54.2 วกฺกลิตฺเถรอปทาน
“อิโต สตสหสฺสมฺหิ,
กปฺเป อุปฺปชฺชิ นายโก;
อโนมนาโม อมิโต,
นาเมน ปทุมุตฺตโร.
ปทุมาการวทโน,
ปทุมามลสุจฺฉวี;
โลเกนานุปลิตฺโตว,
โตเยน ปทุมํ ยถา.
วีโร ปทุมปตฺตกฺโข,
กนฺโต จ ปทุมํ ยถา;
ปทุมุตฺตรคนฺโธว,
ตสฺมา โส ปทุมุตฺตโร.
โลกเชฏฺโฐ จ นิมฺมาโน,
อนฺธานํ นยนูปโม;
สนฺตเวโส คุณนิธิ,
กรุณามติสาคโร.
ส กทาจิ มหาวีโร,
พฺรหฺมาสุรสุรจฺจิโต;
สเทวมนุชากิณฺเณ,
ชนมชฺเฌ ชินุตฺตโม.
วทเนน สุคนฺเธน,
มธุเรน รุเตน จ;
รญฺชยํ ปริสํ สพฺพํ,
สนฺถวี สาวกํ สกํ.
สทฺธาธิมุตฺโต สุมติ,
มม ทสฺสนลาลโส;
นตฺถิ เอตาทิโส อญฺโญ,
ยถายํ ภิกฺขุ วกฺกลิ.
ตทาหํ หํสวติยํ,
นคเร พฺราหฺมณตฺรโช;
หุตฺวา สุตฺวา จ ตํ วากฺยํ,
ตํ ฐานมภิโรจยิํ.
สสาวกํ ตํ วิมลํ,
นิมนฺเตตฺวา ตถาคตํ;
สตฺตาหํ โภชยิตฺวาน,
ทุเสฺสหจฺฉาทยิํ ตทา.
นิปจฺจ สิรสา ตสฺส,
อนนฺตคุณสาคเร;
นิมุคฺโค ปีติสมฺปุณฺโณ,
อิทํ วจนมพฺรวิํ._
‘โย โส ตยา สนฺถวิโต,
อิโต สตฺตมเก มุนิ;_
ภิกฺขุ สทฺธาวตํ อคฺโค,
ตาทิโส โหมหํ มุเน’.
เอวํ วุตฺเต, มหาวีโร,
อนาวรณทสฺสโน;
อิมํ วากฺยํ อุทีเรสิ,_
ปริสาย มหามุนิ.
‘ปสฺสเถตํ มาณวกํ,
ปีตมฏฺฐนิวาสนํ;
เหมยญฺโญปจิตงฺคํ,
ชนเนตฺตมโนหรํ.
เอโส อนาคตทฺธาเน,
โคตมสฺส มเหสิโน;
อคฺโค สทฺธาธิมุตฺตานํ,
สาวโกยํ ภวิสฺสติ.
เทวภูโต มนุโสฺส วา,
สพฺพสนฺตาปวชฺชิโต;
สพฺพโภคปริพฺยูโฬฺห,
สุขิโต สํสริสฺสติ.
สตสหสฺสิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
วกฺกลิ นาม นาเมน,
เหสฺสติ สตฺถุ สาวโก’.
เตน กมฺมวิเสเสน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
สพฺพตฺถ สุขิโต หุตฺวา,
สํสรนฺโต ภวาภเว;
สาวตฺถิยํ ปุเร ชาโต,
กุเล อญฺญตเร อหํ.
โนนีตสุขุมาลํ มํ,
ชาตปลฺลวโกมลํ;
มนฺทํ อุตฺตานสยนํ,
ปิสาจีภยตชฺชิตา.
ปาทมูเล มเหสิสฺส,
สาเยสุํ ทีนมานสา;
‘อิมํ ททาม เต นาถ,
สรณํ โหหิ นายก’.
ตทา ปฏิคฺคหิ โส มํ,
ภีตานํ สรโณ มุนิ;
ชาลินา จกฺกงฺกิเตน,
มุทุโกมลปาณินา.
ตทา ปภุติ เตนาหํ,
อรกฺเขเยฺยน รกฺขิโต;
สพฺพเวรวินิมุตฺโต,
สุเขน ปริวุทฺธิโต.
สุคเตน วินา ภูโต,
อุกฺกณฺฐามิ มุหุตฺตกํ;_
ชาติยา สตฺตวโสฺสหํ,
ปพฺพชิํ อนคาริยํ.
สพฺพปารมิสมฺภูตํ,
นีลกฺขินยนํ วรํ;
รูปํ สพฺพสุภากิณฺณํ,
อติตฺโต วิหรามหํ.
พุทฺธรูปรติํ ญตฺวา,
ตทา โอวทิ มํ ชิโน;
‘อลํ วกฺกลิ กิํ รูเป,
รมเส พาลนนฺทิเต.
โย หิ ปสฺสติ สทฺธมฺมํ,
โส มํ ปสฺสติ ปณฺฑิโต;
อปสฺสมาโน สทฺธมฺมํ,
มํ ปสฺสมฺปิ น ปสฺสติ.
อนนฺตาทีนโว กาโย,
วิสรุกฺขสมูปโม;
อาวาโส สพฺพโรคานํ,
ปุญฺโช ทุกฺขสฺส เกวโล.
นิพฺพินฺทิย ตโต รูเป,
ขนฺธานํ อุทยพฺพยํ;
ปสฺส อุปกฺกิเลสานํ,
สุเขนนฺตํ คมิสฺสสิ’.
เอวํ เตนานุสิฏฺโฐหํ,
นายเกน หิเตสินา;
คิชฺฌกูฏํ สมารุยฺห,
ฌายามิ คิริกนฺทเร.
ฐิโต ปพฺพตปาทมฺหิ,
อสฺสาสยิ มหามุนิ;
วกฺกลีติ ชิโน วาจํ,
ตํ สุตฺวา มุทิโต อหํ.
ปกฺขนฺทิํ เสลปพฺภาเร,
อเนกสตโปริเส;
ตทา พุทฺธานุภาเวน,
สุเขเนว มหิํ คโต.
ปุโนปิ ธมฺมํ เทเสติ,
ขนฺธานํ อุทยพฺพยํ;
ตมหํ ธมฺมมญฺญาย,
อรหตฺตมปาปุณิํ.
สุมหาปริสมชฺเฌ,
ตทา มํ จรณนฺตโค;
อคฺคํ สทฺธาธิมุตฺตานํ,
ปญฺญเปสิ มหามติ.
สตสหสฺสิโต กปฺเป,
ยํ กมฺมมกริํ ตทา;
ทุคฺคติํ นาภิชานามิ,
พุทฺธปูชายิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา วกฺกลิตฺเถโร อิมา คาถาโย อภาสิตฺถาติ.
วกฺกลิตฺเถรสฺสาปทานํ ทุติยํ.