53.10 สุคนฺธตฺเถรอปทาน
“อิมมฺหิ ภทฺทเก กปฺเป,
พฺรหฺมพนฺธุ มหายโส;
กสฺสโป นาม โคตฺเตน,
อุปฺปชฺชิ วทตํ วโร._
อนุพฺยญฺชนสมฺปนฺโน,
พาตฺติํสวรลกฺขโณ;
พฺยามปฺปภาปริวุโต,
รํสิชาลสโมตฺถโฏ.
อสฺสาเสตา ยถา จนฺโท,
สูริโยว ปภงฺกโร;
นิพฺพาเปตา ยถา เมโฆ,
สาคโรว คุณากโร.
ธรณีริว สีเลน,
หิมวาว สมาธินา;
อากาโส วิย ปญฺญาย,
อสงฺโค อนิโล ยถา.
ส กทาจิ มหาวีโร,
ปริสาสุ วิสารโท;
สจฺจานิ สมฺปกาเสติ,
อุทฺธรนฺโต มหาชนํ._
ตทา หิ พาราณสิยํ,
เสฏฺฐิปุตฺโต มหายโส;
อาสหํ ธนธญฺญสฺส,
ปหูตสฺส พหู ตทา.
ชงฺฆาวิหารํ วิจรํ,
มิคทายมุเปจฺจหํ;
อทฺทสํ วิรชํ พุทฺธํ,
เทเสนฺตํ อมตํ ปทํ.
วิสฏฺฐกนฺตวจนํ,
กรวีกสมสฺสรํ;
หํสรุเตหิ นิคฺโฆสํ,
วิญฺญาเปนฺตํ มหาชนํ.
ทิสฺวา เทวาติเทวํ ตํ,
สุตฺวาว มธุรํ คิรํ;
ปหายนปฺปเก โภเค,
ปพฺพชิํ อนคาริยํ.
เอวํ ปพฺพชิโต จาหํ,
น จิเรน พหุสฺสุโต;
อโหสิํ ธมฺมกถิโก,
วิจิตฺตปฏิภานวา.
มหาปริสมชฺเฌหํ,
หฏฺฐจิตฺโต ปุนปฺปุนํ;
วณฺณยิํ เหมวณฺณสฺส,
วณฺณํ วณฺณวิสารโท.
‘เอส ขีณาสโว พุทฺโธ,
อนีโฆ ฉินฺนสํสโย;
สพฺพกมฺมกฺขยํ ปตฺโต,
วิมุตฺโตปธิสงฺขเย.
เอส โส ภควา พุทฺโธ,
เอส สีโห อนุตฺตโร;
สเทวกสฺส โลกสฺส,
พฺรหฺมจกฺกปฺปวตฺตโก.
ทนฺโต ทเมตา สนฺโต จ,
สเมตา นิพฺพุโต อิสิ;
นิพฺพาเปตา จ อสฺสตฺโถ,
อสฺสาเสตา มหาชนํ.
วีโร สูโร จ วิกฺกนฺโต,
ปญฺโญ การุณิโก วสี;
วิชิตาวี จ ส ชิโน,
อปฺปคพฺโพ อนาลโย.
อเนญฺโช อจโล ธีมา,
อโมโห อสโม มุนิ;
โธรโยฺห อุสโภ นาโค,
สีโห สกฺโก ครูสุปิ.
วิราโค วิมโล พฺรหฺมา,
วาที สูโร รณญฺชโห;
อขิโล จ วิสโลฺล จ,
อสโม สํยโต สุจิ.
พฺราหฺมโณ สมโณ นาโถ,
ภิสกฺโก สลฺลกตฺตโก;
โยโธ พุทฺโธ สุตาสุโต,
อจโล มุทิโต สิโต.
ธาตา ธตา จ สนฺติ จ,
กตฺตา เนตา ปกาสิตา;
สมฺปหํสิตา เภตฺตา จ,
เฉตฺตา โสตา ปสํสิตา.
อขิโล จ วิสโลฺล จ,
อนีโฆ อกถํกถี;
อเนโช วิรโช กตฺตา,
คนฺธา วตฺตา ปสํสิตา.
ตาเรตา อตฺถกาเรตา,
กาเรตา สมฺปทาริตา;
ปาเปตา สหิตา กนฺตา,
หนฺตา อาตาปี ตาปโส.
สมจิตฺโต สมสโม,
อสหาโย ทยาลโย;
อจฺเฉรสตฺโต อกุโห,
กตาวี อิสิสตฺตโม.
นิตฺติณฺณกงฺโข นิมฺมาโน,
อปฺปเมโยฺย อนูปโม;
สพฺพวากฺยปถาตีโต,
สจฺจเนยฺยนฺตคู ชิโน.
