54.1 มหากจฺจายนตฺเถรอปทาน
“ปทุมุตฺตโร นาม ชิโน,
อเนโช อชิตํ ชโย;
สตสหเสฺส กปฺปานํ,
อิโต อุปฺปชฺชิ นายโก._
วีโร กมลปตฺตกฺโข,
สสงฺกวิมลานโน;
กนกาจลสงฺกาโส,
รวิทิตฺติสมปฺปโภ.
สตฺตเนตฺตมโนหารี,
วรลกฺขณภูสิโต;
สพฺพวากฺยปถาตีโต,
มนุชามรสกฺกโต.
สมฺพุทฺโธ โพธยํ สตฺเต,
วาคีโส มธุรสฺสโร;
กรุณานิพนฺธสนฺตาโน,
ปริสาสุ วิสารโท.
เทเสติ มธุรํ ธมฺมํ,
จตุสจฺจูปสํหิตํ;
นิมุคฺเค โมหปงฺกมฺหิ,
สมุทฺธรติ ปาณิเน.
ตทา เอกจโร หุตฺวา,
ตาปโส หิมวาลโย;
นภสา มานุสํ โลกํ,
คจฺฉนฺโต ชินมทฺทสํ.
อุเปจฺจ สนฺติกํ ตสฺส,_
อสฺโสสิํ ธมฺมเทสนํ;
วณฺณยนฺตสฺส วีรสฺส,
สาวกสฺส มหาคุณํ.
‘สํขิตฺเตน มยา วุตฺตํ,
วิตฺถาเรน ปกาสยํ;
ปริสํ มญฺจ โตเสติ,
ยถา กจฺจายโน อยํ.
นาหํ เอวมิเธกจฺจํ,
อญฺญํ ปสฺสามิ สาวกํ;
ตสฺมาตทคฺเค เอสคฺโค,
เอวํ ธาเรถ ภิกฺขโว’.
ตทาหํ วิมฺหิโต หุตฺวา,
สุตฺวา วากฺยํ มโนรมํ;
หิมวนฺตํ คมิตฺวาน,
อาหิตฺวา ปุปฺผสญฺจยํ.
ปูเชตฺวา โลกสรณํ,
ตํ ฐานมภิปตฺถยิํ;
ตทา มมาสยํ ญตฺวา,
พฺยากาสิ ส รณญฺชโห.
‘ปสฺสเถตํ อิสิวรํ,
นิทฺธนฺตกนกตฺตจํ;
อุทฺธคฺคโลมํ ปีณํสํ,_
อจลํ ปญฺชลิํ ฐิตํ.
หาสํ สุปุณฺณนยนํ,
พุทฺธวณฺณคตาสยํ;
ธมฺมชํ อุคฺคหทยํ,
อมตาสิตฺตสนฺนิภํ’.
กจฺจานสฺส คุณํ สุตฺวา,
ตํ ฐานํ ปตฺถยํ ฐิโต;
อนาคตมฺหิ อทฺธาเน,
โคตมสฺส มหามุเน.
ตสฺส ธมฺเมสุ ทายาโท,
โอรโส ธมฺมนิมฺมิโต;
กจฺจาโน นาม นาเมน,
เหสฺสติ สตฺถุ สาวโก.
พหุสฺสุโต มหาญาณี,
อธิปฺปายวิทู มุเน;
ปาปุณิสฺสติ ตํ ฐานํ,
ยถายํ พฺยากโต มยา.
สตสหสฺสิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
พุทฺธปูชายิทํ ผลํ.
ทุเว ภเว สํสรามิ,
เทวตฺเต อถ มานุเส;
อญฺญํ คติํ น คจฺฉามิ,
พุทฺธปูชายิทํ ผลํ.
ทุเว กุเล ปชายามิ,
ขตฺติเย อถ พฺราหฺมเณ;
นีเจ กุเล น ชายามิ,
พุทฺธปูชายิทํ ผลํ.
ปจฺฉิเม จ ภเว ทานิ,
ชาโต อุชฺเชนิยํ ปุเร;
ปชฺโชตสฺส จ จณฺฑสฺส,
ปุโรหิตทิชาธิโน.
ปุตฺโต ติริฏิวจฺฉสฺส,
นิปุโณ เวทปารคู;
มาตา จ จนฺทิมา นาม,
กจฺจาโนหํ วรตฺตโจ.
วีมํสนตฺถํ พุทฺธสฺส,
ภูมิปาเลน เปสิโต;
ทิสฺวา โมกฺขปุรทฺวารํ,
นายกํ คุณสญฺจยํ.
สุตฺวา จ วิมลํ วากฺยํ,
คติปงฺกวิโสสนํ;
ปาปุณิํ อมตํ สนฺตํ,
เสเสหิ สห สตฺตหิ.
อธิปฺปายวิทู ชาโต,
สุคตสฺส มหามเต;
ฐปิโต เอตทคฺเค จ,
สุสมิทฺธมโนรโถ.
กิเลสา ฌาปิตา มยฺหํ,
ภวา สพฺเพ สมูหตา;
นาโคว พนฺธนํ เฉตฺวา,
วิหรามิ อนาสโว.
สฺวาคตํ วต เม อาสิ,
มม พุทฺธสฺส สนฺติเก;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา มหากจฺจายโน เถโร อิมา คาถาโย อภาสิตฺถาติ.
มหากจฺจายนตฺเถรสฺสาปทานํ ปฐมํ.