4.3 นนฺทกเปตวตฺถุ
ราชา ปิงฺคลโก นาม,
สุรฏฺฐานํ อธิปติ อหุ;
โมริยานํ อุปฏฺฐานํ คนฺตฺวา,
สุรฏฺฐํ ปุนราคมา.
อุเณฺห มชฺฌนฺหิเก กาเล,_
ราชา ปงฺกํ อุปาคมิ;
อทฺทส มคฺคํ รมณียํ,
เปตานํ ตํ วณฺณุปถํ.
สารถิํ อามนฺตยี ราชา—
“อยํ มคฺโค รมณีโย,
เขโม โสวตฺถิโก สิโว;
อิมินา สารถิ ยาม,_
สุรฏฺฐานํ สนฺติเก อิโต”.
เตน ปายาสิ โสรฏฺโฐ,
เสนาย จตุรงฺคินิยา;
อุพฺพิคฺครูโป ปุริโส,_
โสรฏฺฐํ เอตทพฺรวิ.
“กุมฺมคฺคํ ปฏิปนฺนมฺหา,
ภิํสนํ โลมหํสนํ;
ปุรโต ทิสฺสติ มคฺโค,
ปจฺฉโต จ น ทิสฺสติ.
กุมฺมคฺคํ ปฏิปนฺนมฺหา,
ยมปุริสาน สนฺติเก;
อมานุโส วายติ คนฺโธ,
โฆโส สุยฺยติ ทารุโณ”.
สํวิคฺโค ราชา โสรฏฺโฐ,
สารถิํ เอตทพฺรวิ;
“กุมฺมคฺคํ ปฏิปนฺนมฺหา,
ภิํสนํ โลมหํสนํ;
ปุรโต ทิสฺสติ มคฺโค,
ปจฺฉโต จ น ทิสฺสติ.
กุมฺมคฺคํ ปฏิปนฺนมฺหา,
ยมปุริสาน สนฺติเก;
อมานุโส วายติ คนฺโธ,
โฆโส สุยฺยติ ทารุโณ”.
หตฺถิกฺขนฺธํ สมารุยฺห,
โอโลเกนฺโต จตุทฺทิสํ;
อทฺทส นิโคฺรธํ รมณียํ,
ปาทปํ ฉายาสมฺปนฺนํ;
นีลพฺภวณฺณสทิสํ,
เมฆวณฺณสิรีนิภํ.
สารถิํ อามนฺตยี ราชา,
“กิํ เอโส ทิสฺสติ พฺรหา;
นีลพฺภวณฺณสทิโส,
เมฆวณฺณสิรีนิโภ”.
“นิโคฺรโธ โส มหาราช,
ปาทโป ฉายาสมฺปนฺโน;
นีลพฺภวณฺณสทิโส,
เมฆวณฺณสิรีนิโภ”.
เตน ปายาสิ โสรฏฺโฐ,
เยน โส ทิสฺสเต พฺรหา;
นีลพฺภวณฺณสทิโส,
เมฆวณฺณสิรีนิโภ.
หตฺถิกฺขนฺธโต โอรุยฺห,
ราชา รุกฺขํ อุปาคมิ;
นิสีทิ รุกฺขมูลสฺมิํ,
สามจฺโจ สปริชฺชโน;
ปูรํ ปานียสรกํ,
ปูเว วิตฺเต จ อทฺทส.
ปุริโส จ เทววณฺณี,
สพฺพาภรณภูสิโต;
อุปสงฺกมิตฺวา ราชานํ,_
โสรฏฺฐํ เอตทพฺรวิ.
“สฺวาคตํ เต มหาราช,
อโถ เต อทุราคตํ;
ปิวตุ เทโว ปานียํ,
ปูเว ขาท อรินฺทม”.
ปิวิตฺวา ราชา ปานียํ,
สามจฺโจ สปริชฺชโน;
ปูเว ขาทิตฺวา ปิตฺวา จ,
โสรฏฺโฐ เอตทพฺรวิ.
“เทวตา นุสิ คนฺธพฺโพ,
อทุ สกฺโก ปุรินฺทโท;
อชานนฺตา ตํ ปุจฺฉาม,
กถํ ชาเนมุ ตํ มยนฺ”ติ.
“นามฺหิ เทโว น คนฺธพฺโพ,
นาปิ สกฺโก ปุรินฺทโท;
เปโต อหํ มหาราช,
สุรฏฺฐา อิธ มาคโต”ติ.
