4.7 ราชปุตฺตเปตวตฺถุ
ปุพฺเพ กตานํ กมฺมานํ,
วิปาโก มถเย มนํ;
รูเป สทฺเท รเส คนฺเธ,
โผฏฺฐพฺเพ จ มโนรเม.
นจฺจํ คีตํ รติํ ขิฑฺฑํ,
อนุภุตฺวา อนปฺปกํ;
อุยฺยาเน ปริจริตฺวา,_
ปวิสนฺโต คิริพฺพชํ.
อิสิํ สุเนตฺต มทฺทกฺขิ,_
อตฺตทนฺตํ สมาหิตํ;
อปฺปิจฺฉํ หิริสมฺปนฺนํ,
อุญฺเฉ ปตฺตคเต รตํ._
หตฺถิกฺขนฺธโต โอรุยฺห,
ลทฺธา ภนฺเตติ จาพฺรวิ;
ตสฺส ปตฺตํ คเหตฺวาน,
อุจฺจํ ปคฺคยฺห ขตฺติโย._
ถณฺฑิเล ปตฺตํ ภินฺทิตฺวา,
หสมาโน อปกฺกมิ;
“รญฺโญ กิตวสฺสาหํ ปุตฺโต,
กิํ มํ ภิกฺขุ กริสฺสสิ”.
ตสฺส กมฺมสฺส ผรุสสฺส,
วิปาโก กฏุโก อหุ;
ยํ ราชปุตฺโต เวเทสิ,
นิรยมฺหิ สมปฺปิโต.
ฉเฬว จตุราสีติ,
วสฺสานิ นวุตานิ จ;
ภุสํ ทุกฺขํ นิคจฺฉิตฺโถ,
นิรเย กตกิพฺพิโส.
อุตฺตาโนปิ จ ปจฺจิตฺถ,_
นิกุชฺโช วามทกฺขิโณ;
อุทฺธมฺปาโท ฐิโต เจว,_
จิรํ พาโล อปจฺจถ.
พหูนิ วสฺสสหสฺสานิ,
ปูคานิ นหุตานิ จ;
ภุสํ ทุกฺขํ นิคจฺฉิตฺโถ,
นิรเย กตกิพฺพิโส.
เอตาทิสํ โข กฏุกํ,
อปฺปทุฏฺฐปฺปโทสินํ;
ปจฺจนฺติ ปาปกมฺมนฺตา,
อิสิมาสชฺช สุพฺพตํ._
โส ตตฺถ พหุวสฺสานิ,
เวทยิตฺวา พหุํ ทุขํ;
ขุปฺปิปาสหโต นาม,
เปโต อาสิ ตโต จุโต.
เอตมาทีนวํ ญตฺวา,
อิสฺสรมทสมฺภวํ;_
ปหาย อิสฺสรมทํ,
นิวาตมนุวตฺตเย.
ทิฏฺเฐว ธมฺเม ปาสํโส,
โย พุทฺเธสุ สคารโว;
กายสฺส เภทา สปฺปญฺโญ,
สคฺคํ โส อุปปชฺชตีติ.
ราชปุตฺตเปตวตฺถุ สตฺตมํ.