2.6 นฬมาลิกาเถรีอปทาน
“จนฺทภาคานทีตีเร,
อโหสิํ กินฺนรี ตทา;
อทฺทสํ วิรชํ พุทฺธํ,
สยมฺภุํ อปราชิตํ.
ปสนฺนจิตฺตา สุมนา,
เวทชาตา กตญฺชลี;
นฬมาลํ คเหตฺวาน,
สยมฺภุํ อภิปูชยิํ.
เตน กมฺเมน สุกเตน,
เจตนาปณิธีหิ จ;
ชหิตฺวา กินฺนรีเทหํ,
ตาวติํสมคจฺฉหํ.
ฉตฺติํสเทวราชูนํ,
มเหสิตฺตมการยิํ;
มนสา ปตฺถิตํ มยฺหํ,
นิพฺพตฺตติ ยถิจฺฉิตํ.
ทสนฺนํ จกฺกวตฺตีนํ,
มเหสิตฺตมการยิํ;
โอจิตตฺตาว หุตฺวาน,
สํสรามิ ภเวสฺวหํ.
กุสลํ วิชฺชเต มยฺหํ,
ปพฺพชิํ อนคาริยํ;
ปูชารหา อหํ อชฺช,
สกฺยปุตฺตสฺส สาสเน.
วิสุทฺธมนสา อชฺช,
อเปตมนปาปิกา;
สพฺพาสวา ปริกฺขีณา,
นตฺถิ ทานิ ปุนพฺภโว.
จตุนฺนวุติโต กปฺเป,
ยํ พุทฺธมภิปูชยิํ;
ทุคฺคติํ นาภิชานามิ,
นฬมาลายิทํ ผลํ.
กิเลสา ฌาปิตา มยฺหํ,
_ …เป… _
วิหรามิ อนาสวา.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ นฬมาลิกา ภิกฺขุนี อิมา คาถาโย อภาสิตฺถาติ.
นฬมาลิกาเถริยาปทานํ ฉฏฺฐํ.