3.2 สาณวาสีเถรเปตวตฺถุ
กุณฺฑินาคริโย เถโร,
สาณวาสินิวาสิโก;
โปฏฺฐปาโทติ นาเมน,
สมโณ ภาวิตินฺทฺริโย.
ตสฺส มาตา ปิตา ภาตา,
ทุคฺคตา ยมโลกิกา;
ปาปกมฺมํ กริตฺวาน,
เปตโลกํ อิโต คตา.
เต ทุคฺคตา สูจิกฏฺฏา,
กิลนฺตา นคฺคิโน กิสา;
อุตฺตสนฺตา มหตฺตาสา,_
น ทเสฺสนฺติ กุรูริโน.
ตสฺส ภาตา วิตริตฺวา,
นคฺโค เอกปเถกโก;
จตุกุณฺฑิโก ภวิตฺวาน,
เถรสฺส ทสฺสยีตุมํ.
เถโร จามนสิกตฺวา,
ตุณฺหีภูโต อติกฺกมิ;
โส จ วิญฺญาปยี เถรํ,
“ภาตา เปตคโต อหํ.
มาตา ปิตา จ เต ภนฺเต,
ทุคฺคตา ยมโลกิกา;
ปาปกมฺมํ กริตฺวาน,
เปตโลกํ อิโต คตา.
เต ทุคฺคตา สูจิกฏฺฏา,
กิลนฺตา นคฺคิโน กิสา;
อุตฺตสนฺตา มหตฺตาสา,_
น ทเสฺสนฺติ กุรูริโน.
อนุกมฺปสฺสุ การุณิโก,
ทตฺวา อนฺวาทิสาหิ โน;
ตว ทินฺเนน ทาเนน,
ยาเปสฺสนฺติ กุรูริโน”ติ.
เถโร จริตฺวา ปิณฺฑาย,
ภิกฺขู อญฺเญ จ ทฺวาทส;
เอกชฺฌํ สนฺนิปติํสุ,
ภตฺตวิสฺสคฺคการณา.
เถโร สพฺเพว เต อาห,
“ยถาลทฺธํ ททาถ เม;
สํฆภตฺตํ กริสฺสามิ,
อนุกมฺปาย ญาตินํ”.
นิยฺยาทยิํสุ เถรสฺส,
เถโร สํฆํ นิมนฺตยิ;
ทตฺวา อนฺวาทิสิ เถโร,
มาตุ ปิตุ จ ภาตุโน;
“อิทํ เม ญาตีนํ โหตุ,
สุขิตา โหนฺตุ ญาตโย”.
สมนนฺตรานุทฺทิฏฺเฐ,
โภชนํ อุทปชฺชถ;
สุจิํ ปณีตํ สมฺปนฺนํ,
อเนกรสพฺยญฺชนํ.
ตโต อุทฺทสฺสยี ภาตา,
วณฺณวา พลวา สุขี;
“ปหูตํ โภชนํ ภนฺเต,
ปสฺส นคฺคามฺหเส มยํ;
ตถา ภนฺเต ปรกฺกม,
ยถา วตฺถํ ลภามเส”ติ.
เถโร สงฺการกูฏมฺหา,
อุจฺจินิตฺวาน นนฺตเก;_
ปิโลติกํ ปฏํ กตฺวา,
สํเฆ จาตุทฺทิเส อทา.
ทตฺวา อนฺวาทิสี เถโร,
มาตุ ปิตุ จ ภาตุโน;
“อิทํ เม ญาตีนํ โหตุ,
สุขิตา โหนฺตุ ญาตโย”.
สมนนฺตรานุทฺทิฏฺเฐ,
วตฺถานิ อุทปชฺชิสุํ;
ตโต สุวตฺถวสโน,
เถรสฺส ทสฺสยีตุมํ.
“ยาวตา นนฺทราชสฺส,
วิชิตสฺมิํ ปฏิจฺฉทา;
ตโต พหุตรา ภนฺเต,
วตฺถานจฺฉาทนานิ โน.
โกเสยฺยกมฺพลียานิ,
โขม กปฺปาสิกานิ จ;
วิปุลา จ มหคฺฆา จ,
เตปากาเสวลมฺพเร.
เต มยํ ปริทหาม,
ยํ ยํ หิ มนโส ปิยํ;
ตถา ภนฺเต ปรกฺกม,
ยถา เคหํ ลภามเส”ติ.
เถโร ปณฺณกุฏิํ กตฺวา,
สํเฆ จาตุทฺทิเส อทา;
ทตฺวา อนฺวาทิสี เถโร,
มาตุ ปิตุ จ ภาตุโน;
“อิทํ เม ญาตีนํ โหตุ,
สุขิตา โหนฺตุ ญาตโย”.
สมนนฺตรานุทฺทิฏฺเฐ,
ฆรานิ อุทปชฺชิสุํ;
กูฏาคารนิเวสนา,
วิภตฺตา ภาคโส มิตา.
“น มนุเสฺสสุ อีทิสา,
ยาทิสา โน ฆรา อิธ;
อปิ ทิพฺเพสุ ยาทิสา,
ตาทิสา โน ฆรา อิธ.
ททฺทลฺลมานา อาเภนฺติ,
สมนฺตา จตุโร ทิสา;
ตถา ภนฺเต ปรกฺกม,
ยถา ปานียํ ลภามเส”ติ.
เถโร กรณํ ปูเรตฺวา,
สํเฆ จาตุทฺทิเส อทา;
ทตฺวา อนฺวาทิสี เถโร,
มาตุ ปิตุ จ ภาตุโน;
“อิทํ เม ญาตีนํ โหตุ,
สุขิตา โหนฺตุ ญาตโย”.
สมนนฺตรานุทฺทิฏฺเฐ,
ปานียํ อุทปชฺชถ;
คมฺภีรา จตุรสฺสา จ,
โปกฺขรญฺโญ สุนิมฺมิตา.
สีโตทิกา สุปฺปติตฺถา,
สีตา อปฺปฏิคนฺธิยา;
ปทุมุปฺปลสญฺฉนฺนา,
วาริกิญฺชกฺขปูริตา.
ตตฺถ นฺหตฺวา ปิวิตฺวา จ,
เถรสฺส ปฏิทสฺสยุํ;
“ปหูตํ ปานียํ ภนฺเต,
ปาทา ทุกฺขา ผลนฺติ โน”.
“อาหิณฺฑมานา ขญฺชาม,
สกฺขเร กุสกณฺฏเก;
‘ตถา ภนฺเต ปรกฺกม,
ยถา ยานํ ลภามเส’”ติ.
เถโร สิปาฏิกํ ลทฺธา,
สํเฆ จาตุทฺทิเส อทา;
ทตฺวา อนฺวาทิสี เถโร,
มาตุ ปิตุ จ ภาตุโน;
“อิทํ เม ญาตีนํ โหตุ,
สุขิตา โหนฺตุ ญาตโย”.
สมนนฺตรานุทฺทิฏฺเฐ,
เปตา รเถน มาคมุํ;
“อนุกมฺปิตมฺห ภทนฺเต,
ภตฺเตนจฺฉาทเนน จ.
ฆเรน ปานียทาเนน,
ยานทาเนน จูภยํ;
มุนิํ การุณิกํ โลเก,
ภนฺเต วนฺทิตุมาคตา”ติ.
สาณวาสีเถรเปตวตฺถุ ทุติยํ.