6 รตนสุตฺต
ยานีธ ภูตานิ สมาคตานิ,
ภุมฺมานิ วา ยานิ ว อนฺตลิกฺเข;
สพฺเพว ภูตา สุมนา ภวนฺตุ,
อโถปิ สกฺกจฺจ สุณนฺตุ ภาสิตํ.
ตสฺมา หิ ภูตา นิสาเมถ สพฺเพ,
เมตฺตํ กโรถ มานุสิยา ปชาย;
ทิวา จ รตฺโต จ หรนฺติ เย พลิํ,
ตสฺมา หิ เน รกฺขถ อปฺปมตฺตา.
ยํ กิญฺจิ วิตฺตํ อิธ วา หุรํ วา,
สคฺเคสุ วา ยํ รตนํ ปณีตํ;
น โน สมํ อตฺถิ ตถาคเตน,
อิทมฺปิ พุทฺเธ รตนํ ปณีตํ;_
เอเตน สจฺเจน สุวตฺถิ โหตุ.
ขยํ วิราคํ อมตํ ปณีตํ,
ยทชฺฌคา สกฺยมุนี สมาหิโต;
น เตน ธมฺเมน สมตฺถิ กิญฺจิ,
อิทมฺปิ ธมฺเม รตนํ ปณีตํ;_
เอเตน สจฺเจน สุวตฺถิ โหตุ.
ยํ พุทฺธเสฏฺโฐ ปริวณฺณยี สุจิํ,
สมาธิมานนฺตริกญฺญมาหุ;
สมาธินา เตน สโม น วิชฺชติ,
อิทมฺปิ ธมฺเม รตนํ ปณีตํ;_
เอเตน สจฺเจน สุวตฺถิ โหตุ.
เย ปุคฺคลา อฏฺฐ สตํ ปสตฺถา,
จตฺตาริ เอตานิ ยุคานิ โหนฺติ;
เต ทกฺขิเณยฺยา สุคตสฺส สาวกา,
เอเตสุ ทินฺนานิ มหปฺผลานิ;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
เย สุปฺปยุตฺตา มนสา ทเฬฺหน,
นิกฺกามิโน โคตมสาสนมฺหิ;
เต ปตฺติปตฺตา อมตํ วิคยฺห,
ลทฺธา มุธา นิพฺพุติํ ภุญฺชมานา;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
ยถินฺทขีโล ปถวิสฺสิโต สิยา,
จตุพฺภิ วาเตหิ อสมฺปกมฺปิโย;
ตถูปมํ สปฺปุริสํ วทามิ,
โย อริยสจฺจานิ อเวจฺจ ปสฺสติ;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
เย อริยสจฺจานิ วิภาวยนฺติ,
คมฺภีรปญฺเญน สุเทสิตานิ;
กิญฺจาปิ เต โหนฺติ ภุสํ ปมตฺตา,
น เต ภวํ อฏฺฐมมาทิยนฺติ;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
สหาวสฺส ทสฺสนสมฺปทาย,
ตยสฺสุ ธมฺมา ชหิตา ภวนฺติ;
สกฺกายทิฏฺฐี วิจิกิจฺฉิตญฺจ,
สีลพฺพตํ วาปิ ยทตฺถิ กิญฺจิ.
จตูหปาเยหิ จ วิปฺปมุตฺโต,
ฉจฺจาภิฐานานิ อภพฺพ กาตุํ;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
กิญฺจาปิ โส กมฺม กโรติ ปาปกํ,
กาเยน วาจา อุท เจตสา วา;
อภพฺพ โส ตสฺส ปฏิจฺฉทาย,
อภพฺพตา ทิฏฺฐปทสฺส วุตฺตา;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
วนปฺปคุมฺเพ ยถ ผุสฺสิตคฺเค,
คิมฺหานมาเส ปฐมสฺมิํ คิเมฺห;
ตถูปมํ ธมฺมวรํ อเทสยิ,
นิพฺพานคามิํ ปรมํ หิตาย;
อิทมฺปิ พุทฺเธ รตนํ ปณีตํ,_
เอเตน สจฺเจน สุวตฺถิ โหตุ.
วโร วรญฺญู วรโท วราหโร,
อนุตฺตโร ธมฺมวรํ อเทสยิ;
อิทมฺปิ พุทฺเธ รตนํ ปณีตํ,_
เอเตน สจฺเจน สุวตฺถิ โหตุ.
ขีณํ ปุราณํ นว นตฺถิ สมฺภวํ,
วิรตฺตจิตฺตายติเก ภวสฺมิํ;
เต ขีณพีชา อวิรูฬฺหิฉนฺทา,
นิพฺพนฺติ ธีรา ยถายํ ปทีโป;
อิทมฺปิ สํเฆ รตนํ ปณีตํ,_
เอเตน สจฺเจน สุวตฺถิ โหตุ.
ยานีธ ภูตานิ สมาคตานิ,
ภุมฺมานิ วา ยานิ ว อนฺตลิกฺเข;
ตถาคตํ เทวมนุสฺสปูชิตํ,
พุทฺธํ นมสฺสาม สุวตฺถิ โหตุ.
ยานีธ ภูตานิ สมาคตานิ,
ภุมฺมานิ วา ยานิ ว อนฺตลิกฺเข;
ตถาคตํ เทวมนุสฺสปูชิตํ,
ธมฺมํ นมสฺสาม สุวตฺถิ โหตุ.
ยานีธ ภูตานิ สมาคตานิ,
ภุมฺมานิ วา ยานิ ว อนฺตลิกฺเข;
ตถาคตํ เทวมนุสฺสปูชิตํ,
สํฆํ นมสฺสาม สุวตฺถิ โหตูติ.
รตนสุตฺตํ.