4.2 จตุราสีติภิกฺขุนีสหสฺสอปทาน
“จุลฺลาสีติสหสฺสานิ,
พฺราหฺมญฺญกุลสมฺภวา;
สุขุมาลหตฺถปาทา,
ปุเร ตุยฺหํ มหามุเน.
เวสฺสสุทฺทกุเล ชาตา,
เทวา นาคา จ กินฺนรา;
จาตุทฺทีปา พหู กญฺญา,
ปุเร ตุยฺหํ มหามุเน.
กาจิ ปพฺพชิตา อตฺถิ,
สพฺพทสฺสาวิโน พหู;
เทวา จ กินฺนรา นาคา,
ผุสิสฺสนฺติ อนาคเต.
อนุโภตฺวา ยสํ สพฺพํ,
ปตฺวาน สพฺพสมฺปทา;
ตุมฺหํ ปสาทํ ปฏิลทฺธา,
พุชฺฌิสฺสนฺติ อนาคเต.
อเมฺห พฺราหฺมณธีตา ตุ,
พฺราหฺมญฺญกุลสมฺภวา;
เปกฺขโต โน มหาวีร,
ปาเท วนฺทาม จกฺขุม.
อุปาหตา ภวา สพฺเพ,_
มูลตณฺหา สมูหตา;
สมุจฺฉินฺนา อนุสยา,
ปุญฺญสงฺขารทาลิตา.
สมาธิโคจรา สพฺพา,
สมาปตฺติวสี กตา;
ฌาเนน ธมฺมรติยา,
วิหริสฺสาม โน สทา.
ภวเนตฺติ อวิชฺชา จ,
สงฺขาราปิ จ เขปิตา;
สุทุทฺทสํ ปทํ คนฺตฺวา,
อนุชานาถ นายก”.
“อุปการา มมํ ตุมฺเห,
ทีฆรตฺตํ กตาวิโน;
จตุนฺนํ สํสยํ เฉตฺวา,
สพฺพา คจฺฉนฺตุ นิพฺพุติํ”.
วนฺทิตฺวา มุนิโน ปาเท,
กตฺวา อิทฺธิวิกุพฺพนํ;
กาจิ ทเสฺสนฺติ อาโลกํ,
อนฺธการมถาปรา.
ทเสฺสนฺติ จนฺทสูริเย,
สาครญฺจ สมจฺฉกํ;
สิเนรุํ ปริภณฺฑญฺจ,
ทเสฺสนฺติ ปาริฉตฺตกํ.
ตาวติํสญฺจ ภวนํ,
ยามํ ทเสฺสนฺติ อิทฺธิยา;
ตุสิตํ นิมฺมิเต เทเว,
วสวตฺตี มหิสฺสเร.
พฺรหฺมาโน กาจิ ทเสฺสนฺติ,
จงฺกมญฺจ มหารหํ;
พฺรหฺมวณฺณญฺจ มาเปตฺวา,
ธมฺมํ เทเสนฺติ สุญฺญตํ.
นานาวิกุพฺพนํ กตฺวา,
อิทฺธิํ ทสฺสิย สตฺถุโน;_
ทสฺสยิํสุ พลํ สพฺพา,
ปาเท วนฺทิํสุ สตฺถุโน.
“อิทฺธีสุ จ วสี โหม,
ทิพฺพาย โสตธาตุยา;
เจโตปริยญาณสฺส,
วสี โหม มหามุเน.
ปุพฺเพนิวาสํ ชานาม,
ทิพฺพจกฺขุ วิโสธิตํ;
สพฺพาสวา ปริกฺขีณา,
นตฺถิ ทานิ ปุนพฺภโว.
อตฺถธมฺมนิรุตฺตีสุ,
ปฏิภาเน ตเถว จ;
ญาณํ อมฺหํ มหาวีร,
อุปฺปนฺนํ ตว สนฺติเก._
ปุพฺพานํ โลกนาถานํ,
สงฺคมํ โน นิทสฺสิตํ;
อธิการํ พหุํ อมฺหํ,
ตุยฺหตฺถาย มหามุเน.
ยํ อเมฺหหิ กตํ กมฺมํ,
กุสลํ สร ตํ มุเน;
ตุยฺหตฺถาย มหาวีร,
ปุญฺญานุปจิตานิ โน.
สตสหสฺสิโต กปฺเป,
ปทุมุตฺตโร มหามุนิ;
ปุรํ หํสวตี นาม,
สมฺพุทฺธสฺส กุลาสยํ.
ทฺวาเรน หํสวติยา,
คงฺคา สนฺทติ สพฺพทา;
อุพฺพาฬฺหา นทิยา ภิกฺขู,_
คมนํ น ลภนฺติ เต.
