3 ทีปงฺกรพุทฺธวํส
“ตทา เต โภชยิตฺวาน,
สสํฆํ โลกนายกํ;
อุปคจฺฉุํ สรณํ ตสฺส,_
ทีปงฺกรสฺส สตฺถุโน.
สรณาคมเน กญฺจิ,
นิเวเสสิ ตถาคโต;
กญฺจิ ปญฺจสุ สีเลสุ,
สีเล ทสวิเธ ปรํ.
กสฺสจิ เทติ สามญฺญํ,
จตุโร ผลมุตฺตเม;
กสฺสจิ อสเม ธมฺเม,
เทติ โส ปฏิสมฺภิทา.
กสฺสจิ วรสมาปตฺติโย,
อฏฺฐ เทติ นราสโภ;
ติโสฺส กสฺสจิ วิชฺชาโย,
ฉฬภิญฺญา ปเวจฺฉติ.
เตน โยเคน ชนกายํ,
โอวทติ มหามุนิ;
เตน วิตฺถาริกํ อาสิ,
โลกนาถสฺส สาสนํ.
มหาหนุสภกฺขนฺโธ,
ทีปงฺกรสฺส นามโก;
พหู ชเน ตารยติ,
ปริโมเจติ ทุคฺคติํ.
โพธเนยฺยํ ชนํ ทิสฺวา,
สตสหเสฺสปิ โยชเน;
ขเณน อุปคนฺตฺวาน,
โพเธติ ตํ มหามุนิ.
ปฐมาภิสมเย พุทฺโธ,
โกฏิสตมโพธยิ;
ทุติยาภิสมเย นาโถ,
นวุติโกฏิมโพธยิ.
ยทา จ เทวภวนมฺหิ,
พุทฺโธ ธมฺมมเทสยิ;
นวุติโกฏิสหสฺสานํ,
ตติยาภิสมโย อหุ.
สนฺนิปาตา ตโย อาสุํ,
ทีปงฺกรสฺส สตฺถุโน;
โกฏิสตสหสฺสานํ,
ปฐโม อาสิ สมาคโม.
ปุน นารทกูฏมฺหิ,
ปวิเวกคเต ชิเน;
ขีณาสวา วีตมลา,
สมิํสุ สตโกฏิโย.
ยมฺหิ กาเล มหาวีโร,
สุทสฺสนสิลุจฺจเย;
นวโกฏิสหเสฺสหิ,
ปวาเรสิ มหามุนิ.
ทสวีสสหสฺสานํ,
ธมฺมาภิสมโย อหุ;
เอกทฺวินฺนํ อภิสมยา,
คณนาโต อสงฺขิยา.
วิตฺถาริกํ พาหุชญฺญํ,
อิทฺธํ ผีตํ อหู ตทา;_
ทีปงฺกรสฺส ภควโต,
สาสนํ สุวิโสธิตํ.
จตฺตาริ สตสหสฺสานิ,
ฉฬภิญฺญา มหิทฺธิกา;
ทีปงฺกรํ โลกวิทุํ,
ปริวาเรนฺติ สพฺพทา.
เย เกจิ เตน สมเยน,
ชหนฺติ มานุสํ ภวํ;
อปตฺตมานสา เสขา,
ครหิตา ภวนฺติ เต.
สุปุปฺผิตํ ปาวจนํ,
อรหนฺเตหิ ตาทิหิ;
ขีณาสเวหิ วิมเลหิ,
อุปโสภติ สพฺพทา._
นครํ รมฺมวตี นาม,
สุเทโว นาม ขตฺติโย;
สุเมธา นาม ชนิกา,
ทีปงฺกรสฺส สตฺถุโน.
ทสวสฺสสหสฺสานิ,
อคารํ อชฺฌ โส วสิ;
หํสา โกญฺจา มยูรา จ,
ตโย ปาสาทมุตฺตมา.
ตีณิ สตสหสฺสานิ,
นาริโย สมลงฺกตา;
ปทุมา นาม สา นารี,
อุสภกฺขนฺโธ อตฺรโช._
นิมิตฺเต จตุโร ทิสฺวา,
หตฺถิยาเนน นิกฺขมิ;
อนูนทสมาสานิ,
ปธาเน ปทหี ชิโน.
ปธานจารํ จริตฺวาน,
อพุชฺฌิ มานสํ มุนิ;
พฺรหฺมุนา ยาจิโต สนฺโต,
ทีปงฺกโร มหามุนิ.
วตฺติ จกฺกํ มหาวีโร,
นนฺทาราเม สิรีฆเร;
นิสินฺโน สิรีสมูลมฺหิ,
อกา ติตฺถิยมทฺทนํ.
สุมงฺคโล จ ติโสฺส จ,
อเหสุํ อคฺคสาวกา;
สาคโต นามุปฏฺฐาโก,
ทีปงฺกรสฺส สตฺถุโน.
นนฺทา เจว สุนนฺทา จ,
อเหสุํ อคฺคสาวิกา;
โพธิ ตสฺส ภควโต,
ปิปฺผลีติ ปวุจฺจติ.
ตปุสฺสภลฺลิกา นาม,
อเหสุํ อคฺคุปฏฺฐกา;
สิริมา โกณา อุปฏฺฐิกา,
ทีปงฺกรสฺส สตฺถุโน.
อสีติหตฺถมุพฺเพโธ,
ทีปงฺกโร มหามุนิ;
โสภติ ทีปรุกฺโขว,
สาลราชาว ผุลฺลิโต.
สตสหสฺสวสฺสานิ,
อายุ ตสฺส มเหสิโน;
ตาวตา ติฏฺฐมาโน โส,
ตาเรสิ ชนตํ พหุํ.
โชตยิตฺวาน สทฺธมฺมํ,
สนฺตาเรตฺวา มหาชนํ;
ชลิตฺวา อคฺคิกฺขนฺโธว,
นิพฺพุโต โส สสาวโก.
สา จ อิทฺธิ โส จ ยโส,
ตานิ จ ปาเทสุ จกฺกรตนานิ;
สพฺพํ ตมนฺตรหิตํ,
นนุ ริตฺตา สพฺพสงฺขารา.
ทีปงฺกโร ชิโน สตฺถา,
นนฺทารามมฺหิ นิพฺพุโต;
ตตฺเถวสฺส ชินถูโป,
ฉตฺติํสุพฺเพธโยชโน”ติ. (299)
ทีปงฺกรสฺส ภควโต วํโส ปฐโม.