6.9 ปทุมตฺเถรอปทาน
“จตุสจฺจํ ปกาเสนฺโต,
วรธมฺมปฺปวตฺตโก;
วสฺสเต อมตํ วุฏฺฐิํ,
นิพฺพาเปนฺโต มหาชนํ.
สธชํ ปทุมํ คยฺห,
อฑฺฒโกเส ฐิโต อหํ;
ปทุมุตฺตรมุนิสฺส,
ปหฏฺโฐ อุกฺขิปิมมฺพเร.
อาคจฺฉนฺเต จ ปทุเม,
อพฺภุโต อาสิ ตาวเท;
มม สงฺกปฺปมญฺญาย,
ปคฺคณฺหิ วทตํ วโร.
กรเสฏฺเฐน ปคฺคยฺห,
ชลชํ ปุปฺผมุตฺตมํ;
ภิกฺขุสํเฆ ฐิโต สตฺถา,
อิมา คาถา อภาสถ._
‘เยนิทํ ปทุมํ ขิตฺตํ,
สพฺพญฺญุมฺหิ วินายเก;
ตมหํ กิตฺตยิสฺสามิ,
สุณาถ มม ภาสโต.
ติํสกปฺปานิ เทวินฺโท,
เทวรชฺชํ กริสฺสติ;
ปถพฺยา รชฺชํ สตฺตสตํ,
วสุธํ อาวสิสฺสติ.
ตตฺถ ปตฺตํ คเณตฺวาน,
จกฺกวตฺตี ภวิสฺสติ;
อากาสโต ปุปฺผวุฏฺฐิ,
อภิวสฺสิสฺสตี ตทา.
กปฺปสตสหสฺสมฺหิ,
โอกฺกากกุลสมฺภโว;
โคตโม นาม โคตฺเตน,
สตฺถา โลเก ภวิสฺสติ.
ตสฺส ธมฺเมสุ ทายาโท,
โอรโส ธมฺมนิมฺมิโต;
สพฺพาสเว ปริญฺญาย,
นิพฺพายิสฺสตินาสโว’.
นิกฺขมิตฺวาน กุจฺฉิมฺหา,
สมฺปชาโน ปติสฺสโต;
ชาติยา ปญฺจวโสฺสหํ,
อรหตฺตํ อปาปุณิํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อายสฺมา ปทุโม เถโร อิมา คาถาโย อภาสิตฺถาติ.
ปทุมตฺเถรสฺสาปทานํ นวมํ.