ทิวสํ ทฺเว ตโย เจว,
สตฺตาหํ มาสิกํ ตโต;
จตุมาสมฺปิ สมฺปุณฺณํ,
คมนํ น ลภนฺติ เต.
ตทา อหุ สตฺตสาโร,
ชฏิโล นาม รฏฺฐิโก;
โอรุทฺเธ ภิกฺขโว ทิสฺวา,
เสตุํ คงฺคาย การยิ.
ตทา สตสหเสฺสหิ,
เสตุํ คงฺคาย การยิ;
สํฆสฺส โอริเม ตีเร,
วิหารญฺจ อการยิ.
อิตฺถิโย ปุริสา เจว,_
อุจฺจนีจกุลานิ จ;_
ตสฺส เสตุํ วิหารญฺจ,
สมภาคํ อกํสุ เต.
อเมฺห อญฺเญ จ มานุชา,
วิปฺปสนฺเนน เจตสา;
ตสฺส ธมฺเมสุ ทายาทา,
นคเร ชนปเทสุ จ.
อิตฺถี ปุมา กุมารา จ,_
พหู เจว กุมาริกา;
เสตุโน จ วิหารสฺส,
วาลุกา อากิริํสุ เต.
วีถิํ สมฺมชฺชนํ กตฺวา,
กทลีปุณฺณฆเฏ ธเช;
ธูปํ จุณฺณญฺจ มาลญฺจ,
การํ กตฺวาน สตฺถุโน.
เสตุวิหาเร กาเรตฺวา,
นิมนฺเตตฺวา วินายกํ;
มหาทานํ ททิตฺวาน,
สมฺโพธิํ อภิปตฺถยิํ.
ปทุมุตฺตโร มหาวีโร,
ตารโก สพฺพปาณินํ;
อนุโมทนียํกาสิ,
ชฏิลสฺส มหามุนิ.
‘สตสหสฺสาติกฺกนฺเต,
กปฺโป เหสฺสติ ภทฺทโก;
ภวาภเวนุโภตฺวาน,
ปาปุณิสฺสติ โพธิยํ.
กาจิ หตฺถปริกมฺมํ,
กตาวี นรนาริโย;
อนาคตมฺหิ อทฺธาเน,
สพฺพา เหสฺสนฺติ สมฺมุขา’.
เตน กมฺมวิปาเกน,
เจตนาปณิธีหิ จ;
อุปฺปนฺนา เทวภวนํ,_
ตุยฺหํ ตา ปริจาริกา.
ทิพฺพสุขํ อสงฺขิยํ,
มานุสญฺจ อสงฺขิยํ;
ตุยฺหํ เต ปริจาเรม,
สํสริมฺห ภวาภเว.
สตสหสฺสิโต กปฺเป,
สุกตํ กมฺมสมฺปทํ;
สุขุมาลี มนุสฺสานํ,
อโถ เทวปุเร วเร.
รูปโภคยเส เจว,
อโถ กิตฺติญฺจ สกฺกตํ;
ลภาม สตตํ สพฺพํ,
สุกตํ กมฺมสมฺปทํ.
ปจฺฉิเม ภเว สมฺปตฺเต,
ชาตามฺห พฺราหฺมเณ กุเล;
สุขุมาลหตฺถปาทา,
สกฺยปุตฺตนิเวสเน.
สพฺพกาลมฺปิ ปถวิํ,
น ปสฺสาม น ลงฺกตํ;
จิกฺขลฺลภูมิมสุจิํ,
น ปสฺสาม มหามุเน.
อคารํ วสนฺเต อเมฺห,
สกฺการํ สพฺพกาลิกํ;
อุปเนนฺติ สทา สพฺพํ,_
ปุพฺพกมฺมผเลน โน.
อคารํ ปชหิตฺวาน,
ปพฺพชิตฺวานคาริยํ;
สํสารปถนิตฺถิณฺณา,
วีตราคา ภวามเส.
จีวรํ ปิณฺฑปาตญฺจ,
ปจฺจยํ สยนาสนํ;
อุปเนนฺติ สทา อเมฺห,_
สหสฺสานิ ตโต ตโต.
กิเลสา ฌาปิตา อมฺหํ,
_ …เป… _
วิหราม อนาสวา.
สฺวาคตํ วต โน อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ จตุราสีติพฺราหฺมณกญฺญาภิกฺขุนีสหสฺสานิ ภควโต สมฺมุขา อิมา คาถาโย อภาสิตฺถาติ.
จตุราสีติภิกฺขุนีสหสฺสาปทานํ ทุติยํ.