51.1 ติกณิการปุปฺผิยตฺเถรอปทาน
“สุเมโธ นาม สมฺพุทฺโธ,
พาตฺติํสวรลกฺขโณ;
วิเวกกาโม สมฺพุทฺโธ,
หิมวนฺตมุปาคมิํ.
อชฺโฌคยฺห หิมวนฺตํ,
อคฺโค การุณิโก มุนิ;
ปลฺลงฺกมาภุชิตฺวาน,
นิสีทิ ปุริสุตฺตโม.
วิชฺชาธโร ตทา อาสิํ,
อนฺตลิกฺขจโร อหํ;
ติสูลํ สุกตํ คยฺห,
คจฺฉามิ อมฺพเร ตทา.
ปพฺพตคฺเค ยถา อคฺคิ,
ปุณฺณมาเยว จนฺทิมา;
วเน โอภาสเต พุทฺโธ,
สาลราชาว ผุลฺลิโต.
วนคฺคา นิกฺขมิตฺวาน,
พุทฺธรํสีภิธาวเร;
นฬคฺคิวณฺณสงฺกาสา,
ทิสฺวา จิตฺตํ ปสาทยิํ.
วิจินํ อทฺทสํ ปุปฺผํ,
กณิการํ เทวคนฺธิกํ;
ตีณิ ปุปฺผานิ อาทาย,
พุทฺธเสฏฺฐมปูชยิํ.
พุทฺธสฺส อานุภาเวน,
ตีณิ ปุปฺผานิ เม ตทา;
อุทฺธํวณฺฏา อโธปตฺตา,_
ฉายํ กุพฺพนฺติ สตฺถุโน.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ตตฺถ เม สุกตํ พฺยมฺหํ,
กณิการีติ ญายติ;
สฏฺฐิโยชนมุพฺเพธํ,
ติํสโยชนวิตฺถตํ.
สหสฺสกณฺฑํ สตเภณฺฑุ,
ธชาลุหริตามยํ;
สตสหสฺสนิยฺยูหา,
พฺยเมฺห ปาตุภวิํสุ เม.
โสณฺณมยา มณิมยา,
โลหิตงฺคมยาปิ จ;
ผลิกาปิ จ ปลฺลงฺกา,
เยนิจฺฉกา ยทิจฺฉกา.
มหารหญฺจ สยนํ,
ตูลิกาวิกตียุตํ;
อุทฺธโลมิกเอกนฺตํ,_
พิพฺโพหนสมายุตํ.
ภวนา นิกฺขมิตฺวาน,
จรนฺโต เทวจาริกํ;
ยทา อิจฺฉามิ คมนํ,
เทวสงฺฆปุรกฺขโต.
ปุปฺผสฺส เหฏฺฐา ติฏฺฐามิ,
อุปริจฺฉทนํ มม;_
สมนฺตา โยชนสตํ,
กณิกาเรหิ ฉาทิตํ.
สฏฺฐิตุริยสหสฺสานิ,
สายํ ปาตมุปฏฺฐหุํ;
ปริวาเรนฺติ มํ นิจฺจํ,
รตฺตินฺทิวมตนฺทิตา.
ตตฺถ นจฺเจหิ คีเตหิ,
ตาเฬหิ วาทิเตหิ จ;
รมามิ ขิฑฺฑารติยา,
โมทามิ กามกามิหํ.
ตตฺถ ภุตฺวา ปิวิตฺวา จ,
โมทามิ ติทเส ตทา;
นารีคเณหิ สหิโต,
โมทามิ พฺยมฺหมุตฺตเม.
สตานํ ปญฺจกฺขตฺตุญฺจ,
เทวรชฺชมการยิํ;
สตานํ ตีณิกฺขตฺตุญฺจ,
จกฺกวตฺตี อโหสหํ;
ปเทสรชฺชํ วิปุลํ,
คณนาโต อสงฺขิยํ.
ภวาภเว สํสรนฺโต,
มหาโภคํ ลภามหํ;
โภเค เม อูนตา นตฺถิ,
พุทฺธปูชายิทํ ผลํ.
