2.2 อามคนฺธสุตฺต
“สามากจิงฺคูลกจีนกานิ จ,
ปตฺตปฺผลํ มูลผลํ ควิปฺผลํ;
ธมฺเมน ลทฺธํ สตมสฺนมานา,
น กามกามา อลิกํ ภณนฺติ. (1)
ยทสฺนมาโน สุกตํ สุนิฏฺฐิตํ,
ปเรหิ ทินฺนํ ปยตํ ปณีตํ;
สาลีนมนฺนํ ปริภุญฺชมาโน,
โส ภุญฺชสี กสฺสป อามคนฺธํ. (2)
น อามคนฺโธ มม กปฺปตีติ,
อิจฺเจว ตฺวํ ภาสสิ พฺรหฺมพนฺธุ;_
สาลีนมนฺนํ ปริภุญฺชมาโน,
สกุนฺตมํเสหิ สุสงฺขเตหิ;
ปุจฺฉามิ ตํ กสฺสป เอตมตฺถํ,
กถํปกาโร ตว อามคนฺโธ”. (3)
“ปาณาติปาโต วธเฉทพนฺธนํ,
เถยฺยํ มุสาวาโท นิกติวญฺจนานิ จ;
อชฺเฌนกุตฺตํ ปรทารเสวนา,
เอสามคนฺโธ น หิ มํสโภชนํ. (4)
เย อิธ กาเมสุ อสญฺญตา ชนา,
รเสสุ คิทฺธา อสุจิภาวมสฺสิตา;
นตฺถิกทิฏฺฐี วิสมา ทุรนฺนยา,
เอสามคนฺโธ น หิ มํสโภชนํ. (5)
เย ลูขสา ทารุณา ปิฏฺฐิมํสิกา,
มิตฺตทฺทุโน นิกฺกรุณาติมานิโน;
อทานสีลา น จ เทนฺติ กสฺสจิ,
เอสามคนฺโธ น หิ มํสโภชนํ. (6)
โกโธ มโท ถมฺโภ ปจฺจุปฏฺฐาปนา,
มายา อุสูยา ภสฺสสมุสฺสโย จ;
มานาติมาโน จ อสพฺภิ สนฺถโว,
เอสามคนฺโธ น หิ มํสโภชนํ. (7)
เย ปาปสีลา อิณฆาตสูจกา,
โวหารกูฏา อิธ ปาฏิรูปิกา;
นราธมา เยธ กโรนฺติ กิพฺพิสํ,
เอสามคนฺโธ น หิ มํสโภชนํ. (8)
เย อิธ ปาเณสุ อสญฺญตา ชนา,
ปเรสมาทาย วิเหสมุยฺยุตา;
ทุสฺสีลลุทฺทา ผรุสา อนาทรา,
เอสามคนฺโธ น หิ มํสโภชนํ. (9)
เอเตสุ คิทฺธา วิรุทฺธาติปาติโน,
นิจฺจุยฺยุตา เปจฺจ ตมํ วชนฺติ เย;
ปตนฺติ สตฺตา นิรยํ อวํสิรา,
เอสามคนฺโธ น หิ มํสโภชนํ. (10)
น มจฺฉมํสานมนาสกตฺตํ,
น นคฺคิยํ น มุณฺฑิยํ ชฏาชลฺลํ;
ขราชินานิ นาคฺคิหุตฺตสฺสุปเสวนา,
เย วาปิ โลเก อมรา พหู ตปา;
มนฺตาหุตี ยญฺญมุตูปเสวนา,
โสเธนฺติ มจฺจํ อวิติณฺณกงฺขํ. (11)
โสเตสุ คุตฺโต วิทิตินฺทฺริโย จเร,
ธมฺเม ฐิโต อชฺชวมทฺทเว รโต;
สงฺคาติโค สพฺพทุกฺขปฺปหีโน,
น ลิปฺปติ ทิฏฺฐสุเตสุ ธีโร”. (12)
อิจฺเจตมตฺถํ ภควา ปุนปฺปุนํ,_
อกฺขาสิ นํ เวทยิ มนฺตปารคู;
จิตฺราหิ คาถาหิ มุนี ปกาสยิ,
นิรามคนฺโธ อสิโต ทุรนฺนโย. (13)
สุตฺวาน พุทฺธสฺส สุภาสิตํ ปทํ,
นิรามคนฺธํ สพฺพทุกฺขปฺปนูทนํ;
นีจมโน วนฺทิ ตถาคตสฺส,
ตตฺเถว ปพฺพชฺชมโรจยิตฺถาติ. (14)
อามคนฺธสุตฺตํ ทุติยํ.