1.2 ธนิยสุตฺต
“ปกฺโกทโน ทุทฺธขีโรหมสฺมิ, (อิติ ธนิโย โคโป)
อนุตีเร มหิยา สมานวาโส;
ฉนฺนา กุฏิ อาหิโต คินิ,
อถ เจ ปตฺถยสี ปวสฺส เทว”. (1)
“อกฺโกธโน วิคตขิโลหมสฺมิ, (อิติ ภควา)
อนุตีเร มหิเยกรตฺติวาโส;
วิวฏา กุฏิ นิพฺพุโต คินิ,
อถ เจ ปตฺถยสี ปวสฺส เทว”. (2)
“อนฺธกมกสา น วิชฺชเร, (อิติ ธนิโย โคโป)
กจฺเฉ รูฬฺหติเณ จรนฺติ คาโว;
วุฏฺฐิมฺปิ สเหยฺยุมาคตํ,
อถ เจ ปตฺถยสี ปวสฺส เทว”. (3)
“พทฺธาสิ ภิสี สุสงฺขตา, (อิติ ภควา)
ติณฺโณ ปารคโต วิเนยฺย โอฆํ;
อตฺโถ ภิสิยา น วิชฺชติ,
อถ เจ ปตฺถยสี ปวสฺส เทว”. (4)
“โคปี มม อสฺสวา อโลลา, (อิติ ธนิโย โคโป)
ทีฆรตฺตํ สํวาสิยา มนาปา;
ตสฺสา น สุณามิ กิญฺจิ ปาปํ,
อถ เจ ปตฺถยสี ปวสฺส เทว”. (5)
“จิตฺตํ มม อสฺสวํ วิมุตฺตํ, (อิติ ภควา)
ทีฆรตฺตํ ปริภาวิตํ สุทนฺตํ;
ปาปํ ปน เม น วิชฺชติ,
อถ เจ ปตฺถยสี ปวสฺส เทว”. (6)
“อตฺตเวตนภโตหมสฺมิ, (อิติ ธนิโย โคโป)
ปุตฺตา จ เม สมานิยา อโรคา;
เตสํ น สุณามิ กิญฺจิ ปาปํ,
อถ เจ ปตฺถยสี ปวสฺส เทว”. (7)
“นาหํ ภตโกสฺมิ กสฺสจิ, (อิติ ภควา)
นิพฺพิฏฺเฐน จรามิ สพฺพโลเก;
อตฺโถ ภติยา น วิชฺชติ,
อถ เจ ปตฺถยสี ปวสฺส เทว”. (8)
“อตฺถิ วสา อตฺถิ เธนุปา, (อิติ ธนิโย โคโป)
โคธรณิโย ปเวณิโยปิ อตฺถิ;
อุสโภปิ ควมฺปตีธ อตฺถิ,_
อถ เจ ปตฺถยสี ปวสฺส เทว”. (9)
“นตฺถิ วสา นตฺถิ เธนุปา, (อิติ ภควา)
โคธรณิโย ปเวณิโยปิ นตฺถิ;
อุสโภปิ ควมฺปตีธ นตฺถิ,_
อถ เจ ปตฺถยสี ปวสฺส เทว”. (10)
“ขิลา นิขาตา อสมฺปเวธี, (อิติ ธนิโย โคโป)
ทามา มุญฺชมยา นวา สุสณฺฐานา;
น หิ สกฺขินฺติ เธนุปาปิ เฉตฺตุํ,
อถ เจ ปตฺถยสี ปวสฺส เทว”. (11)
“อุสโภริว เฉตฺว พนฺธนานิ, (อิติ ภควา)
นาโค ปูติลตํว ทาลยิตฺวา;
นาหํ ปุนุเปสฺสํ คพฺภเสยฺยํ,
อถ เจ ปตฺถยสี ปวสฺส เทว”. (12)
นินฺนญฺจ ถลญฺจ ปูรยนฺโต,
มหาเมโฆ ปวสฺสิ ตาวเทว;
สุตฺวา เทวสฺส วสฺสโต,
อิมมตฺถํ ธนิโย อภาสถ. (13)_
“ลาภา วต โน อนปฺปกา,
เย มยํ ภควนฺตํ อทฺทสาม;
สรณํ ตํ อุเปม จกฺขุม,
สตฺถา โน โหหิ ตุวํ มหามุนิ. (14)
โคปี จ อหญฺจ อสฺสวา,
พฺรหฺมจริยํ สุคเต จรามเส;
ชาติมรณสฺส ปารคู,
ทุกฺขสฺสนฺตกรา ภวามเส”. (15)
“นนฺทติ ปุตฺเตหิ ปุตฺติมา, (อิติ มาโร ปาปิมา)
โคมา โคหิ ตเถว นนฺทติ;
อุปธี หิ นรสฺส นนฺทนา,_
น หิ โส นนฺทติ โย นิรูปธิ”. (16)
“โสจติ ปุตฺเตหิ ปุตฺติมา, (อิติ ภควา)
โคมา โคหิ ตเถว โสจติ;
อุปธี หิ นรสฺส โสจนา,_
น หิ โส โสจติ โย นิรูปธี”ติ. (17)
ธนิยสุตฺตํ ทุติยํ.