56.1 ยสตฺเถรอปทาน
“มหาสมุทฺทํ โอคฺคยฺห,
ภวนํ เม สุนิมฺมิตํ;
สุนิมฺมิตา โปกฺขรณี,
จกฺกวากูปกูชิตา.
มนฺทารเกหิ สญฺฉนฺนา,
ปทุมุปฺปลเกหิ จ;
นที จ สนฺทเต ตตฺถ,
สุปติตฺถา มโนรมา.
มจฺฉกจฺฉปสญฺฉนฺนา,
นานาทิชสโมตฺถฏา;
มยูรโกญฺจาภิรุทา,
โกกิลาทีหิ วคฺคุหิ.
ปาเรวตา รวิหํสา,
จกฺกวากา นทีจรา;
ติตฺติรา สาลิกา เจตฺถ,
ปาวกา ชีวํชีวกา.
หํสาโกญฺจาภินทิตา,
โกสิยา ปิงฺคลา พหู;
สตฺตรตนสมฺปนฺนา,
มณิมุตฺตปวาฬิกา.
สพฺเพ โสณฺณมยา รุกฺขา,
นานาขนฺธสเมริตา;
อุชฺโชเตนฺติ ทิวารตฺติํ,_
ภวนํ สพฺพกาลิกํ.
สฏฺฐิตุริยสหสฺสานิ,
สายํ ปาโต ปวชฺชเร;
โสฬสิตฺถิสหสฺสานิ,
ปริวาเรนฺติ มํ สทา.
อภินิกฺขมฺม ภวนา,
สุเมธํ โลกนายกํ;
ปสนฺนจิตฺโต สุมโน,
วนฺทยิํ ตํ มหายสํ.
สมฺพุทฺธํ อภิวาเทตฺวา,
สสํฆํ ตํ นิมนฺตยิํ;
อธิวาเสสิ โส ธีโร,
สุเมโธ โลกนายโก.
มม ธมฺมกถํ กตฺวา,
อุโยฺยเชสิ มหามุนิ;_
สมฺพุทฺธํ อภิวาเทตฺวา,
ภวนํ เม อุปาคมิํ.
อามนฺตยิํ ปริชนํ,
สพฺเพ สนฺนิปตุํ ตทา;
‘ปุพฺพณฺหสมยํ พุทฺโธ,
ภวนํ อาคมิสฺสติ.
ลาภา อมฺหํ สุลทฺธา โน,
เย วสาม ตวนฺติเก;
มยมฺปิ พุทฺธเสฏฺฐสฺส,
ปูชยิสฺสาม สตฺถุโน’.
อนฺนํ ปานํ ปฏฺฐเปตฺวา,
กาลํ อาโรจยิํ อหํ;
วสีสตสหเสฺสหิ,
อุเปสิ โลกนายโก._
ปญฺจงฺคิเกหิ ตุริเยหิ,
ปจฺจุคฺคมมกาสหํ;
สพฺพโสณฺณมเย ปีเฐ,
นิสีทิ ปุริสุตฺตโม.
อุปริจฺฉทนํ อาสิ,_
สพฺพโสณฺณมยํ ตทา;
พีชนีโย ปวายนฺติ,
ภิกฺขุสํฆํ อนุตฺตรํ.
ปหูเตนนฺนปาเนน,
ภิกฺขุสํฆํ อตปฺปยิํ;
ปจฺเจกทุสฺสยุคเล,
ภิกฺขุสํฆสฺสทาสหํ.
ยํ วเทติ สุเมโธ โส,
อาหุตีนํ ปฏิคฺคโห;
ภิกฺขุสํเฆ นิสีทิตฺวา,
อิมา คาถา อภาสถ._
‘โย มํ อนฺเนน ปาเนน,
สพฺเพ อิเม จ ตปฺปยิ;
ตมหํ กิตฺตยิสฺสามิ,
สุณาถ มม ภาสโต.
อฏฺฐารเส กปฺปสเต,
เทวโลเก รมิสฺสติ;
สหสฺสกฺขตฺตุํ ราชายํ,
จกฺกวตฺตี ภวิสฺสติ.
อุปคจฺฉติ ยํ โยนิํ,_
เทวตฺตํ อถ มานุสํ;
สพฺพโสณฺณมยํ ตสฺส,
ฉทนํ ธารยิสฺสติ.
ติํสกปฺปสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว.
ภิกฺขุสํเฆ นิสีทิตฺวา,
สีหนาทํ นทิสฺสติ;
จิตเก ฉตฺตํ ธาเรนฺติ,
เหฏฺฐา ฉตฺตมฺหิ ฑยฺหถ’.
สามญฺญํ เม อนุปฺปตฺตํ,
กิเลสา ฌาปิตา มยา;
มณฺฑเป รุกฺขมูเล วา,
สนฺตาโส เม น วิชฺชติ.
ติํสกปฺปสหสฺสมฺหิ,
ยํ ทานมททิํ ตทา;
ทุคฺคติํ นาภิชานามิ,
สพฺพทานสฺสิทํ ผลํ.
กิเลสา ฌาปิตา มยฺหํ,
ภวา สพฺเพ สมูหตา;
นาโคว พนฺธนํ เฉตฺวา,
วิหรามิ อนาสโว.
สฺวาคตํ วต เม อาสิ,
มม พุทฺธสฺส สนฺติเก;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ยโส เถโร อิมา คาถาโย อภาสิตฺถาติ.
ยสตฺเถรสฺสาปทานํ ปฐมํ.