4.6 อภิรูปนนฺทาเถรีอปทาน
“เอกนวุติโต กปฺเป,
วิปสฺสี นาม นายโก;
อุปฺปชฺชิ จารุทสฺสโน,_
สพฺพธมฺเมสุ จกฺขุมา.
ตทาหํ พนฺธุมติยํ,
อิทฺเธ ผีเต มหากุเล;_
ชาตา สุรูปา ทยิตา,
ปูชนียา ชนสฺส จ.
อุปคนฺตฺวา มหาวีรํ,_
วิปสฺสิํ โลกนายกํ;
ธมฺมํ สุณิตฺวา สรณํ,
อุเปสิํ นรนายกํ._
สีเลสุ สํวุตา หุตฺวา,
นิพฺพุเต จ นรุตฺตเม;
ธาตุถูปสฺส อุปริ,
โสณฺณจฺฉตฺตมปูชยิํ.
มุตฺตจาคา สีลวตี,
ยาวชีวํ ตโต จุตา;
ชหิตฺวา มานุสํ เทหํ,
ตาวติํสูปคา อหํ.
ตทา ทสหิ ฐาเนหิ,
อธิโภตฺวาน เสสเก;
รูปสทฺเทหิ คนฺเธหิ,
รเสหิ ผุสเนหิ จ.
อายุนาปิ จ วณฺเณน,
สุเขน ยสสาปิ จ;
ตเถวาธิปเตเยฺยน,
อธิคยฺห วิโรจหํ.
ปจฺฉิเม จ ภเว ทานิ,
ชาตาหํ กปิลวฺหเย;
ธีตา เขมกสกฺกสฺส,
นนฺทา นามาติ วิสฺสุตา.
อภิรูปสมฺปทมฺปิ,
อหุ เม กนฺติสูจกํ;
ยทาหํ โยพฺพนปฺปตฺตา,
รูปลาวญฺญภูสิตา.
ตทา มมตฺเถ สกฺยานํ,
วิวาโท สุมหา อหุ;
ปพฺพาเชสิ ตโต ตาโต,
‘มา สกฺยา วินสฺสิํสุ’ติ.
ปพฺพชิตฺวา ตถาคตํ,
รูปเทสฺสิํ นรุตฺตมํ;
สุตฺวาน โนปคจฺฉามิ,
มม รูเปน คพฺพิตา.
โอวาทมฺปิ น คจฺฉามิ,
พุทฺธทสฺสนภีรุตา;
ตทา ชิโน อุปาเยน,
อุปเนตฺวา สสนฺติกํ._
ติสฺสิตฺถิโย นิทเสฺสสิ,
อิทฺธิยา มคฺคโกวิโท;_
อจฺฉรารูปสทิสํ,
ตรุณิํ ชริตํ มตํ.
ตาโย ทิสฺวา สุสํวิคฺคา,
วิรตฺตาเส กเฬวเร;
อฏฺฐาสิํ ภวนิพฺพินฺทา,
ตทา มํ อาห นายโก.
‘อาตุรํ อสุจิํ ปูติํ,
ปสฺส นนฺเท สมุสฺสยํ;
อุคฺฆรนฺตํ ปคฺฆรนฺตํ,_
พาลานํ อภินนฺทิตํ.
อสุภาย จิตฺตํ ภาเวหิ,
เอกคฺคํ สุสมาหิตํ;
ยถา อิทํ ตถา เอตํ,
ยถา เอตํ ตถา อิทํ.
เอวเมตํ อเวกฺขนฺตี,
รตฺตินฺทิวมตนฺทิตา;
ตโต สกาย ปญฺญาย,
อภินิพฺพิชฺฌ วจฺฉสิ’.
ตสฺสา เม อปฺปมตฺตาย,
วิจรนฺติยา โยนิโส;
ยถาภูตํ อยํ กาโย,
ทิฏฺโฐ สนฺตรพาหิโร.
อถ นิพฺพินฺทหํ กาเย,
อชฺฌตฺตญฺจ วิรชฺชหํ;
อปฺปมตฺตา วิสํยุตฺตา,
อุปสนฺตามฺหิ นิพฺพุตา._
อิทฺธีสุ จ วสี โหมิ,_
ทิพฺพาย โสตธาตุยา;
เจโตปริยญาณสฺส,
วสี โหมิ มหามุเน.
ปุพฺเพนิวาสํ ชานามิ,
ทิพฺพจกฺขุ วิโสธิตํ;
สพฺพาสวา ปริกฺขีณา,
นตฺถิ ทานิ ปุนพฺภโว.
อตฺถธมฺมนิรุตฺตีสุ,
ปฏิภาเน ตเถว จ;
ญาณํ มม มหาวีร,
อุปฺปนฺนํ ตว สนฺติเก._
กิเลสา ฌาปิตา มยฺหํ,
_ …เป… _
วิหรามิ อนาสวา.
สฺวาคตํ วต เม อาสิ,
_ …เป… _
กตํ พุทฺธสฺส สาสนํ.
ปฏิสมฺภิทา จตโสฺส,
_ …เป… _
กตํ พุทฺธสฺส สาสนํ”.
อิตฺถํ สุทํ อภิรูปนนฺทา ภิกฺขุนี อิมา คาถาโย อภาสิตฺถาติ.
อภิรูปนนฺทาเถริยาปทานํ ฉฏฺฐํ.