26.40 เทวหิตพฺราหฺมณวตฺถุ
ปุพฺเพนิวาสํ โย เวทิ,
สคฺคาปายญฺจ ปสฺสติ;
อโถ ชาติกฺขยํ ปตฺโต,
อภิญฺญาโวสิโต มุนิ;
สพฺพโวสิตโวสานํ,
ตมหํ พฺรูมิ พฺราหฺมณํ.
พฺราหฺมณวคฺโค ฉพฺพีสติโม.
เอตฺตาวตา สพฺพปฐเม ยมกวคฺเค จุทฺทส วตฺถูนิ, อปฺปมาทวคฺเค นว, จิตฺตวคฺเค นว, ปุปฺผวคฺเค ทฺวาทส, พาลวคฺเค ปนฺนรส, ปณฺฑิตวคฺเค เอกาทส, อรหนฺตวคฺเค ทส, สหสฺสวคฺเค จุทฺทส, ปาปวคฺเค ทฺวาทส, ทณฺฑวคฺเค เอกาทส, ชราวคฺเค นว, อตฺตวคฺเค ทส, โลกวคฺเค เอกาทส, พุทฺธวคฺเค นว, สุขวคฺเค อฏฺฐ, ปิยวคฺเค นว, โกธวคฺเค อฏฺฐ, มลวคฺเค ทฺวาทส, ธมฺมฏฺฐวคฺเค ทส, มคฺควคฺเค ทฺวาทส, ปกิณฺณกวคฺเค นว, นิรยวคฺเค นว, นาควคฺเค อฏฺฐ, ตณฺหาวคฺเค ทฺวาทส, ภิกฺขุวคฺเค ทฺวาทส, พฺราหฺมณวคฺเค จตฺตาลีสาติ ปญฺจาธิกานิ ตีณิ วตฺถุสตานิ.
สเตวีสจตุสฺสตา,
จตุสจฺจวิภาวินา;
สตตฺตยญฺจ วตฺถูนํ,
ปญฺจาธิกํ สมุฏฺฐิตาติ.
ธมฺมปเท วคฺคานมุทฺทานํ
ยมกปฺปมาโท จิตฺตํ,
ปุปฺผํ พาเลน ปณฺฑิโต;
อรหนฺโต สหสฺสญฺจ,
ปาปํ ทณฺเฑน เต ทส.
ชรา อตฺตา จ โลโก จ,
พุทฺโธ สุขํ ปิเยน จ;
โกโธ มลญฺจ ธมฺมฏฺโฐ,
มคฺควคฺเคน วีสติ.
ปกิณฺณํ นิรโย นาโค,
ตณฺหา ภิกฺขุ จ พฺราหฺมโณ;
เอเต ฉพฺพีสติ วคฺคา,
เทสิตาทิจฺจพนฺธุนา.
คาถานมุทฺทานํ
ยมเก วีสติ คาถา,
อปฺปมาทมฺหิ ทฺวาทส;
เอกาทส จิตฺตวคฺเค,
ปุปฺผวคฺคมฺหิ โสฬส.
พาเล จ โสฬส คาถา,
ปณฺฑิตมฺหิ จตุทฺทส;
อรหนฺเต ทส คาถา,
สหเสฺส โหนฺติ โสฬส.
เตรส ปาปวคฺคมฺหิ,
ทณฺฑมฺหิ ทส สตฺต จ;
เอกาทส ชรา วคฺเค,
อตฺตวคฺคมฺหิ ตา ทส.
ทฺวาทส โลกวคฺคมฺหิ,
พุทฺธวคฺคมฺหิ ฐารส;
สุเข จ ปิยวคฺเค จ,
คาถาโย โหนฺติ ทฺวาทส.
จุทฺทส โกธวคฺคมฺหิ,
มลวคฺเคกวีสติ;
สตฺตรส จ ธมฺมฏฺเฐ,
มคฺควคฺเค สตฺตรส.
ปกิณฺเณ โสฬส คาถา,
นิรเย นาเค จ จุทฺทส;
ฉพฺพีส ตณฺหาวคฺคมฺหิ,
เตวีส ภิกฺขุวคฺคิกา.
เอกตาลีสคาถาโย,
พฺราหฺมเณ วคฺคมุตฺตเม;
คาถาสตานิ จตฺตาริ,
เตวีส จ ปุนาปเร;
ธมฺมปเท นิปาตมฺหิ,
เทสิตาทิจฺจพนฺธุนาติ.
ธมฺมปทปาฬิ สมตฺตา.