1.8 สตฺตุปฺปลมาลิกาเถรีอปทาน
“นคเร อรุณวติยา,
อรุโณ นาม ขตฺติโย;
ตสฺส รญฺโญ อหุํ ภริยา,
วาริตํ วารยามหํ.
สตฺต มาลา คเหตฺวาน,
อุปฺปลา เทวคนฺธิกา;_
นิสชฺช ปาสาทวเร,
เอวํ จินฺเตสิ ตาวเท.
‘กิํ เม อิมาหิ มาลาหิ,
สิรสาโรปิตาหิ เม;
วรํ เม พุทฺธเสฏฺฐสฺส,
ญาณมฺหิ อภิโรปิตํ’.
สมฺพุทฺธํ ปฏิมาเนนฺตี,
ทฺวาราสนฺเน นิสีทหํ;
‘ยทา เอหิติ สมฺพุทฺโธ,
ปูชยิสฺสํ มหามุนิํ’.
กกุโธ วิลสนฺโตว,
มิคราชาว เกสรี;
ภิกฺขุสํเฆน สหิโต,
อาคจฺฉิ วีถิยา ชิโน.
พุทฺธสฺส รํสิํ ทิสฺวาน,
หฏฺฐา สํวิคฺคมานสา;
ทฺวารํ อวาปุริตฺวาน,
พุทฺธเสฏฺฐมปูชยิํ.
สตฺต อุปฺปลปุปฺผานิ,
ปริกิณฺณานิ อมฺพเร;
ฉทิํ กโรนฺโต พุทฺธสฺส,
มตฺถเก ธารยนฺติ เต.
อุทคฺคจิตฺตา สุมนา,_
เวทชาตา กตญฺชลี;
ตตฺถ จิตฺตํ ปสาเทตฺวา,
ตาวติํสมคจฺฉหํ.
มหาเนลสฺส ฉาทนํ,
ธาเรนฺติ มม มุทฺธนิ;
ทิพฺพคนฺธํ ปวายามิ,
สตฺตุปฺปลสฺสิทํ ผลํ.
กทาจิ นียมานาย,
ญาติสงฺเฆน เม ตทา;
ยาวตา ปริสา มยฺหํ,
มหาเนลํ ธรียติ.
สตฺตติเทวราชูนํ,
มเหสิตฺตมการยิํ;
สพฺพตฺถ อิสฺสรา หุตฺวา,
สํสรามิ ภวาภเว.
เตสฏฺฐิ จกฺกวตฺตีนํ,
มเหสิตฺตมการยิํ;
สพฺเพ มมนุวตฺตนฺติ,
อาเทยฺยวจนา อหุํ.
อุปฺปลเสฺสว เม วณฺโณ,_
คนฺโธ เจว ปวายติ;
ทุพฺพณฺณิยํ น ชานามิ,
พุทฺธปูชายิทํ ผลํ.
อิทฺธิปาเทสุ กุสลา,_
โพชฺฌงฺคภาวนารตา;
อภิญฺญาปารมิปฺปตฺตา,
พุทฺธปูชายิทํ ผลํ.
สติปฏฺฐานกุสลา,
สมาธิฌานโคจรา;
สมฺมปฺปธานมนุยุตฺตา,
พุทฺธปูชายิทํ ผลํ.
วีริยํ เม ธุรโธรยฺหํ,
โยคกฺเขมาธิวาหนํ;
สพฺพาสวา ปริกฺขีณา,
นตฺถิ ทานิ ปุนพฺภโว.
เอกติํเส อิโต กปฺเป,
ยํ ปุปฺผมภิปูชยิํ;
ทุคฺคติํ นาภิชานามิ,
พุทฺธปูชายิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสวา.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ สตฺตุปฺปลมาลิกา ภิกฺขุนี อิมา คาถาโย อภาสิตฺถาติ.
สตฺตุปฺปลมาลิกาเถริยาปทานํ อฏฺฐมํ.