7.1.5 ทพฺภปุปฺผชาตก
“อนุตีรจารี ภทฺทนฺเต,
สหายมนุธาว มํ;
มหา เม คหิโต มจฺโฉ,
โส มํ หรติ เวคสา”.
“คมฺภีรจารี ภทฺทนฺเต,
ทฬฺหํ คณฺหาหิ ถามสา;
อหํ ตํ อุทฺธริสฺสามิ,
สุปณฺโณ อุรคามิว”.
“วิวาโท โน สมุปฺปนฺโน,
ทพฺภปุปฺผ สุโณหิ เม;
สเมหิ เมธคํ สมฺม,
วิวาโท วูปสมฺมตํ”.
“ธมฺมฏฺโฐหํ ปุเร อาสิํ,
พหู อฑฺฑา เม ตีริตา;
สเมมิ เมธคํ สมฺม,
วิวาโท วูปสมฺมตํ.
อนุตีรจาริ นงฺคุฏฺฐํ,
สีสํ คมฺภีรจาริโน;
อจฺจายํ มชฺฌิโม ขณฺโฑ,
ธมฺมฏฺฐสฺส ภวิสฺสติ”.
“จิรมฺปิ ภกฺโข อภวิสฺส,
สเจ น วิวเทมเส;
อสีสกํ อนงฺคุฏฺฐํ,
สิงฺคาโล หรติ โรหิตํ”.
“ยถาปิ ราชา นนฺเทยฺย,
รชฺชํ ลทฺธาน ขตฺติโย;
เอวาหมชฺช นนฺทามิ,
ทิสฺวา ปุณฺณมุขํ ปติํ.
กถํ นุ ถลโช สนฺโต,
อุทเก มจฺฉํ ปรามสิ;_
ปุฏฺโฐ เม สมฺม อกฺขาหิ,
กถํ อธิคตํ ตยา”.
“วิวาเทน กิสา โหนฺติ,
วิวาเทน ธนกฺขยา;
ชีนา อุทฺทา วิวาเทน,
ภุญฺช มายาวิ โรหิตํ.
เอวเมว มนุเสฺสสุ,
วิวาโท ยตฺถ ชายติ;
ธมฺมฏฺฐํ ปฏิธาวนฺติ,
โส หิ เนสํ วินายโก;
ธนาปิ ตตฺถ ชียนฺติ,
ราชโกโส ปวฑฺฒตี”ติ.
ทพฺภปุปฺผชาตกํ ปญฺจมํ.