7.1.6 ปณฺณกชาตก
“ปณฺณกํ ติขิณธารํ,
อสิํ สมฺปนฺนปายินํ;
ปริสายํ ปุริโส คิลติ,
กิํ ทุกฺกรตรํ ตโต;
ยทญฺญํ ทุกฺกรํ ฐานํ,
ตํ เม อกฺขาหิ ปุจฺฉิโต”.
“คิเลยฺย ปุริโส โลภา,
อสิํ สมฺปนฺนปายินํ;
โย จ วชฺชา ททามีติ,
ตํ ทุกฺกรตรํ ตโต;
สพฺพญฺญํ สุกรํ ฐานํ,
เอวํ ชานาหิ มทฺทว”.
“พฺยากาสิ อายุโร ปญฺหํ,
อตฺถํ ธมฺมสฺส โกวิโท;
ปุกฺกุสํ ทานิ ปุจฺฉามิ,
กิํ ทุกฺกรตรํ ตโต;
ยทญฺญํ ทุกฺกรํ ฐานํ,
ตํ เม อกฺขาหิ ปุจฺฉิโต”.
“น วาจมุปชีวนฺติ,
อผลํ คิรมุทีริตํ;
โย จ ทตฺวา อวากยิรา,
ตํ ทุกฺกรตรํ ตโต;
สพฺพญฺญํ สุกรํ ฐานํ,
เอวํ ชานาหิ มทฺทว”.
“พฺยากาสิ ปุกฺกุโส ปญฺหํ,
อตฺถํ ธมฺมสฺส โกวิโท;
เสนกํ ทานิ ปุจฺฉามิ,
กิํ ทุกฺกรตรํ ตโต;
ยทญฺญํ ทุกฺกรํ ฐานํ,
ตํ เม อกฺขาหิ ปุจฺฉิโต”.
“ทเทยฺย ปุริโส ทานํ,
อปฺปํ วา ยทิ วา พหุํ;
โย จ ทตฺวา นานุตปฺเป,
ตํ ทุกฺกรตรํ ตโต;
สพฺพญฺญํ สุกรํ ฐานํ,
เอวํ ชานาหิ มทฺทว”.
“พฺยากาสิ อายุโร ปญฺหํ,
อโถ ปุกฺกุสโปริโส;
สพฺเพ ปเญฺห อติโภติ,
ยถา ภาสติ เสนโก”ติ.
ปณฺณกชาตกํ ฉฏฺฐํ.