7.2.1 คนฺธารชาตก
76.
1572
“หิตฺวา คามสหสฺสานิ,
ปริปุณฺณานิ โสฬส;
โกฏฺฐาคารานิ ผีตานิ,
สนฺนิธิํ ทานิ กุพฺพสิ”.
77.
1573
“หิตฺวา คนฺธารวิสยํ,
ปหูตธนธาริยํ;
ปสาสนโต นิกฺขนฺโต,
อิธ ทานิ ปสาสสิ”._
78.
1574
“ธมฺมํ ภณามิ เวเทห,
อธมฺโม เม น รุจฺจติ;
ธมฺมํ เม ภณมานสฺส,
น ปาปมุปลิมฺปติ”.
79.
1575
“เยน เกนจิ วณฺเณน,
ปโร ลภติ รุปฺปนํ;
มหตฺถิยมฺปิ เจ วาจํ,
น ตํ ภาเสยฺย ปณฺฑิโต”.
80.
1576
“กามํ รุปฺปตุ วา มา วา,
ภุสํว วิกิรียตุ;
ธมฺมํ เม ภณมานสฺส,
น ปาปมุปลิมฺปติ”.
81.
1577
“โน เจ อสฺส สกา พุทฺธิ,
วินโย วา สุสิกฺขิโต;
วเน อนฺธมหิํโสว,
จเรยฺย พหุโก ชโน.
82.
1578
ยสฺมา จ ปนิเธกจฺเจ,
อาเจรมฺหิ สุสิกฺขิตา;
ตสฺมา วินีตวินยา,
จรนฺติ สุสมาหิตา”ติ.
1579
คนฺธารชาตกํ ปฐมํ.