55.3 สีวลิตฺเถรอปทาน
“ปทุมุตฺตโร นาม ชิโน,
สพฺพธมฺเมสุ จกฺขุมา;
อิโต สตสหสฺสมฺหิ,_
กปฺเป อุปฺปชฺชิ นายโก.
สีลํ ตสฺส อสงฺเขยฺยํ,
สมาธิ วชิรูปโม;
อสงฺเขยฺยํ ญาณวรํ,
วิมุตฺติ จ อโนปมา.
มนุชามรนาคานํ,
พฺรหฺมานญฺจ สมาคเม;
สมณพฺราหฺมณากิณฺเณ,
ธมฺมํ เทเสสิ นายโก.
สสาวกํ มหาลาภิํ,
ปุญฺญวนฺตํ ชุตินฺธรํ;
ฐเปสิ เอตทคฺคมฺหิ,
ปริสาสุ วิสารโท.
ตทาหํ ขตฺติโย อาสิํ,
นคเร หํสสวฺหเย;
สุตฺวา ชินสฺส ตํ วากฺยํ,
สาวกสฺส คุณํ พหุํ.
นิมนฺตยิตฺวา สตฺตาหํ,
โภชยิตฺวา สสาวกํ;
มหาทานํ ททิตฺวาน,
ตํ ฐานมภิปตฺถยิํ.
ตทา มํ วินตํ ปาเท,
ทิสฺวาน ปุริสาสโภ;
สเรน มหตา วีโร,
อิทํ วจนมพฺรวิ._
‘ตโต ชินสฺส วจนํ,
โสตุกามา มหาชนา;
เทวทานวคนฺธพฺพา,
พฺรหฺมาโน จ มหิทฺธิกา’.
สมณพฺราหฺมณา เจว,
นมสฺสิํสุ กตญฺชลี;
‘นโม เต ปุริสาชญฺญ,
นโม เต ปุริสุตฺตม.
ขตฺติเยน มหาทานํ,
ทินฺนํ สตฺตาหิกมฺปิ โว;
โสตุกามา ผลํ ตสฺส,
พฺยากโรหิ มหามุเน’.
ตโต อโวจ ภควา,
‘สุณาถ มม ภาสิตํ;
อปฺปเมยฺยมฺหิ พุทฺธมฺหิ,
สสํฆมฺหิ ปติฏฺฐิตา.
ทกฺขิณา ตาย โก วตฺตา,
อปฺปเมยฺยผลา หิ สา;
อปิ เจ ส มหาโภโค,
ฐานํ ปตฺเถติ อุตฺตมํ.
ลาภี วิปุลลาภานํ,
ยถา ภิกฺขุ สุทสฺสโน;
ตถาหมฺปิ ภเวยฺยนฺติ,
ลจฺฉเส ตํ อนาคเต.
สตสหสฺสิโต กปฺเป,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สีวลิ นาม นาเมน,
เหสฺสติ สตฺถุ สาวโก’.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสูปโค อหํ.
เอกนวุติโต กปฺเป,
วิปสฺสี โลกนายโก;
อุปฺปชฺชิ จารุทสฺสโน,_
สพฺพธมฺมวิปสฺสโก.
ตทาหํ พนฺธุมติยํ,
กุลสฺสญฺญตรสฺส จ;
ทยิโต ปสฺสิโต เจว,
อาสิํ กมฺมนฺตวาวโฏ.
ตทา อญฺญตโร ปูโค,
วิปสฺสิสฺส มเหสิโน;
ปริเวสํ อการยิ,
มหนฺตมติวิสฺสุตํ.
นิฏฺฐิเต จ มหาทาเน,
ททุํ ขชฺชกสญฺหิตํ;
นวํ ทธิํ มธุญฺเจว,
วิจินํ เนว อทฺทสุํ.
ตทาหํ ตํ คเหตฺวาน,
นวํ ทธิํ มธุมฺปิ จ;
กมฺมสฺสามิฆรํ คจฺฉิํ,
ตเมสนฺตา มมทฺทสุํ.
