มาติกา
โสตาวธาเน ปญฺญา สุตมเย ญาณํ.
สุตฺวาน สํวเร ปญฺญา สีลมเย ญาณํ.
สํวริตฺวา สมาทหเน ปญฺญา สมาธิภาวนามเย ญาณํ.
ปจฺจยปริคฺคเห ปญฺญา ธมฺมฏฺฐิติญาณํ.
อตีตานาคตปจฺจุปฺปนฺนานํ ธมฺมานํ สงฺขิปิตฺวา ววตฺถาเน ปญฺญา สมฺมสเน ญาณํ.
ปจฺจุปฺปนฺนานํ ธมฺมานํ วิปริณามานุปสฺสเน ปญฺญา อุทยพฺพยานุปสฺสเน ญาณํ.
อารมฺมณํ ปฏิสงฺขา ภงฺคานุปสฺสเน ปญฺญา วิปสฺสเน ญาณํ.
ภยตุปฏฺฐาเน ปญฺญา อาทีนเว ญาณํ.
มุญฺจิตุกมฺยตาปฏิสงฺขาสนฺติฏฺฐนา ปญฺญา สงฺขารุเปกฺขาสุ ญาณํ.
พหิทฺธา วุฏฺฐานวิวฏฺฏเน ปญฺญา โคตฺรภุญาณํ.
ทุภโต วุฏฺฐานวิวฏฺฏเน ปญฺญา มคฺเค ญาณํ.
ปโยคปฺปฏิปฺปสฺสทฺธิ ปญฺญา ผเล ญาณํ.
ฉินฺนวฏุมานุปสฺสเน ปญฺญา วิมุตฺติญาณํ.
ตทา สมุทาคเต ธมฺเม ปสฺสเน ปญฺญา ปจฺจเวกฺขเณ ญาณํ.
อชฺฌตฺตววตฺถาเน ปญฺญา วตฺถุนานตฺเต ญาณํ.
พหิทฺธาววตฺถาเน ปญฺญา โคจรนานตฺเต ญาณํ.
จริยาววตฺถาเน ปญฺญา จริยานานตฺเต ญาณํ.
จตุธมฺมววตฺถาเน ปญฺญา ภูมินานตฺเต ญาณํ.
นวธมฺมววตฺถาเน ปญฺญา ธมฺมนานตฺเต ญาณํ.
อภิญฺญาปญฺญา ญาตฏฺเฐ ญาณํ.
ปริญฺญาปญฺญา ตีรณฏฺเฐ ญาณํ.
ปหาเน ปญฺญา ปริจฺจาคฏฺเฐ ญาณํ.
ภาวนาปญฺญา เอกรสฏฺเฐ ญาณํ.
สจฺฉิกิริยาปญฺญา ผสฺสนฏฺเฐ ญาณํ.
อตฺถนานตฺเต ปญฺญา อตฺถปฏิสมฺภิเท ญาณํ.
ธมฺมนานตฺเต ปญฺญา ธมฺมปฏิสมฺภิเท ญาณํ.
นิรุตฺตินานตฺเต ปญฺญา นิรุตฺติปฏิสมฺภิเท ญาณํ.
ปฏิภานนานตฺเต ปญฺญา ปฏิภานปฏิสมฺภิเท ญาณํ.
วิหารนานตฺเต ปญฺญา วิหารฏฺเฐ ญาณํ.
สมาปตฺตินานตฺเต ปญฺญา สมาปตฺตฏฺเฐ ญาณํ.
วิหารสมาปตฺตินานตฺเต ปญฺญา วิหารสมาปตฺตฏฺเฐ ญาณํ.
อวิกฺเขปปริสุทฺธตฺตา อาสวสมุจฺเฉเท ปญฺญา อานนฺตริกสมาธิมฺหิ ญาณํ.
ทสฺสนาธิปเตยฺยํ สนฺโต จ วิหาราธิคโม ปณีตาธิมุตฺตตา ปญฺญา อรณวิหาเร ญาณํ.
ทฺวีหิ พเลหิ สมนฺนาคตตฺตา ตโย จ สงฺขารานํ ปฏิปฺปสฺสทฺธิยา โสฬสหิ ญาณจริยาหิ นวหิ สมาธิจริยาหิ วสิภาวตา ปญฺญา นิโรธสมาปตฺติยา ญาณํ.
สมฺปชานสฺส ปวตฺตปริยาทาเน ปญฺญา ปรินิพฺพาเน ญาณํ.
