50.9 นฬกุฏิทายกตฺเถรอปทาน
“หิมวนฺตสฺสาวิทูเร,
หาริโต นาม ปพฺพโต;
สยมฺภู นารโท นาม,
รุกฺขมูเล วสี ตทา.
นฬาคารํ กริตฺวาน,
ติเณน ฉาทยิํ อหํ;
จงฺกมํ โสธยิตฺวาน,
สยมฺภุสฺส อทาสหํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
นฬกุฏิกนิมฺมิตํ;
สฏฺฐิโยชนมุพฺเพธํ,
ติํสโยชนวิตฺถตํ.
จตุทฺทเสสุ กปฺเปสุ,
เทวโลเก รมิํ อหํ;
เอกสตฺตติกฺขตฺตุญฺจ,
เทวรชฺชมการยิํ.
จตุติํสติกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
ธมฺมปาสาทมารุยฺห,
สพฺพาการวรูปมํ;
ยทิจฺฉกาหํ วิหเร,
สกฺยปุตฺตสฺส สาสเน.
เอกติํเส อิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
นฬกุฏิยิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา นฬกุฏิทายโก เถโร อิมา คาถาโย อภาสิตฺถาติ.
นฬกุฏิทายกตฺเถรสฺสาปทานํ นวมํ.