“กิํสีโล กิํสมาจาโร,
สุรฏฺฐสฺมิํ ปุเร ตุวํ;
เกน เต พฺรหฺมจริเยน,
อานุภาโว อยํ ตวา”ติ.
“ตํ สุโณหิ มหาราช,
อรินฺทม รฏฺฐวฑฺฒน;
อมจฺจา ปาริสชฺชา จ,
พฺราหฺมโณ จ ปุโรหิโต.
สุรฏฺฐสฺมิํ อหํ เทว,
ปุริโส ปาปเจตโส;
มิจฺฉาทิฏฺฐิ จ ทุสฺสีโล,
กทริโย ปริภาสโก.
ททนฺตานํ กโรนฺตานํ,
วารยิสฺสํ พหุชฺชนํ;
อญฺเญสํ ททมานานํ,
อนฺตรายกโร อหํ.
วิปาโก นตฺถิ ทานสฺส,
สํยมสฺส กุโต ผลํ;
นตฺถิ อาจริโย นาม,
อทนฺตํ โก ทเมสฺสติ.
สมตุลฺยานิ ภูตานิ,
กุโต เชฏฺฐาปจายิโก;
นตฺถิ พลํ วีริยํ วา,
กุโต อุฏฺฐานโปริสํ.
นตฺถิ ทานผลํ นาม,
น วิโสเธติ เวรินํ;
ลทฺเธยฺยํ ลภเต มจฺโจ,
นิยติปริณามชํ.
นตฺถิ มาตา ปิตา ภาตา,
โลโก นตฺถิ อิโต ปรํ;
นตฺถิ ทินฺนํ นตฺถิ หุตํ,
สุนิหิตํ น วิชฺชติ.
โยปิ หเนยฺย ปุริสํ,
ปรสฺส ฉินฺทเต สิรํ;
น โกจิ กญฺจิ หนติ,
สตฺตนฺนํ วิวรมนฺตเร.
อจฺเฉชฺชาเภชฺโช หิ ชีโว,
อฏฺฐํโส คุฬปริมณฺฑโล;
โยชนานํ สตํ ปญฺจ,
โก ชีวํ เฉตฺตุมรหติ.
ยถา สุตฺตคุเฬ ขิตฺเต,
นิพฺเพเฐนฺตํ ปลายติ;
เอวเมวํ จ โส ชีโว,
นิพฺเพเฐนฺโต ปลายติ.
ยถา คามโต นิกฺขมฺม,
อญฺญํ คามํ ปวีสติ;
เอวเมวํ จ โส ชีโว,
อญฺญํ โพนฺทิํ ปวีสติ.
ยถา เคหโต นิกฺขมฺม,
อญฺญํ เคหํ ปวีสติ;
เอวเมวํ จ โส ชีโว,
อญฺญํ โพนฺทิํ ปวีสติ.
จุลฺลาสีติ มหากปฺปิโน,
สตสหสฺสานิ หิ;
เย พาลา เย จ ปณฺฑิตา,
สํสารํ เขปยิตฺวาน;
ทุกฺขสฺสนฺตํ กริสฺสเร.
มิตานิ สุขทุกฺขานิ,
โทเณหิ ปิฏเกหิ จ;
ชิโน สพฺพํ ปชานาติ,
สมฺมูฬฺหา อิตรา ปชา.
เอวํทิฏฺฐิ ปุเร อาสิํ,
สมฺมูโฬฺห โมหปารุโต;
มิจฺฉาทิฏฺฐิ จ ทุสฺสีโล,
กทริโย ปริภาสโก.
โอรํ เม ฉหิ มาเสหิ,
กาลกิริยา ภวิสฺสติ;
เอกนฺตกฏุกํ โฆรํ,
นิรยํ ปปติสฺสหํ.
จตุกฺกณฺณํ จตุทฺวารํ,
วิภตฺตํ ภาคโส มิตํ;
อโยปาการปริยนฺตํ,
อยสา ปฏิกุชฺชิตํ.
ตสฺส อโยมยา ภูมิ,
ชลิตา เตชสา ยุตา;
สมนฺตา โยชนสตํ,
ผริตฺวา ติฏฺฐติ สพฺพทา.
วสฺสานิ สตสหสฺสานิ,
โฆโส สุยฺยติ ตาวเท;
ลกฺโข เอโส มหาราช,
สตภาควสฺสโกฏิโย.
