1.12 มุนิสุตฺต
สนฺถวาโต ภยํ ชาตํ,
นิเกตา ชายเต รโช;
อนิเกตมสนฺถวํ,
เอตํ เว มุนิทสฺสนํ. (1)
โย ชาตมุจฺฉิชฺช น โรปเยยฺย,
ชายนฺตมสฺส นานุปฺปเวจฺเฉ;
ตมาหุ เอกํ มุนินํ จรนฺตํ,
อทฺทกฺขิ โส สนฺติปทํ มเหสิ. (2)
สงฺขาย วตฺถูนิ ปมาย พีชํ,
สิเนหมสฺส นานุปฺปเวจฺเฉ;
ส เว มุนี ชาติขยนฺตทสฺสี,
ตกฺกํ ปหาย น อุเปติ สงฺขํ. (3)
อญฺญาย สพฺพานิ นิเวสนานิ,
อนิกามยํ อญฺญตรมฺปิ เตสํ;
ส เว มุนี วีตเคโธ อคิทฺโธ,
นายูหตี ปารคโต หิ โหติ. (4)
สพฺพาภิภุํ สพฺพวิทุํ สุเมธํ,
สพฺเพสุ ธมฺเมสุ อนูปลิตฺตํ;
สพฺพญฺชหํ ตณฺหกฺขเย วิมุตฺตํ,
ตํ วาปิ ธีรา มุนิ เวทยนฺติ. (5)
ปญฺญาพลํ สีลวตูปปนฺนํ,
สมาหิตํ ฌานรตํ สตีมํ;
สงฺคา ปมุตฺตํ อขิลํ อนาสวํ,
ตํ วาปิ ธีรา มุนิ เวทยนฺติ. (6)
เอกํ จรนฺตํ มุนิมปฺปมตฺตํ,
นินฺทาปสํสาสุ อเวธมานํ;
สีหํว สทฺเทสุ อสนฺตสนฺตํ,
วาตํว ชาลมฺหิ อสชฺชมานํ;
ปทฺมํว โตเยน อลิปฺปมานํ,
เนตารมญฺเญสมนญฺญเนยฺยํ;
ตํ วาปิ ธีรา มุนิ เวทยนฺติ. (7)
โย โอคหเณ ถมฺโภริวาภิชายติ,
ยสฺมิํ ปเร วาจาปริยนฺตํ วทนฺติ;
ตํ วีตราคํ สุสมาหิตินฺทฺริยํ,
ตํ วาปิ ธีรา มุนิ เวทยนฺติ. (8)
โย เว ฐิตตฺโต ตสรํว อุชฺชุ,
ชิคุจฺฉติ กมฺเมหิ ปาปเกหิ;
วีมํสมาโน วิสมํ สมญฺจ,
ตํ วาปิ ธีรา มุนิ เวทยนฺติ. (9)
โย สญฺญตตฺโต น กโรติ ปาปํ,
ทหโร มชฺฌิโม จ มุนิ ยตตฺโต;
อโรสเนโยฺย น โส โรเสติ กญฺจิ,
ตํ วาปิ ธีรา มุนิ เวทยนฺติ. (10)
ยทคฺคโต มชฺฌโต เสสโต วา,
ปิณฺฑํ ลเภถ ปรทตฺตูปชีวี;
นาลํ ถุตุํ โนปิ นิปจฺจวาที,
ตํ วาปิ ธีรา มุนิ เวทยนฺติ. (11)
มุนิํ จรนฺตํ วิรตํ เมถุนสฺมา,
โย โยพฺพเน โนปนิพชฺฌเต กฺวจิ;
มทปฺปมาทา วิรตํ วิปฺปมุตฺตํ,
ตํ วาปิ ธีรา มุนิ เวทยนฺติ. (12)
อญฺญาย โลกํ ปรมตฺถทสฺสิํ,
โอฆํ สมุทฺทํ อติตริย ตาทิํ;
ตํ ฉินฺนคนฺถํ อสิตํ อนาสวํ,
ตํ วาปิ ธีรา มุนิ เวทยนฺติ. (13)
อสมา อุโภ ทูรวิหารวุตฺติโน,
คิหี ทารโปสี อมโม จ สุพฺพโต;
ปรปาณโรธาย คิหี อสญฺญโต,
นิจฺจํ มุนี รกฺขติ ปาณิเน ยโต. (14)
สิขี ยถา นีลคีโว วิหงฺคโม,
หํสสฺส โนเปติ ชวํ กุทาจนํ;
เอวํ คิหี นานุกโรติ ภิกฺขุโน,
มุนิโน วิวิตฺตสฺส วนมฺหิ ฌายโตติ. (15)
มุนิสุตฺตํ ทฺวาทสมํ.
อุรควคฺโค ปฐโม.
ตสฺสุทฺทานํ
อุรโค ธนิโย เจว,_
วิสาณญฺจ ตถา กสิ;
จุนฺโท ปราภโว เจว,
วสโล เมตฺตภาวนา.
สาตาคิโร อาฬวโก,
วิชโย จ ตถา มุนิ;
ทฺวาทเสตานิ สุตฺตานิ,
อุรควคฺโคติ วุจฺจตีติ._