สหสฺสมปิ ทตฺวาน,
นาลภิํสุ จ ตํ ทฺวยํ;
ตโตหํ เอวํ จินฺเตสิํ,
‘เนตํ เหสฺสติ โอรกํ.
ยถา อิเม ชนา สพฺเพ,
สกฺกโรนฺติ ตถาคตํ;
อหมฺปิ การํ กสฺสามิ,
สสํเฆ โลกนายเก’.
ตทาหเมวํ จินฺเตตฺวา,
ทธิํ มธุญฺจ เอกโต;
มทฺทิตฺวา โลกนาถสฺส,
สสํฆสฺส อทาสหํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสมคจฺฉหํ.
ปุนาหํ พาราณสิยํ,
ราชา หุตฺวา มหายโส;
สตฺตุกสฺส ตทา ทุฏฺโฐ,
ทฺวารโรธมการยิํ.
ตทา ตปสฺสิโน รุทฺธา,
เอกาหํ รกฺขิตา อหุํ;
ตโต ตสฺส วิปาเกน,
ปาปติํ นิรยํ ภุสํ.
ปจฺฉิเม จ ภเว ทานิ,
ชาโตหํ โกลิเย ปุเร;
สุปฺปวาสา จ เม มาตา,
มหาลิ ลิจฺฉวี ปิตา.
ขตฺติเย ปุญฺญกมฺเมน,
ทฺวารโรธสฺส วาหสา;
สตฺต วสฺสานิ นิวสิํ,
มาตุกุจฺฉิมฺหิ ทุกฺขิโต.
สตฺตาหํ ทฺวารมูโฬฺหหํ,
มหาทุกฺขสมปฺปิโต;
มาตา เม ฉนฺททาเนน,
เอวํ อาสิ สุทุกฺขิตา.
สุวตฺถิโตหํ นิกฺขนฺโต,
พุทฺเธน อนุกมฺปิโต;
นิกฺขนฺตทิวเสเยว,
ปพฺพชิํ อนคาริยํ.
อุปชฺฌา สาริปุตฺโต เม,_
โมคฺคลฺลาโน มหิทฺธิโก;
เกเส โอโรปยนฺโต เม,
อนุสาสิ มหามติ.
เกเสสุ ฉิชฺชมาเนสุ,
อรหตฺตมปาปุณิํ;
เทวา นาคา มนุสฺสา จ,
ปจฺจเย อุปเนนฺติ เม.
ปทุมุตฺตรนาถญฺจ,
วิปสฺสิญฺจ วินายกํ;
ยํ ปูชยิํ ปมุทิโต,
ปจฺจเยหิ วิเสสโต.
ตโต เตสํ วิเสเสน,
กมฺมานํ วิปุลุตฺตมํ;
ลาภํ ลภามิ สพฺพตฺถ,
วเน คาเม ชเล ถเล.
เรวตํ ทสฺสนตฺถาย,
ยทา ยาติ วินายโก;
ติํสภิกฺขุสหเสฺสหิ,
สห โลกคฺคนายโก.
ตทา เทโวปณีเตหิ,
มมตฺถาย มหามติ;
ปจฺจเยหิ มหาวีโร,
สสํโฆ โลกนายโก.
อุปฏฺฐิโต มยา พุทฺโธ,_
คนฺตฺวา เรวตมทฺทส;
ตโต เชตวนํ คนฺตฺวา,
เอตทคฺเค ฐเปสิ มํ.
‘ลาภีนํ สีวลิ อคฺโค,
มม สิเสฺสสุ ภิกฺขโว’;
สพฺพโลกหิโต สตฺถา,
กิตฺตยี ปริสาสุ มํ.
กิเลสา ฌาปิตา มยฺหํ,
_ …เป… _
วิหรามิ อนาสโว.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา สีวลิเถโร อิมา คาถาโย อภาสิตฺถาติ.
สีวลิตฺเถรสฺสาปทานํ ตติยํ.