โกฏิสตสหสฺสานิ,
นิรเย ปจฺจเร ชนา;
มิจฺฉาทิฏฺฐี จ ทุสฺสีลา,
เย จ อริยูปวาทิโน.
ตตฺถาหํ ทีฆมทฺธานํ,
ทุกฺขํ เวทิสฺส เวทนํ;
ผลํ ปาปสฺส กมฺมสฺส,
ตสฺมา โสจามหํ ภุสํ.
ตํ สุโณหิ มหาราช,
อรินฺทม รฏฺฐวฑฺฒน;
ธีตา มยฺหํ มหาราช,
อุตฺตรา ภทฺทมตฺถุ เต._
กโรติ ภทฺทกํ กมฺมํ,
สีเลสุโปสเถ รตา;
สญฺญตา สํวิภาคี จ,
วทญฺญู วีตมจฺฉรา.
อขณฺฑการี สิกฺขาย,
สุณฺหา ปรกุเลสุ จ;
อุปาสิกา สกฺยมุนิโน,_
สมฺพุทฺธสฺส สิรีมโต.
ภิกฺขุ จ สีลสมฺปนฺโน,
คามํ ปิณฺฑาย ปาวิสิ;
โอกฺขิตฺตจกฺขุ สติมา,
คุตฺตทฺวาโร สุสํวุโต.
สปทานํ จรมาโน,
อคมา ตํ นิเวสนํ;
‘ตมทฺทส มหาราช,
อุตฺตรา ภทฺทมตฺถุ เต’._
ปูรํ ปานียสรกํ,
ปูเว วิตฺเต จ สา อทา;
‘ปิตา เม กาลกโต ภนฺเต,
ตเสฺสตํ อุปกปฺปตุ’.
สมนนฺตรานุทฺทิฏฺเฐ,
วิปาโก อุทปชฺชถ;
ภุญฺชามิ กามกามีหํ,
ราชา เวสฺสวโณ ยถา.
ตํ สุโณหิ มหาราช,
อรินฺทม รฏฺฐวฑฺฒน;
สเทวกสฺส โลกสฺส,
พุทฺโธ อคฺโค ปวุจฺจติ;
ตํ พุทฺธํ สรณํ คจฺฉ,
สปุตฺตทาโร อรินฺทม.
อฏฺฐงฺคิเกน มคฺเคน,
ผุสนฺติ อมตํ ปทํ;
ตํ ธมฺมํ สรณํ คจฺฉ,
สปุตฺตทาโร อรินฺทม.
จตฺตาโร จ ปฏิปนฺนา,
จตฺตาโร จ ผเล ฐิตา;
เอส สํโฆ อุชุภูโต,
ปญฺญาสีลสมาหิโต;
ตํ สํฆํ สรณํ คจฺฉ,
สปุตฺตทาโร อรินฺทม.
ปาณาติปาตา วิรมสฺสุ ขิปฺปํ,
โลเก อทินฺนํ ปริวชฺชยสฺสุ;
อมชฺชโป มา จ มุสา อภาณิ,
สเกน ทาเรน จ โหหิ ตุฏฺโฐ”ติ.
“อตฺถกาโมสิ เม ยกฺข,
หิตกาโมสิ เทวเต;
กโรมิ ตุยฺหํ วจนํ,
ตฺวํสิ อาจริโย มม.
อุเปมิ สรณํ พุทฺธํ,_
ธมฺมญฺจาปิ อนุตฺตรํ;
สํฆญฺจ นรเทวสฺส,
คจฺฉามิ สรณํ อหํ.
ปาณาติปาตา วิรมามิ ขิปฺปํ,
โลเก อทินฺนํ ปริวชฺชยามิ;
อมชฺชโป โน จ มุสา ภณามิ,
สเกน ทาเรน จ โหมิ ตุฏฺโฐ.
โอผุณามิ มหาวาเต,
นทิยา สีฆคามิยา;
วมามิ ปาปิกํ ทิฏฺฐิํ,
พุทฺธานํ สาสเน รโต”.
อิทํ วตฺวาน โสรฏฺโฐ,_
วิรมิตฺวา ปาปทสฺสนา;
นโม ภควโต กตฺวา,
ปาโมกฺโข รถมารุหีติ.
นนฺทกเปตวตฺถุ ตติยํ.