18 สิทฺธตฺถพุทฺธวํส
“ธมฺมทสฺสิสฺส อปเรน,
สิทฺธตฺโถ นาม นายโก;
นิหนิตฺวา ตมํ สพฺพํ,
สูริโย อพฺภุคฺคโต ยถา.
โสปิ ปตฺวาน สมฺโพธิํ,
สนฺตาเรนฺโต สเทวกํ;
อภิวสฺสิ ธมฺมเมเฆน,
นิพฺพาเปนฺโต สเทวกํ.
ตสฺสาปิ อตุลเตชสฺส,
อเหสุํ อภิสมยา ตโย;
โกฏิสตสหสฺสานํ,
ปฐมาภิสมโย อหุ.
ปุนาปรํ ภีมรเถ,
ยทา อาหนิ ทุนฺทุภิํ;
ตทา นวุติโกฏีนํ,
ทุติยาภิสมโย อหุ.
ยทา พุทฺโธ ธมฺมํ เทเสสิ,
เวภาเร โส ปุรุตฺตเม;
ตทา นวุติโกฏีนํ,
ตติยาภิสมโย อหุ.
สนฺนิปาตา ตโย อาสุํ,
ตสฺมิมฺปิ ทฺวิปทุตฺตเม;
ขีณาสวานํ วิมลานํ,
สนฺตจิตฺตาน ตาทินํ.
โกฏิสตานํ นวุตีนํ,
อสีติยาปิ จ โกฏินํ;
เอเต อาสุํ ตโย ฐานา,
วิมลานํ สมาคเม.
อหํ เตน สมเยน,
มงฺคโล นาม ตาปโส;
อุคฺคเตโช ทุปฺปสโห,_
อภิญฺญาพลสมาหิโต.
ชมฺพุโต ผลมาเนตฺวา,
สิทฺธตฺถสฺส อทาสหํ;
ปฏิคฺคเหตฺวา สมฺพุทฺโธ,
อิทํ วจนมพฺรวิ._
‘ปสฺสถ อิมํ ตาปสํ,
ชฏิลํ อุคฺคตาปนํ;
จตุนฺนวุติโต กปฺเป,
อยํ พุทฺโธ ภวิสฺสติ.
ปธานํ ปทหิตฺวาน,
_ …เป… _
เหสฺสาม สมฺมุขา อิมํ’.
ตสฺสาปิ วจนํ สุตฺวา,
ภิโยฺย จิตฺตํ ปสาทยิํ;
อุตฺตริํ วตมธิฏฺฐาสิํ,_
ทสปารมิปูริยา.
เวภารํ นาม นครํ,
อุเทโน นาม ขตฺติโย;_
สุผสฺสา นาม ชนิกา,
สิทฺธตฺถสฺส มเหสิโน.
ทสวสฺสสหสฺสานิ,
อคารํ อชฺฌ โส วสิ;
โกกาสุปฺปลโกกนทา,
ตโย ปาสาทมุตฺตมา.
ติโสฬสสหสฺสานิ,
นาริโย สมลงฺกตา;
โสมนสฺสา นาม สา นารี,
อนูปโม นาม อตฺรโช.
นิมิตฺเต จตุโร ทิสฺวา,
สิวิกายาภินิกฺขมิ;
อนูนทสมาสานิ,
ปธานํ ปทหี ชิโน.
พฺรหฺมุนา ยาจิโต สนฺโต,
สิทฺธตฺโถ โลกนายโก;
วตฺติ จกฺกํ มหาวีโร,
มิคทาเย นรุตฺตโม.
สมฺพโล จ สุมิตฺโต จ,
อเหสุํ อคฺคสาวกา;
เรวโต นามุปฏฺฐาโก,
สิทฺธตฺถสฺส มเหสิโน.
สีวลา จ สุรามา จ,
อเหสุํ อคฺคสาวิกา;
โพธิ ตสฺส ภควโต,
กณิกาโรติ วุจฺจติ.
สุปฺปิโย จ สมุทฺโท จ,
อเหสุํ อคฺคุปฏฺฐกา;
รมฺมา เจว สุรมฺมา จ,
อเหสุํ อคฺคุปฏฺฐิกา.
โส พุทฺโธ สฏฺฐิรตนํ,
อโหสิ นภมุคฺคโต;
กญฺจนคฺฆิยสงฺกาโส,
ทสสหสฺสี วิโรจติ.
โสปิ พุทฺโธ อสมสโม,
อตุโล อปฺปฏิปุคฺคโล;
วสฺสสตสหสฺสานิ,
โลเก อฏฺฐาสิ จกฺขุมา.
วิปุลํ ปภํ ทสฺสยิตฺวา,
ปุปฺผาเปตฺวาน สาวเก;
วิลาเสตฺวา สมาปตฺยา,
นิพฺพุโต โส สสาวโก.
สิทฺธตฺโถ มุนิวโร พุทฺโธ,
อโนมารามมฺหิ นิพฺพุโต;
ตตฺเถวสฺส ถูปวโร,
จตุโยชนมุคฺคโต”ติ. (753)
สิทฺธตฺถสฺส ภควโต วํโส โสฬสโม.