28 พุทฺธปกิณฺณกกณฺฑ
อปริเมยฺยิโต กปฺเป,
จตุโร อาสุํ วินายกา;
ตณฺหงฺกโร เมธงฺกโร,
อโถปิ สรณงฺกโร;
ทีปงฺกโร จ สมฺพุทฺโธ,
เอกกปฺปมฺหิ เต ชินา.
ทีปงฺกรสฺส อปเรน,
โกณฺฑญฺโญ นาม นายโก;
เอโกว เอกกปฺปมฺหิ,
ตาเรสิ ชนตํ พหุํ.
ทีปงฺกรสฺส ภควโต,
โกณฺฑญฺญสฺส จ สตฺถุโน;
เอเตสํ อนฺตรา กปฺปา,
คณนาโต อสงฺขิยา.
โกณฺฑญฺญสฺส อปเรน,
มงฺคโล นาม นายโก;
เตสมฺปิ อนฺตรา กปฺปา,
คณนาโต อสงฺขิยา.
มงฺคโล จ สุมโน จ,
เรวโต โสภิโต มุนิ;
เตปิ พุทฺธา เอกกปฺเป,
จกฺขุมนฺโต ปภงฺกรา.
โสภิตสฺส อปเรน,
อโนมทสฺสี มหายโส;
เตสมฺปิ อนฺตรา กปฺปา,
คณนาโต อสงฺขิยา.
อโนมทสฺสี ปทุโม,
นารโท จาปิ นายโก;
เตปิ พุทฺธา เอกกปฺเป,
ตมนฺตการกา มุนี.
นารทสฺส อปเรน,
ปทุมุตฺตโร นาม นายโก;
เอกกปฺปมฺหิ อุปฺปนฺโน,
ตาเรสิ ชนตํ พหุํ.
นารทสฺส ภควโต,
ปทุมุตฺตรสฺส สตฺถุโน;
เตสมฺปิ อนฺตรา กปฺปา,
คณนาโต อสงฺขิยา.
กปฺปสตสหสฺสมฺหิ,
เอโก อาสิ มหามุนิ;
ปทุมุตฺตโร โลกวิทู,
อาหุตีนํ ปฏิคฺคโห.
ติํสกปฺปสหสฺสมฺหิ,
ทุเว อาสุํ วินายกา;
สุเมโธ จ สุชาโต จ,
โอรโต ปทุมุตฺตรา.
อฏฺฐารเส กปฺปสเต,
ตโย อาสุํ วินายกา;
ปิยทสฺสี อตฺถทสฺสี,
ธมฺมทสฺสี จ นายกา.
โอรโต จ สุชาตสฺส,
สมฺพุทฺธา ทฺวิปทุตฺตมา;
เอกกปฺปมฺหิ เต พุทฺธา,
โลเก อปฺปฏิปุคฺคลา.
จตุนฺนวุติโต กปฺเป,
เอโก อาสิ มหามุนิ;
สิทฺธตฺโถ โส โลกวิทู,
สลฺลกตฺโต อนุตฺตโร.
ทฺเวนวุเต อิโต กปฺเป,
ทุเว อาสุํ วินายกา;
ติโสฺส ผุโสฺส จ สมฺพุทฺธา,
อสมา อปฺปฏิปุคฺคลา.
เอกนวุติโต กปฺเป,
วิปสฺสี นาม นายโก;
โสปิ พุทฺโธ การุณิโก,
สตฺเต โมเจสิ พนฺธนา.
เอกติํเส อิโต กปฺเป,
ทุเว อาสุํ วินายกา;
สิขี จ เวสฺสภู เจว,
อสมา อปฺปฏิปุคฺคลา.
อิมมฺหิ ภทฺทเก กปฺเป,_
ตโย อาสุํ วินายกา;
กกุสนฺโธ โกณาคมโน,
กสฺสโป จาปิ นายโก.
อหเมตรหิ สมฺพุทฺโธ,
เมตฺเตโยฺย จาปิ เหสฺสติ;
เอเตปิเม ปญฺจ พุทฺธา,
ธีรา โลกานุกมฺปกา.
เอเตสํ ธมฺมราชูนํ,
อญฺเญสํเนกโกฏินํ;
อาจิกฺขิตฺวาน ตํ มคฺคํ,
นิพฺพุตา เต สสาวกาติ. (1052)
พุทฺธปกิณฺณกกณฺฑํ นิฏฺฐิตํ.