สตฺตสารวเร ตสฺมิํ,
ปสาโท อมตาวโห;
ตสฺมา พุทฺเธ จ ธมฺเม จ,
สํเฆ สทฺธา มหตฺถิกา’.
คุเณหิ เอวมาทีหิ,
ติโลกสรณุตฺตมํ;
วณฺเณนฺโต ปริสามชฺเฌ,
อกํ ธมฺมกถํ อหํ.
ตโต จุตาหํ ตุสิเต,
อนุโภตฺวา มหาสุขํ;
ตโต จุโต มนุเสฺสสุ,
ชาโต โหมิ สุคนฺธิโก.
นิสฺสาโส มุขคนฺโธ จ,
เทหคนฺโธ ตเถว เม;
เสทคนฺโธ จ สตตํ,
สพฺพคนฺโธว โหติ เม.
มุขคนฺโธ สทา มยฺหํ,
ปทุมุปฺปลจมฺปโก;
ปริสนฺโต สทา วาติ,
สรีโร จ ตเถว เม.
คุณตฺถวสฺส สพฺพนฺตํ,
ผลํ ตุ ปรมพฺภุตํ;
เอกคฺคมนสา สพฺเพ,
วณฺณยิสฺสํ สุณาถ เม.
คุณํ พุทฺธสฺส วตฺวาน,
หิตาย จ น สทิสํ;
สุขิโต โหมิ สพฺพตฺถ,
สํโฆ วีรสมายุโต.
ยสสฺสี สุขิโต กนฺโต,
ชุติมา ปิยทสฺสโน;
วตฺตา อปริภูโต จ,
นิทฺโทโส ปญฺญวา ตถา.
ขีเณ อายุสิ นิพฺพานํ,
สุลภํ พุทฺธภตฺติโน;
เตสํ เหตุํ ปวกฺขามิ,
ตํ สุณาถ ยถาตถํ.
สนฺตํ ยสํ ภควโต,
วิธินา อภิวาทยํ;
ตตฺถ ตตฺถูปปนฺโนปิ,
ยสสฺสี เตน โหมหํ.
ทุกฺขสฺสนฺตกรํ พุทฺธํ,
ธมฺมํ สนฺตมสงฺขตํ;
วณฺณยํ สุขโท อาสิํ,
สตฺตานํ สุขิโต ตโต.
คุณํ วทนฺโต พุทฺธสฺส,
พุทฺธปีติสมายุโต;
สกนฺติํ ปรกนฺติญฺจ,
ชนยิํ เตน กนฺติมา.
ชิโน เต ติตฺถิกากิณฺเณ,
อภิภุยฺย กุติตฺถิเย;
คุณํ วทนฺโต โชเตสิํ,
นายกํ ชุติมา ตโต.
ปิยการี ชนสฺสาปิ,
สมฺพุทฺธสฺส คุณํ วทํ;
สรโทว สสงฺโกหํ,
เตนาสิํ ปิยทสฺสโน.
ยถาสตฺติวเสนาหํ,
สพฺพวาจาหิ สนฺถวิํ;
สุคตํ เตน วาคิโส,
วิจิตฺตปฏิภานวา.
เย พาลา วิมติํ ปตฺตา,
ปริโภนฺติ มหามุนิํ;
นิคฺคหิํ เต สทฺธมฺเมน,
ปริภูโต น เตนหํ.
พุทฺธวณฺเณน สตฺตานํ,
กิเลเส อปเนสหํ;
นิกฺกิเลสมโน โหมิ,
ตสฺส กมฺมสฺส วาหสา.
โสตูนํ วุทฺธิมชนิํ,
พุทฺธานุสฺสติเทสโก;
เตนาหมาสิํ สปฺปญฺโญ,
นิปุณตฺถวิปสฺสโก.
สพฺพาสวปริกฺขีโณ,
ติณฺณสํสารสาคโร;
สิขีว อนุปาทาโน,
ปาปุณิสฺสามิ นิพฺพุติํ.
อิมสฺมิํเยว กปฺปสฺมิํ,_
ยมหํ สนฺถวิํ ชินํ;
ทุคฺคติํ นาภิชานามิ,
พุทฺธวณฺณสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (5575)
อิตฺถํ สุทํ อายสฺมา สุคนฺโธ เถโร อิมา คาถาโย อภาสิตฺถาติ.
สุคนฺธตฺเถรสฺสาปทานํ ทสมํ.
ติณทายกวคฺโค เตปญฺญาสโม.
ตสฺสุทฺทานํ
ติณโท มญฺจโท เจว,
สรณพฺภญฺชนปฺปโท;
สุปโฏ ทณฺฑทายี จ,
เนลปูชี ตเถว จ.
โพธิสมฺมชฺชโก มณฺโฑ,
สุคนฺโธ ทสโมติ จ;
คาถาสตํ สเตวีสํ,
คณิตญฺเจตฺถ สพฺพโส.