1.6 ปราภวสุตฺต
เอวํ เม สุตํ— เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. อถ โข อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ. เอกมนฺตํ ฐิตา โข สา เทวตา ภควนฺตํ คาถาย อชฺฌภาสิ—
“ปราภวนฺตํ ปุริสํ,
มยํ ปุจฺฉาม โคตม;
ภวนฺตํ ปุฏฺฐุมาคมฺม,
กิํ ปราภวโต มุขํ”. (1)
“สุวิชาโน ภวํ โหติ,
สุวิชาโน ปราภโว;
ธมฺมกาโม ภวํ โหติ,
ธมฺมเทสฺสี ปราภโว”. (2)
“อิติ เหตํ วิชานาม,
ปฐโม โส ปราภโว;
ทุติยํ ภควา พฺรูหิ,
กิํ ปราภวโต มุขํ”. (3)
“อสนฺตสฺส ปิยา โหนฺติ,
สนฺเต น กุรุเต ปิยํ;
อสตํ ธมฺมํ โรเจติ,
ตํ ปราภวโต มุขํ”. (4)
“อิติ เหตํ วิชานาม,
ทุติโย โส ปราภโว;
ตติยํ ภควา พฺรูหิ,
กิํ ปราภวโต มุขํ”. (5)
“นิทฺทาสีลี สภาสีลี,
อนุฏฺฐาตา จ โย นโร;
อลโส โกธปญฺญาโณ,
ตํ ปราภวโต มุขํ”. (6)
“อิติ เหตํ วิชานาม,
ตติโย โส ปราภโว;
จตุตฺถํ ภควา พฺรูหิ,
กิํ ปราภวโต มุขํ”. (7)
“โย มาตรํ ปิตรํ วา,
ชิณฺณกํ คตโยพฺพนํ;
ปหุ สนฺโต น ภรติ,
ตํ ปราภวโต มุขํ”. (8)
“อิติ เหตํ วิชานาม,
จตุตฺโถ โส ปราภโว;
ปญฺจมํ ภควา พฺรูหิ,
กิํ ปราภวโต มุขํ”. (9)
“โย พฺราหฺมณํ สมณํ วา,
อญฺญํ วาปิ วนิพฺพกํ;
มุสาวาเทน วญฺเจติ,
ตํ ปราภวโต มุขํ”. (10)
“อิติ เหตํ วิชานาม,
ปญฺจโม โส ปราภโว;
ฉฏฺฐมํ ภควา พฺรูหิ,
กิํ ปราภวโต มุขํ”. (11)
“ปหูตวิตฺโต ปุริโส,
สหิรญฺโญ สโภชโน;
เอโก ภุญฺชติ สาทูนิ,
ตํ ปราภวโต มุขํ”. (12)
“อิติ เหตํ วิชานาม,
ฉฏฺฐโม โส ปราภโว;
สตฺตมํ ภควา พฺรูหิ,
กิํ ปราภวโต มุขํ”. (13)
“ชาติตฺถทฺโธ ธนตฺถทฺโธ,
โคตฺตตฺถทฺโธ จ โย นโร;
สญฺญาติํ อติมญฺเญติ,
ตํ ปราภวโต มุขํ”. (14)
“อิติ เหตํ วิชานาม,
สตฺตโม โส ปราภโว;
อฏฺฐมํ ภควา พฺรูหิ,
กิํ ปราภวโต มุขํ”. (15)
“อิตฺถิธุตฺโต สุราธุตฺโต,
อกฺขธุตฺโต จ โย นโร;
ลทฺธํ ลทฺธํ วินาเสติ,
ตํ ปราภวโต มุขํ”. (16)
“อิติ เหตํ วิชานาม,
อฏฺฐโม โส ปราภโว;
นวมํ ภควา พฺรูหิ,
กิํ ปราภวโต มุขํ”. (17)
“เสหิ ทาเรหิ อสนฺตุฏฺโฐ,
เวสิยาสุ ปทุสฺสติ;
ทุสฺสติ ปรทาเรสุ,
ตํ ปราภวโต มุขํ”. (18)
“อิติ เหตํ วิชานาม,
นวโม โส ปราภโว;
ทสมํ ภควา พฺรูหิ,
กิํ ปราภวโต มุขํ”. (19)
“อตีตโยพฺพโน โปโส,
อาเนติ ติมฺพรุตฺถนิํ;
ตสฺสา อิสฺสา น สุปติ,
ตํ ปราภวโต มุขํ”. (20)
“อิติ เหตํ วิชานาม,
ทสโม โส ปราภโว;
เอกาทสมํ ภควา พฺรูหิ,
กิํ ปราภวโต มุขํ”. (21)
“อิตฺถิํ โสณฺฑิํ วิกิรณิํ,
ปุริสํ วาปิ ตาทิสํ;
อิสฺสริยสฺมิํ ฐเปติ,_
ตํ ปราภวโต มุขํ”. (22)
“อิติ เหตํ วิชานาม,
เอกาทสโม โส ปราภโว;
ทฺวาทสมํ ภควา พฺรูหิ,
กิํ ปราภวโต มุขํ”. (23)
“อปฺปโภโค มหาตโณฺห,
ขตฺติเย ชายเต กุเล;
โส จ รชฺชํ ปตฺถยติ,
ตํ ปราภวโต มุขํ. (24)
เอเต ปราภเว โลเก,
ปณฺฑิโต สมเวกฺขิย;
อริโย ทสฺสนสมฺปนฺโน,
ส โลกํ ภชเต สิวนฺ”ติ. (25)
ปราภวสุตฺตํ ฉฏฺฐํ.