สพฺพธมฺมานํ สมฺมา สมุจฺเฉเท นิโรเธ จ อนุปฏฺฐานตา ปญฺญา สมสีสฏฺเฐ ญาณํ.
ปุถุนานตฺตเตชปริยาทาเน ปญฺญา สเลฺลขฏฺเฐ ญาณํ.
อสลฺลีนตฺตปหิตตฺตปคฺคหฏฺเฐ ปญฺญา วีริยารมฺเภ ญาณํ.
นานาธมฺมปฺปกาสนตา ปญฺญา อตฺถสนฺทสฺสเน ญาณํ.
สพฺพธมฺมานํ เอกสงฺคหตานานตฺเตกตฺตปฏิเวเธ ปญฺญา ทสฺสนวิสุทฺธิญาณํ.
วิทิตตฺตา ปญฺญา ขนฺติญาณํ.
ผุฏฺฐตฺตา ปญฺญา ปริโยคาหเณ ญาณํ.
สโมทหเน ปญฺญา ปเทสวิหาเร ญาณํ.
อธิปตตฺตา ปญฺญา สญฺญาวิวฏฺเฏ ญาณํ.
นานตฺเต ปญฺญา เจโตวิวฏฺเฏ ญาณํ.
อธิฏฺฐาเน ปญฺญา จิตฺตวิวฏฺเฏ ญาณํ.
สุญฺญเต ปญฺญา ญาณวิวฏฺเฏ ญาณํ.
โวสคฺเค ปญฺญา วิโมกฺขวิวฏฺเฏ ญาณํ.
ตถฏฺเฐ ปญฺญา สจฺจวิวฏฺเฏ ญาณํ.
กายมฺปิ จิตฺตมฺปิ เอกววตฺถานตา สุขสญฺญญฺจ ลหุสญฺญญฺจ อธิฏฺฐานวเสน อิชฺฌนฏฺเฐ ปญฺญา อิทฺธิวิเธ ญาณํ.
วิตกฺกวิปฺผารวเสน นานตฺเตกตฺตสทฺทนิมิตฺตานํ ปริโยคาหเณ ปญฺญา โสตธาตุวิสุทฺธิญาณํ.
ติณฺณนฺนํ จิตฺตานํ วิปฺผารตฺตา อินฺทฺริยานํ ปสาทวเสน นานตฺเตกตฺตวิญฺญาณจริยา ปริโยคาหเณ ปญฺญา เจโตปริยญาณํ.
ปจฺจยปฺปวตฺตานํ ธมฺมานํ นานตฺเตกตฺตกมฺมวิปฺผารวเสน ปริโยคาหเณ ปญฺญา ปุพฺเพนิวาสานุสฺสติญาณํ.
โอภาสวเสน นานตฺเตกตฺตรูปนิมิตฺตานํ ทสฺสนฏฺเฐ ปญฺญา ทิพฺพจกฺขุญาณํ.
จตุสฏฺฐิยา อากาเรหิ ติณฺณนฺนํ อินฺทฺริยานํ วสิภาวตา ปญฺญา อาสวานํ ขเย ญาณํ.
ปริญฺญฏฺเฐ ปญฺญา ทุกฺเข ญาณํ.
ปหานฏฺเฐ ปญฺญา สมุทเย ญาณํ.
สจฺฉิกิริยฏฺเฐ ปญฺญา นิโรเธ ญาณํ.
ภาวนฏฺเฐ ปญฺญา มคฺเค ญาณํ.
ทุกฺเข ญาณํ.
ทุกฺขสมุทเย ญาณํ.
ทุกฺขนิโรเธ ญาณํ.
ทุกฺขนิโรธคามินิยา ปฏิปทาย ญาณํ.
อตฺถปฏิสมฺภิเท ญาณํ.
ธมฺมปฏิสมฺภิเท ญาณํ.
นิรุตฺติปฏิสมฺภิเท ญาณํ.
ปฏิภานปฏิสมฺภิเท ญาณํ.
อินฺทฺริยปโรปริยตฺตญาณํ.
สตฺตานํ อาสยานุสเย ญาณํ.
ยมกปาฏิหีเร ญาณํ.
มหากรุณาสมาปตฺติยา ญาณํ.
สพฺพญฺญุตญฺญาณํ.
อนาวรณญาณํ.
อิมานิ เตสตฺตติ ญาณานิ. อิเมสํ เตสตฺตติยา ญาณานํ สตฺตสฏฺฐิ ญาณานิ สาวกสาธารณานิ; ฉ ญาณานิ อสาธารณานิ สาวเกหิ.
มาติกา นิฏฺฐิตา.