6.10 อสนโพธิยตฺเถรอปทาน
“ชาติยา สตฺตวโสฺสหํ,
อทฺทสํ โลกนายกํ;
ปสนฺนจิตฺโต สุมโน,
อุปคจฺฉิํ นรุตฺตมํ._
ติสฺสสฺสาหํ ภควโต,
โลกเชฏฺฐสฺส ตาทิโน;
หฏฺโฐ หฏฺเฐน จิตฺเตน,
โรปยิํ โพธิมุตฺตมํ.
อสโน นามเธเยฺยน,
ธรณีรุหปาทโป;
ปญฺจวเสฺส ปริจริํ,
อสนํ โพธิมุตฺตมํ.
ปุปฺผิตํ ปาทปํ ทิสฺวา,
อพฺภุตํ โลมหํสนํ;
สกํ กมฺมํ ปกิตฺเตนฺโต,
พุทฺธเสฏฺฐํ อุปาคมิํ.
ติโสฺส ตทา โส สมฺพุทฺโธ,
สยมฺภู อคฺคปุคฺคโล;
ภิกฺขุสํเฆ นิสีทิตฺวา,
อิมา คาถา อภาสถ._
‘เยนายํ โรปิตา โพธิ,
พุทฺธปูชา จ สกฺกตา;
ตมหํ กิตฺตยิสฺสามิ,
สุณาถ มม ภาสโต.
ติํสกปฺปานิ เทเวสุ,
เทวรชฺชํ กริสฺสติ;
จตุสฏฺฐิ จกฺขตฺตุํ โส,
จกฺกวตฺตี ภวิสฺสติ.
ตุสิตา หิ จวิตฺวาน,
สุกฺกมูเลน โจทิโต;
ทฺเว สมฺปตฺตี อนุโภตฺวา,
มนุสฺสตฺเต รมิสฺสติ.
ปธานปหิตตฺโต โส,
อุปสนฺโต นิรูปธิ;_
สพฺพาสเว ปริญฺญาย,
นิพฺพายิสฺสตินาสโว’.
วิเวกมนุยุตฺโตหํ,
อุปสนฺโต นิรูปธิ;_
นาโคว พนฺธนํ เฉตฺวา,
วิหรามิ อนาสโว.
ทฺเวนวุเต อิโต กปฺเป,
โพธิํ โรเปสหํ ตทา;
ทุคฺคติํ นาภิชานามิ,
โพธิโรปสฺสิทํ ผลํ.
จตุสตฺตติโต กปฺเป,
ทณฺฑเสโนติ วิสฺสุโต;
สตฺตรตนสมฺปนฺโน,
จกฺกวตฺตี ตทา อหุํ.
เตสตฺตติมฺหิโต กปฺเป,
สตฺตาเหสุํ มหีปตี;
สมนฺตเนมินาเมน,
ราชาโน จกฺกวตฺติโน.
ปณฺณวีสติโต กปฺเป,
ปุณฺณโก นาม ขตฺติโย;
สตฺตรตนสมฺปนฺโน,
จกฺกวตฺตี มหพฺพโล.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”. (1338)
อิตฺถํ สุทํ อายสฺมา อสนโพธิโย เถโร อิมา คาถาโย อภาสิตฺถาติ.
อสนโพธิยตฺเถรสฺสาปทานํ ทสมํ.
พีชนิวคฺโค ฉฏฺโฐ.
ตสฺสุทฺทานํ
พีชนี สตรํสี จ,
สยโนทกิวาหิโย;
ปริวาโร ปทีปญฺจ,
ธโช ปทุมปูชโก;
โพธิ จ ทสโม วุตฺโต,
คาถา ทฺเวนวุติ ตถา.