7.2.6 สุสีมชาตก
114.
1615
“กาฬานิ เกสานิ ปุเร อเหสุํ,
ชาตานิ สีสมฺหิ ยถาปเทเส;
ตานชฺช เสตานิ สุสีม ทิสฺวา,
ธมฺมํ จร พฺรหฺมจริยสฺส กาโล”.
115.
1616
“มเมว เทว ปลิตํ น ตุยฺหํ,
มเมว สีสํ มม อุตฺตมงฺคํ;
‘อตฺถํ กริสฺสนฺ’ติ มุสา อภาณิํ,
เอกาปราธํ ขม ราชเสฏฺฐ.
116.
1617
ทหโร ตุวํ ทสฺสนิโยสิ ราช,
ปฐมุคฺคโต โหสิ ยถา กฬีโร;
รชฺชญฺจ กาเรหิ มมญฺจ ปสฺส,
มา กาลิกํ อนุธาวี ชนินฺท”.
117.
1618
“ปสฺสามิ โวหํ ทหริํ กุมาริํ,
สามฏฺฐปสฺสํ สุตนุํ สุมชฺฌํ;
กาฬปฺปวาฬาว ปเวลฺลมานา,
ปโลภยนฺตีว นเรสุ คจฺฉติ.
118.
1619
ตเมน ปสฺสามิปเรน นาริํ,
อาสีติกํ นาวุติกํ ว ชจฺจา;
ทณฺฑํ คเหตฺวาน ปเวธมานํ,
โคปานสีโภคฺคสมํ จรนฺติํ.
119.
1620
โสหํ ตเมวานุวิจินฺตยนฺโต,
เอโก สยามิ สยนสฺส มชฺเฌ;
‘อหมฺปิ เอวํ’ อิติ เปกฺขมาโน,
น คเห รเม พฺรหฺมจริยสฺส กาโล.
120.
1621
รชฺชุวาลมฺพนี เจสา,
ยา เคเห วสโต รติ;
เอวมฺปิ เฉตฺวาน วชนฺติ ธีรา,
อนเปกฺขิโน กามสุขํ ปหายา”ติ.
1622
สุสีมชาตกํ ฉฏฺฐํ.