29 ธาตุภาชนียกถา
มหาโคตโม ชินวโร,
กุสินารมฺหิ นิพฺพุโต;
ธาตุวิตฺถาริกํ อาสิ,
เตสุ เตสุ ปเทสโต.
เอโก อชาตสตฺตุสฺส,
เอโก เวสาลิยา ปุเร;
เอโก กปิลวตฺถุสฺมิํ,
เอโก จ อลฺลกปฺปเก.
เอโก จ รามคามมฺหิ,
เอโก จ เวฐทีปเก;
เอโก ปาเวยฺยเก มเลฺล,
เอโก จ โกสินารเก.
กุมฺภสฺส ถูปํ กาเรสิ,
พฺราหฺมโณ โทณสวฺหโย;
องฺคารถูปํ กาเรสุํ,
โมริยา ตุฏฺฐมานสา.
อฏฺฐ สารีริกา ถูปา,
นวโม กุมฺภเจติโย;
องฺคารถูโป ทสโม,
ตทาเยว ปติฏฺฐิโต.
อุณฺหีสํ จตโสฺส ทาฐา,_
อกฺขกา ทฺเว จ ธาตุโย;
อสมฺภินฺนา อิมา สตฺต,
เสสา ภินฺนาว ธาตุโย.
มหนฺตา มุคฺคมตฺตา จ,
มชฺฌิมา ภินฺนตณฺฑุลา;
ขุทฺทกา สาสปมตฺตา จ,
นานาวณฺณา จ ธาตุโย.
มหนฺตา สุวณฺณวณฺณา จ,
มุตฺตวณฺณา จ มชฺฌิมา;
ขุทฺทกา มกุลวณฺณา จ,
โสฬสโทณมตฺติกา.
มหนฺตา ปญฺจ นาฬิโย,
นาฬิโย ปญฺจ มชฺฌิมา;
ขุทฺทกา ฉ นาฬี เจว,
เอตา สพฺพาปิ ธาตุโย.
อุณฺหีสํ สีหเฬ ทีเป,_
พฺรหฺมโลเก จ วามกํ;
สีหเฬ ทกฺขิณกฺขญฺจ,
สพฺพาเปตา ปติฏฺฐิตา.
เอกา ทาฐา ติทสปุเร,
เอกา นาคปุเร อหุ;
เอกา คนฺธารวิสเย,
เอกา กลิงฺคราชิโน.
จตฺตาลีสสมา ทนฺตา,
เกสา โลมา จ สพฺพโส;
เทวา หริํสุ เอเกกํ,
จกฺกวาฬปรมฺปรา.
วชิรายํ ภควโต,
ปตฺโต ทณฺฑญฺจ จีวรํ;
นิวาสนํ กุลฆเร,
ปจฺจตฺถรณํ กปิลวฺหเย.
ปาฏลิปุตฺตปุรมฺหิ,
กรณํ กายพนฺธนํ;
จมฺปายุทกสาฏิยํ,
อุณฺณโลมญฺจ โกสเล._
กาสาวํ พฺรหฺมโลเก จ,
เวฐนํ ติทเส ปุเร;
นิสีทนํ อวนฺตีสุ,
รฏฺเฐ อตฺถรณํ ตทา.
อรณี จ มิถิลายํ,
วิเทเห ปริสาวนํ;
วาสิ สูจิฆรญฺจาปิ,
อินฺทปตฺถปุเร ตทา._
ปริกฺขารา อวเสสา,
ชนปเท อปรนฺตเก;
ปริภุตฺตานิ มุนินา,
อกํสุ มนุชา ตทา.
ธาตุวิตฺถาริกํ อาสิ,
โคตมสฺส มเหสิโน;
ปาณีนํ อนุกมฺปาย,
อหุ โปราณิกํ ตทาติ. (1070)