2.13 สมฺมาปริพฺพาชนียสุตฺต
“ปุจฺฉามิ มุนิํ ปหูตปญฺญํ,
ติณฺณํ ปารงฺคตํ ปรินิพฺพุตํ ฐิตตฺตํ;
นิกฺขมฺม ฆรา ปนุชฺช กาเม,
กถํ ภิกฺขุ สมฺมา โส โลเก ปริพฺพเชยฺย”. (1)
“ยสฺส มงฺคลา สมูหตา, (อิติ ภควา)
อุปฺปาตา สุปินา จ ลกฺขณา จ;_
โส มงฺคลโทสวิปฺปหีโน,
สมฺมา โส โลเก ปริพฺพเชยฺย. (2)
ราคํ วินเยถ มานุเสสุ,
ทิพฺเพสุ กาเมสุ จาปิ ภิกฺขุ;
อติกฺกมฺม ภวํ สเมจฺจ ธมฺมํ,
สมฺมา โส โลเก ปริพฺพเชยฺย. (3)
วิปิฏฺฐิกตฺวาน เปสุณานิ,
โกธํ กทรียํ ชเหยฺย ภิกฺขุ;
อนุโรธวิโรธวิปฺปหีโน,
สมฺมา โส โลเก ปริพฺพเชยฺย. (4)
หิตฺวาน ปิยญฺจ อปฺปิยญฺจ,
อนุปาทาย อนิสฺสิโต กุหิญฺจิ;
สํโยชนิเยหิ วิปฺปมุตฺโต,
สมฺมา โส โลเก ปริพฺพเชยฺย. (5)
น โส อุปธีสุ สารเมติ,
อาทาเนสุ วิเนยฺย ฉนฺทราคํ;
โส อนิสฺสิโต อนญฺญเนโยฺย,
สมฺมา โส โลเก ปริพฺพเชยฺย. (6)
วจสา มนสา จ กมฺมุนา จ,
อวิรุทฺโธ สมฺมา วิทิตฺวา ธมฺมํ;
นิพฺพานปทาภิปตฺถยาโน,
สมฺมา โส โลเก ปริพฺพเชยฺย. (7)
โย วนฺทติ มนฺติ นุนฺนเมยฺย,
อกฺกุฏฺโฐปิ น สนฺธิเยถ ภิกฺขุ;
ลทฺธา ปรโภชนํ น มชฺเช,
สมฺมา โส โลเก ปริพฺพเชยฺย. (8)
โลภญฺจ ภวญฺจ วิปฺปหาย,
วิรโต เฉทนพนฺธนา จ ภิกฺขุ;
โส ติณฺณกถํกโถ วิสโลฺล,
สมฺมา โส โลเก ปริพฺพเชยฺย. (9)
สารุปฺปํ อตฺตโน วิทิตฺวา,
โน จ ภิกฺขุ หิํเสยฺย กญฺจิ โลเก;
ยถาตถิยํ วิทิตฺวา ธมฺมํ,
สมฺมา โส โลเก ปริพฺพเชยฺย. (10)
ยสฺสานุสยา น สนฺติ เกจิ,
มูลา จ อกุสลา สมูหตาเส;
โส นิราโส อนาสิสาโน,
สมฺมา โส โลเก ปริพฺพเชยฺย. (11)
อาสวขีโณ ปหีนมาโน,
สพฺพํ ราคปถํ อุปาติวตฺโต;
ทนฺโต ปรินิพฺพุโต ฐิตตฺโต,
สมฺมา โส โลเก ปริพฺพเชยฺย. (12)
สทฺโธ สุตวา นิยามทสฺสี,
วคฺคคเตสุ น วคฺคสาริ ธีโร;
โลภํ โทสํ วิเนยฺย ปฏิฆํ,
สมฺมา โส โลเก ปริพฺพเชยฺย. (13)
สํสุทฺธชิโน วิวฏฺฏจฺฉโท,
ธมฺเมสุ วสี ปารคู อเนโช;
สงฺขารนิโรธญาณกุสโล,
สมฺมา โส โลเก ปริพฺพเชยฺย. (14)
อตีเตสุ อนาคเตสุ จาปิ,
กปฺปาตีโต อติจฺจสุทฺธิปญฺโญ;
สพฺพายตเนหิ วิปฺปมุตฺโต,
สมฺมา โส โลเก ปริพฺพเชยฺย. (15)
อญฺญาย ปทํ สเมจฺจ ธมฺมํ,
วิวฏํ ทิสฺวาน ปหานมาสวานํ;
สพฺพุปธีนํ ปริกฺขยาโน,
สมฺมา โส โลเก ปริพฺพเชยฺย”. (16)
“อทฺธา หิ ภควา ตเถว เอตํ,
โย โส เอวํวิหารี ทนฺโต ภิกฺขุ;
สพฺพสํโยชนโยควีติวตฺโต,
สมฺมา โส โลเก ปริพฺพเชยฺยา”ติ. (17)
สมฺมาปริพฺพาชนียสุตฺตํ เตรสมํ.