1.1 สุเมธาเถรีอปทาน
อถ เถริกาปทานานิ สุณาถ—
“ภควติ โกณาคมเน,
สํฆารามมฺหิ นวนิเวสนมฺหิ;
สขิโย ติโสฺส ชนิโย,
วิหารทานํ อทาสิมฺห.
ทสกฺขตฺตุํ สตกฺขตฺตุํ,
ทสสตกฺขตฺตุํ สตานญฺจ สตกฺขตฺตุํ;
เทเวสุ อุปปชฺชิมฺห,
โก วาโท มานุเส ภเว.
เทเว มหิทฺธิกา อหุมฺห,
มานุสกมฺหิ โก วาโท;
สตฺตรตนมเหสี,
อิตฺถิรตนํ อหํ ภวิํ._
อิธ สญฺจิตกุสลา,_
สุสมิทฺธกุลปฺปชา;
ธนญฺชานี จ เขมา จ,
อหมฺปิ จ ตโย ชนา.
อารามํ สุกตํ กตฺวา,
สพฺพาวยวมณฺฑิตํ;
พุทฺธปฺปมุขสํฆสฺส,
นิยฺยาเทตฺวา สโมทิตา.
ยตฺถ ยตฺถูปปชฺชามิ,
ตสฺส กมฺมสฺส วาหสา;
เทเวสุ อคฺคตํ ปตฺตา,
มนุเสฺสสุ ตเถว จ.
อิมสฺมิํเยว กปฺปมฺหิ,_
พฺรหฺมพนฺธุ มหายโส;
กสฺสโป นาม โคตฺเตน,
อุปฺปชฺชิ วทตํ วโร._
อุปฏฺฐาโก มเหสิสฺส,_
ตทา อาสิ นริสฺสโร;
กาสิราชา กิกี นาม,
พาราณสิปุรุตฺตเม.
ตสฺสาสุํ สตฺต ธีตโร,
ราชกญฺญา สุเขธิตา;
พุทฺโธปฏฺฐานนิรตา,
พฺรหฺมจริยํ จริํสุ ตา.
ตาสํ สหายิกา หุตฺวา,
สีเลสุ สุสมาหิตา;
ทตฺวา ทานานิ สกฺกจฺจํ,
อคาเรว วตํ จริํ.
เตน กมฺเมน สุกเตน,
เจตนาปณิธีหิ จ;
ชหิตฺวา มานุสํ เทหํ,
ตาวติํสูปคา อหํ.
ตโต จุตา ยามมคํ,
ตโตหํ ตุสิตํ คตา;
ตโต จ นิมฺมานรติํ,
วสวตฺติปุรํ ตโต.
ยตฺถ ยตฺถูปปชฺชามิ,
ปุญฺญกมฺมสโมหิตา;
ตตฺถ ตตฺเถว ราชูนํ,
มเหสิตฺตมการยิํ.
ตโต จุตา มนุสฺสตฺเต,
ราชูนํ จกฺกวตฺตินํ;
มณฺฑลีนญฺจ ราชูนํ,
มเหสิตฺตมการยิํ.
สมฺปตฺติมนุโภตฺวาน,
เทเวสุ มานุเสสุ จ;
สพฺพตฺถ สุขิตา หุตฺวา,
เนกชาตีสุ สํสริํ.
โส เหตุ จ โส ปภโว,
ตมฺมูลํ สาสเน ขมํ;
ปฐมํ ตํ สโมธานํ,
ตํ ธมฺมรตาย นิพฺพานํ.
กิเลสา ฌาปิตา มยฺหํ,
ภวา สพฺเพ สมูหตา;
นาคีว พนฺธนํ เฉตฺวา,
วิหรามิ อนาสวา.
สฺวาคตํ วต เม อาสิ,
พุทฺธเสฏฺฐสฺส สนฺติเก;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ.
ปฏิสมฺภิทา จตโสฺส,
วิโมกฺขาปิ จ อฏฺฐิเม;
ฉฬภิญฺญา สจฺฉิกตา,
กตํ พุทฺธสฺส สาสนํ”.
อิตฺถํ สุทํ สุเมธา ภิกฺขุนี อิมา คาถาโย อภาสิตฺถาติ.
สุเมธาเถริยาปทานํ ปฐมํ.