6.2.7 สิงฺฆปุปฺผชาตก
116.
1451
“ยเมตํ วาริชํ ปุปฺผํ,
อทินฺนํ อุปสิงฺฆสิ;
เอกงฺคเมตํ เถยฺยานํ,
คนฺธเถโนสิ มาริส”.
117.
1452
“น หรามิ น ภญฺชามิ,
อารา สิงฺฆามิ วาริชํ;
อถ เกน นุ วณฺเณน,
คนฺธเถโนติ วุจฺจติ.
118.
1453
โยยํ ภิสานิ ขณติ,
ปุณฺฑรีกานิ ภญฺชติ;
เอวํ อากิณฺณกมฺมนฺโต,
กสฺมา เอโส น วุจฺจติ”.
119.
1454
“อากิณฺณลุทฺโท ปุริโส,
ธาติเจลํว มกฺขิโต;
ตสฺมิํ เม วจนํ นตฺถิ,
ตญฺจารหามิ วตฺตเว.
120.
1455
อนงฺคณสฺส โปสสฺส,
นิจฺจํ สุจิคเวสิโน;
วาลคฺคมตฺตํ ปาปสฺส,
อพฺภามตฺตํว ขายติ”.
121.
1456
“อทฺธา มํ ยกฺข ชานาสิ,
อโถ มํ อนุกมฺปสิ;
ปุนปิ ยกฺข วชฺชาสิ,
ยทา ปสฺสสิ เอทิสํ”.
122.
1457
“เนว ตํ อุปชีวามิ,
นปิ เต ภตกามฺหเส;
ตฺวเมว ภิกฺขุ ชาเนยฺย,
เยน คจฺเฉยฺย สุคฺคตินฺ”ติ.
1458
สิงฺฆปุปฺผชาตกํ สตฺตมํ.