1.6 เอกปิณฺฑปาตทายิกาเถรีอปทาน
“นคเร พนฺธุมติยา,
พนฺธุมา นาม ขตฺติโย;
ตสฺส รญฺโญ อหุํ ภริยา,
เอกชฺฌํ จารยามหํ.
รโหคตา นิสีทิตฺวา,
เอวํ จินฺเตสหํ ตทา;
‘อาทาย คมนียํ หิ,
กุสลํ นตฺถิ เม กตํ.
มหาภิตาปํ กฏุกํ,
โฆรรูปํ สุทารุณํ;
นิรยํ นูน คจฺฉามิ,
เอตฺถ เม นตฺถิ สํสโย’.
ราชานํ อุปสงฺกมฺม,
อิทํ วจนมพฺรวิํ;_
‘เอกํ เม สมณํ เทหิ,
โภชยิสฺสามิ ขตฺติย’.
อทาสิ เม มหาราชา,
สมณํ ภาวิตินฺทฺริยํ;
ตสฺส ปตฺตํ คเหตฺวาน,
ปรมนฺเนน ปูรยิํ.
ปูรยิตฺวา ปรมนฺนํ,
คนฺธาเลปํ อกาสหํ;
ชาเลน ปิทหิตฺวาน,
วตฺถยุเคน ฉาทยิํ.
อารมฺมณํ มมํ เอตํ,
สรามิ ยาวชีวิหํ;
ตตฺถ จิตฺตํ ปสาเทตฺวา,
ตาวติํสมคจฺฉหํ.
ติํสานํ เทวราชูนํ,
มเหสิตฺตมการยิํ;
มนสา ปตฺถิตํ มยฺหํ,
นิพฺพตฺตติ ยถิจฺฉิตํ.
วีสานํ จกฺกวตฺตีนํ,
มเหสิตฺตมการยิํ;
โอจิตตฺตาว หุตฺวาน,
สํสรามิ ภเวสฺวหํ.
สพฺพพนฺธนมุตฺตาหํ,
อเปตา เม อุปาทิกา;
สพฺพาสวา ปริกฺขีณา,
นตฺถิ ทานิ ปุนพฺภโว.
เอกนวุติโต กปฺเป,
ยํ ทานมททิํ ตทา;
ทุคฺคติํ นาภิชานามิ,
ปิณฺฑปาตสฺสิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสวา.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ เอกปิณฺฑปาตทายิกา ภิกฺขุนี อิมา คาถาโย อภาสิตฺถาติ.
เอกปิณฺฑปาตทายิกาเถริยาปทานํ ฉฏฺฐํ.