4.16 สฏฺฐิกูฏเปตวตฺถุ
“กิํ นุ อุมฺมตฺตรูโปว,
มิโค ภนฺโตว ธาวสิ;
นิสฺสํสยํ ปาปกมฺมนฺโต,
กิํ นุ สทฺทายเส ตุวนฺ”ติ.
“อหํ ภทนฺเต เปโตมฺหิ,
ทุคฺคโต ยมโลกิโก;
ปาปกมฺมํ กริตฺวาน,
เปตโลกํ อิโต คโต.
สฏฺฐิ กูฏสหสฺสานิ,
ปริปุณฺณานิ สพฺพโส;
สีเส มยฺหํ นิปตนฺติ,
เต ภินฺทนฺติ จ มตฺถกนฺ”ติ.
“กิํ นุ กาเยน วาจาย,
มนสา ทุกฺกฏํ กตํ;
กิสฺส กมฺมวิปาเกน,
อิทํ ทุกฺขํ นิคจฺฉสิ._
สฏฺฐิ กูฏสหสฺสานิ,
ปริปุณฺณานิ สพฺพโส;
สีเส ตุยฺหํ นิปตนฺติ,
เต ภินฺทนฺติ จ มตฺถกนฺ”ติ.
“อถทฺทสาสิํ สมฺพุทฺธํ,
สุเนตฺตํ ภาวิตินฺทฺริยํ;
นิสินฺนํ รุกฺขมูลสฺมิํ,
ฌายนฺตํ อกุโตภยํ.
สาลิตฺตกปฺปหาเรน,
ภินฺทิสฺสํ ตสฺส มตฺถกํ;
ตสฺส กมฺมวิปาเกน,
อิทํ ทุกฺขํ นิคจฺฉิสํ._
สฏฺฐิ กูฏสหสฺสานิ,
ปริปุณฺณานิ สพฺพโส;
สีเส มยฺหํ นิปตนฺติ,
เต ภินฺทนฺติ จ มตฺถกนฺ”ติ.
“ธมฺเมน เต กาปุริส,
สฏฺฐิกูฏสหสฺสานิ;
ปริปุณฺณานิ สพฺพโส,
สีเส ตุยฺหํ นิปตนฺติ;
เต ภินฺทนฺติ จ มตฺถกนฺ”ติ.
สฏฺฐิกูฏเปตวตฺถุ โสฬสมํ.
มหาวคฺโค จตุตฺโถ.
ตสฺสุทฺทานํ
อมฺพสกฺกโร เสรีสโก,
ปิงฺคโล เรวติ อุจฺฉุ;
ทฺเว กุมารา ทุเว คูถา,
คณปาฏลิอมฺพวนํ.
อกฺขรุกฺขโภคสํหรา,
เสฏฺฐิปุตฺตสฏฺฐิกูฏา;
อิติ โสฬสวตฺถูนิ,_
วคฺโค เตน ปวุจฺจติ.
อถ วคฺคุทฺทานํ
อุรโค อุปริวคฺโค,_
จูฬมหาติ จตุธา;
วตฺถูนิ เอกปญฺญาสํ,
จตุธา ภาณวารโต.
เปตวตฺถุปาฬิ นิฏฺฐิตา.