9.1 ติมิรปุปฺผิยตฺเถรอปทาน
“จนฺทภาคานทีตีเร,
อนุโสตํ วชามหํ;
นิสินฺนํ สมณํ ทิสฺวา,
วิปฺปสนฺนมนาวิลํ.
ตตฺถ จิตฺตํ ปสาเทตฺวา,
เอวํ จินฺเตสหํ ตทา;
ตารยิสฺสติ ติณฺโณยํ,
ทนฺโตยํ ทมยิสฺสติ.
อสฺสาสิสฺสติ อสฺสตฺโถ,
สนฺโต จ สมยิสฺสติ;
โมจยิสฺสติ มุตฺโต จ,
นิพฺพาเปสฺสติ นิพฺพุโต.
เอวาหํ จินฺตยิตฺวาน,
สิทฺธตฺถสฺส มเหสิโน;
คเหตฺวา ติมิรปุปฺผํ,
มตฺถเก โอกิริํ อหํ.
อญฺชลิํ ปคฺคเหตฺวาน,
กตฺวา จ นํ ปทกฺขิณํ;
วนฺทิตฺวา สตฺถุโน ปาเท,
ปกฺกามิํ อปรํ ทิสํ.
อจิรํ คตมตฺตํ มํ,
มิคราชา วิเหฐยิ;
ปปาตมนุคจฺฉนฺโต,
ตตฺเถว ปปติํ อหํ.
จตุนฺนวุติโต กปฺเป,
ยํ ปุปฺผมภิโรปยิํ;
ทุคฺคติํ นาภิชานามิ,
ปุปฺผปูชายิทํ ผลํ.
ฉปฺปญฺญาสมฺหิ กปฺปมฺหิ,
สตฺเตวาสุํ มหายสา;
สตฺตรตนสมฺปนฺนา,
จกฺกวตฺตี มหพฺพลา.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ อายสฺมา ติมิรปุปฺผิโย เถโร อิมา คาถาโย อภาสิตฺถาติ.
ติมิรปุปฺผิยตฺเถรสฺสาปทานํ ปฐมํ.