7.1.4 มาตุโปสกคิชฺฌชาตก
22.
1509
“เต กถํ นุ กริสฺสนฺติ,
วุทฺธา คิริทรีสยา;
อหํ พทฺโธสฺมิ ปาเสน,
นิลียสฺส วสํ คโต”.
23.
1510
“กิํ คิชฺฌ ปริเทวสิ,
กา นุ เต ปริเทวนา;
น เม สุโต วา ทิฏฺโฐ วา,
ภาสนฺโต มานุสิํ ทิโช”.
24.
1511
“ภรามิ มาตาปิตโร,
วุทฺเธ คิริทรีสเย;
เต กถํ นุ กริสฺสนฺติ,
อหํ วสํ คโต ตว”.
25.
1512
“ยนฺนุ คิชฺโฌ โยชนสตํ,
กุณปานิ อเวกฺขติ;
กสฺมา ชาลญฺจ ปาสญฺจ,
อาสชฺชาปิ น พุชฺฌสิ”.
26.
1513
“ยทา ปราภโว โหติ,
โปโส ชีวิตสงฺขเย;
อถ ชาลญฺจ ปาสญฺจ,
อาสชฺชาปิ น พุชฺฌติ”.
27.
1514
“ภรสฺสุ มาตาปิตโร,
วุทฺเธ คิริทรีสเย;
มยา ตฺวํ สมนุญฺญาโต,
โสตฺถิํ ปสฺสาหิ ญาตเก”.
28.
1515
“เอวํ ลุทฺทก นนฺทสฺสุ,
สห สพฺเพหิ ญาติภิ;
ภริสฺสํ มาตาปิตโร,
วุทฺเธ คิริทรีสเย”ติ.
1516
มาตุโปสกคิชฺฌชาตกํ จตุตฺถํ.