6.2 สตรํสิตฺเถรอปทาน
“อุพฺพิทฺธํ เสลมารุยฺห,
นิสีทิ ปุริสุตฺตโม;
ปพฺพตสฺสาวิทูรมฺหิ,
พฺราหฺมโณ มนฺตปารคู.
อุปวิฏฺฐํ มหาวีรํ,_
เทวเทวํ นราสภํ;
อญฺชลิํ ปคฺคเหตฺวาน,
สนฺถวิํ โลกนายกํ.
‘เอส พุทฺโธ มหาวีโร,
วรธมฺมปฺปกาสโก;
ชลติ อคฺคิขนฺโธว,
ภิกฺขุสํฆปุรกฺขโต.
มหาสมุทฺโทวกฺขุพฺโภ,
อณฺณโวว ทุรุตฺตโร;
มิคราชาวสมฺภีโต,
ธมฺมํ เทเสติ จกฺขุมา’.
มม สงฺกปฺปมญฺญาย,
ปทุมุตฺตรนายโก;
ภิกฺขุสํเฆ ฐิโต สตฺถา,
อิมา คาถา อภาสถ._
‘เยนายํ อญฺชลี ทินฺโน,
พุทฺธเสฏฺโฐ จ โถมิโต;
ติํสกปฺปสหสฺสานิ,
เทวรชฺชํ กริสฺสติ.
กปฺปสตสหสฺสมฺหิ,
องฺคีรสสนามโก;
วิวฏฺฏจฺฉโท สมฺพุทฺโธ,
อุปฺปชฺชิสฺสติ ตาวเท._
ตสฺส ธมฺเมสุ ทายาโท,
โอรโส ธมฺมนิมฺมิโต;
สตรํสีติ นาเมน,
อรหา โส ภวิสฺสติ’.
ชาติยา สตฺตวโสฺสหํ,
ปพฺพชิํ อนคาริยํ;
สตรํสิมฺหิ นาเมน,
ปภา นิทฺธาวเต มม.
มณฺฑเป รุกฺขมูเล วา,
ฌายี ฌานรโต อหํ;
ธาเรมิ อนฺติมํ เทหํ,
สมฺมาสมฺพุทฺธสาสเน.
สฏฺฐิกปฺปสหสฺสมฺหิ,
จตุโร รามนามกา;
สตฺตรตนสมฺปนฺนา,
จกฺกวตฺตี มหพฺพลา.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา สตรํสิ เถโร อิมา คาถาโย อภาสิตฺถาติ.
สตรํสิตฺเถรสฺสาปทานํ ทุติยํ.