุโภสุ วิชฺชมาเนสุ,_
สวนญฺจ สุทุลฺลภํ.
พุทฺโธ โลเก สมุปฺปนฺโน,
จกฺขุํ ลจฺฉาม โน ภวํ;
เอถ สพฺเพ คมิสฺสาม,
สมฺมาสมฺพุทฺธสนฺติกํ.
กมณฺฑลุธรา สพฺเพ,
ขราชินนิวาสิโน;
เต ชฏา ภารภริตา,
นิกฺขมุํ วิปินา ตทา.
ยุคมตฺตํ เปกฺขมานา,
อุตฺตมตฺถํ คเวสิโน;_
อาสตฺติโทสรหิตา,
อสมฺภีตาว เกสรี.
อปฺปกิจฺจา อโลลุปฺปา,
นิปกา สนฺตวุตฺติโน;
อุญฺฉาย จรมานา เต,_
พุทฺธเสฏฺฐมุปาคมุํ.
ทิยฑฺฒโยชเน เสเส,
พฺยาธิ เม อุปปชฺชถ;
พุทฺธเสฏฺฐํ สริตฺวาน,
ตตฺถ กาลงฺกโต อหํ.
จตุนฺนวุติโต กปฺเป,
ยํ สญฺญมลภิํ ตทา;
ทุคฺคติํ นาภิชานามิ,
พุทฺธสญฺญายิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา พุทฺธสญฺญโก เถโร อิมา คาถาโย อภาสิตฺถาติ.
พุทฺธสญฺญกตฺเถรสฺสาปทานํ ทุติยํ.