ทุเว ภเว สํสรามิ,
เทวตฺเต อถ มานุเส;
อญฺญํ คติํ น ชานามิ,
พุทฺธปูชายิทํ ผลํ.
ทุเว กุเล ปชายามิ,
ขตฺติเย จาปิ พฺราหฺมเณ;
นีเจ กุเล น ชายามิ,
พุทฺธปูชายิทํ ผลํ.
หตฺถิยานํ อสฺสยานํ,
สิวิกํ สนฺทมานิกํ;
ลภามิ สพฺพเมเวตํ,
พุทฺธปูชายิทํ ผลํ.
ทาสีคณํ ทาสคณํ,
นาริโย สมลงฺกตา;
ลภามิ สพฺพเมเวตํ,
พุทฺธปูชายิทํ ผลํ.
โกเสยฺยกมฺพลิยานิ,
โขมกปฺปาสิกานิ จ;
ลภามิ สพฺพเมเวตํ,
พุทฺธปูชายิทํ ผลํ.
นววตฺถํ นวผลํ,
นวคฺครสโภชนํ;
ลภามิ สพฺพเมเวตํ,
พุทฺธปูชายิทํ ผลํ.
อิมํ ขาท อิมํ ภุญฺช,_
อิมมฺหิ สยเน สย;_
ลภามิ สพฺพเมเวตํ,
พุทฺธปูชายิทํ ผลํ.
สพฺพตฺถ ปูชิโต โหมิ,
ยโส อพฺภุคฺคโต มม;
มหาปกฺโข สทา โหมิ,
อเภชฺชปริโส สทา;
ญาตีนํ อุตฺตโม โหมิ,
พุทฺธปูชายิทํ ผลํ.
สีตํ อุณฺหํ น ชานามิ,
ปริฬาโห น วิชฺชติ;
อโถ เจตสิกํ ทุกฺขํ,
หทเย เม น วิชฺชติ.
สุวณฺณวณฺโณ หุตฺวาน,
สํสรามิ ภวาภเว;
เววณฺณิยํ น ชานามิ,
พุทฺธปูชายิทํ ผลํ.
เทวโลกา จวิตฺวาน,
สุกฺกมูเลน โจทิโต;
สาวตฺถิยํ ปุเร ชาโต,
มหาสาเล สุอฑฺฒเก.
ปญฺจ กามคุเณ หิตฺวา,
ปพฺพชิํ อนคาริยํ;
ชาติยา สตฺตวโสฺสหํ,
อรหตฺตมปาปุณิํ.
อุปสมฺปาทยี พุทฺโธ,_
คุณมญฺญาย จกฺขุมา;
ตรุโณ ปูชนีโยหํ,
พุทฺธปูชายิทํ ผลํ.
ทิพฺพจกฺขุ วิสุทฺธํ เม,
สมาธิกุสโล อหํ;
อภิญฺญาปารมิปฺปตฺโต,
พุทฺธปูชายิทํ ผลํ.
ปฏิสมฺภิทา อนุปฺปตฺโต,
อิทฺธิปาเทสุ โกวิโท;_
ธมฺเมสุ ปารมิปฺปตฺโต,
พุทฺธปูชายิทํ ผลํ.
ติํสกปฺปสหสฺสมฺหิ,
ยํ พุทฺธมภิปูชยิํ;
ทุคฺคติํ นาภิชานามิ,
พุทฺธปูชายิทํ ผลํ.
กิเลสา ฌาปิตา มยฺหํ,
ภวา สพฺเพ สมูหตา;
นาโคว พนฺธนํ เฉตฺวา,
วิหรามิ อนาสโว.
สฺวาคตํ วต เม อาสิ,
มม พุทฺธสฺส สนฺติเก;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ติกณิการปุปฺผิโย เถโร อิมา คาถาโย อภาสิตฺถาติ.
ติกณิการปุปฺผิยตฺเถรสฺสาปทานํ ปฐมํ.