1.5 จุนฺทสุตฺต
“ปุจฺฉามิ มุนิํ ปหูตปญฺญํ, (อิติ จุนฺโท กมฺมารปุตฺโต)
พุทฺธํ ธมฺมสฺสามิํ วีตตณฺหํ;
ทฺวิปทุตฺตมํ สารถีนํ ปวรํ,
กติ โลเก สมณา ตทิงฺฆ พฺรูหิ”. (1)
“จตุโร สมณา น ปญฺจมตฺถิ, (จุนฺทาติ ภควา)
เต เต อาวิกโรมิ สกฺขิปุฏฺโฐ;
มคฺคชิโน มคฺคเทสโก จ,
มคฺเค ชีวติ โย จ มคฺคทูสี”. (2)
“กํ มคฺคชินํ วทนฺติ พุทฺธา, (อิติ จุนฺโท กมฺมารปุตฺโต)
มคฺคกฺขายี กถํ อตุโลฺย โหติ;
มคฺเค ชีวติ เม พฺรูหิ ปุฏฺโฐ,
อถ เม อาวิกโรหิ มคฺคทูสิํ”. (3)
“โย ติณฺณกถํกโถ วิสโลฺล,
นิพฺพานาภิรโต อนานุคิทฺโธ;
โลกสฺส สเทวกสฺส เนตา,
ตาทิํ มคฺคชินํ วทนฺติ พุทฺธา. (4)
ปรมํ ปรมนฺติ โยธ ญตฺวา,
อกฺขาติ วิภชเต อิเธว ธมฺมํ;
ตํ กงฺขฉิทํ มุนิํ อเนชํ,
ทุติยํ ภิกฺขุนมาหุ มคฺคเทสิํ. (5)
โย ธมฺมปเท สุเทสิเต,
มคฺเค ชีวติ สญฺญโต สตีมา;
อนวชฺชปทานิ เสวมาโน,
ตติยํ ภิกฺขุนมาหุ มคฺคชีวิํ. (6)
ฉทนํ กตฺวาน สุพฺพตานํ,
ปกฺขนฺที กุลทูสโก ปคพฺโภ;
มายาวี อสญฺญโต ปลาโป,
ปติรูเปน จรํ ส มคฺคทูสี. (7)
เอเต จ ปฏิวิชฺฌิ โย คหฏฺโฐ,
สุตวา อริยสาวโก สปญฺโญ;
สพฺเพ เนตาทิสาติ ญตฺวา,
อิติ ทิสฺวา น หาเปติ ตสฺส สทฺธา;_
กถํ หิ ทุฏฺเฐน อสมฺปทุฏฺฐํ,
สุทฺธํ อสุทฺเธน สมํ กเรยฺยา”ติ. (8)
จุนฺทสุตฺตํ ปญฺจมํ.