1.1 อุรคสุตฺต
โย อุปฺปติตํ วิเนติ โกธํ,
วิสฏํ สปฺปวิสํว โอสเธหิ;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย ราคมุทจฺฉิทา อเสสํ,
ภิสปุปฺผํว สโรรุหํ วิคยฺห;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย ตณฺหมุทจฺฉิทา อเสสํ,
สริตํ สีฆสรํ วิโสสยิตฺวา;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย มานมุทพฺพธี อเสสํ,
นฬเสตุํว สุทุพฺพลํ มโหโฆ;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาชฺฌคมา ภเวสุ สารํ,
วิจินํ ปุปฺผมิวา อุทุมฺพเรสุ;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
ยสฺสนฺตรโต น สนฺติ โกปา,
อิติภวาภวตญฺจ วีติวตฺโต;_
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
ยสฺส วิตกฺกา วิธูปิตา,
อชฺฌตฺตํ สุวิกปฺปิตา อเสสา;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ อจฺจคมา อิมํ ปปญฺจํ;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ วิตถมิทนฺติ ญตฺว โลเก;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ วิตถมิทนฺติ วีตโลโภ;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ วิตถมิทนฺติ วีตราโค;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ วิตถมิทนฺติ วีตโทโส;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นาจฺจสารี น ปจฺจสารี,
สพฺพํ วิตถมิทนฺติ วีตโมโห;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
ยสฺสานุสยา น สนฺติ เกจิ,
มูลา จ อกุสลา สมูหตาเส;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
ยสฺส ทรถชา น สนฺติ เกจิ,
โอรํ อาคมนาย ปจฺจยาเส;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
ยสฺส วนถชา น สนฺติ เกจิ,
วินิพนฺธาย ภวาย เหตุกปฺปา;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณํ._
โย นีวรเณ ปหาย ปญฺจ,
อนิโฆ ติณฺณกถํกโถ วิสโลฺล;
โส ภิกฺขุ ชหาติ โอรปารํ,
อุรโค ชิณฺณมิวตฺตจํ ปุราณนฺติ._
อุรคสุตฺตํ ปฐมํ.